رواية أهني بك حياتي يا قمرها .. وأهني بك عيوني يا نظرها ..♥️

البارت الرابع عشر

البارت الرابع عشر/
______

صباح يوم ثاني
فتحت عيونها وهي تشوف ابوها قبالها عقدت حواجبها باستغراب وعدلت جلستها : يبه ... هلا تبي شيء ،، آمر ؟
عقد حواجبه وبلع غصة تجمعت في حلقه : يا بنتي انا وش لي عندك ؟!
زاد استغرابها : عيوني وروحي وقلبي يبه سمّ وآمر ،؟!
ابوها عض شفايفه : يا بنتي يا مهرة لا يخفيك وضع اختك كيف استصعب وتأزم
مهرة انقهرت لكن سلكت له تبي تعرف وش ورا هالمقدمة : اييه ،؟!
ابوها تنهد : وتعرفين غلاك عندي ومعزتك  صح ؟
تشكين بغلاك
مهرة تنهدت : ايه يبه اعرف غلاي ومعزتي عندك وحاشى لله اني ماجاء على بالي غير كيذا
ابو مهرة : كلمني الدكتورة عن وضعها واذا كانت بتتعالج في خيارين  يا انه تدخل المصحة النفسية وتتعالج ...
(( هنا مهرة لا شعوريا حست بشعور ارتياح وسعادة اخيراً لكن داايركت تغير شعورها وتحول للصدمة وانفجعت وهي تسمعه : انك انتي تبعدين عن البيت بدخولك لميتم بس هو مو ميتم ميتم بس راح ازورك وتزورك امك واخوانك يعني كأنك عايشه بشقه لحالك
مهرة بغصة : وليه ما تكون هي اللي تروح وتعيش مع امها بشقة لحال
ابو مهرة : يا بنتي مااقدر اخليها لحالها وهي وضعها كيذا
مهرة بغصة : وعادي انا تبعد عني وتخليني لحالي
ابو مهرة : يا بنتي راعيها شوي
ارتفع الضغط عندها وزادت نبضات قلبها بقهر وانغبنت لكن كتمت شعورها وبكل جمود : متى بتوديني ؟
ابو مهرة حضنها : الله يسعد لي قلبك ويريحك ويفتح عليك
ابتسمت بسخرية وبعدت عنه ودخلت دورة المياة جلست تحت الدش سكرت فمها بايديها واطلقت لنفسها العنان وبكت وبكت اب تخلى عنها ام ضعيفة قدام سلطة ابوها اخت ظالمة مستبدة اخوان  غير مبالين بنظرها ....
____________
بيت ابو خالد ..~...
قدام بابه واقف وتنفس بعمق ورن الجرس لحظات حتى فتحت الخادمة الباب وابتسمت وهزت راسها بصمت وراحت دخل مبتسم مشتاااق وباعلى صوته : انا جيييييييييييت
ضحك بقوة على ردة فعلهم واستغرب الوجوه الجديدة وبرود اخته جوري ....
حضن ابوه اللي تحمد له بالسلامة وكذلك اخوانه
والتفت على زوجة ابوه والتفت عليه : يبه مين هذه. ؟
ابوه ابتسم : هذه زوجتي
ابتسم : اوووه تزوجت عالبركة حسيت اني مقطوع من شجرة ما تدقون علي تبلغوني وكل شيء بالخش والدس بس هين
التفت على جوري : والحلوة ليه ماتقوم تسلم
وقفت بطفش  ومدت يدها وببرود : السلام الحمد لله على السلامة
سحبها من يدها وصدمت بصدره وحضنها : كيذا تسلمين على اخوك اللي ما شفتيه من نص سنة حرام عليك هذا وانا جايب لك هدايا ومشتاق لك
رفع راسه لخالد وهو حاضنها وهز براسه بإيش فيها وأشر له خالد أنه بعدين يقول له
_________________

رفع حواجبه وهو يعض شفايفه بغيض مكتوم فتح عيونه بصدمة وشهق من قوة الضربة اللي جاته على ظهره وبقهر لف على خالد: خير
خالد بضحك : ياخي ماتخيلت بشوفك جدي يوم من الايام عقاب ابوي فاد معك
ابتسم بهدوء : الغربة بشعه تسرق منك حياتك وحيويتك
خالد : خف علينا يا الطائر الحزين
فارس: شفيك مو مصدقني تراها مرعبه
خالد : مرعبه بس هذا هي ربّتك بدال ماكنت مجنن ابوي من مركز شرطة الى مستشفى
فارس ابتسم وهو يتذكر : هههههههه والله ايام
خالد: حسستني انه عشر سنين اللي رحتها تراك رحت وعمرك ١٤ سنة يعني ما مر الا سنتين
فارس : هاه شفت مو توني مراهق ليه يقلعني هناك  والله اني عتبان عليه
خالد ابتسم: ليه شصار هناك
فارس بهمس:  وما تقول لاحد ؟
خالد : لا وشو ؟
فارس بهمس في اذن خالد: : .........
اول ما انتهى فارس انفجر خالد يضحك بصوت عالي ومو قادر يوقف وكل ما شفت ملامح فارس زاد بضحكه وهي يتخيل شكله
فارس : بس ياحمار لا تفضحنا
خالد: ههههههههه انت هههههههههه مجنوووون هههههههه
نزل مهند وهو يعدل غترته ويبتسم على ضحكة خالد: شصاير ؟ ضحكني معك ؟ التفت بصدمة لما انتبه لفارس اللي جالس ومبتسم مشى له بخطوات سريعة : الحممممد لله على السلااااامة وحضنه وهو يضرب ظهره : ليه ما علمتنا جيناك المطار
فارس : والله ظهري ابيه وبعدين ماابي اتعبكم
مهند عوج شفايفه باستغراب : غريبه صاير محترم وينه ابوي يشهد على هاللحظات
فارس بملل : هفف ترا عطيتكم وجه ليه طايح من عيونكم  اصبروا يمكن طيب لاني توني راجع من السفر وتعبان ( ابتسم وهو ينزل الكاب على عيونه ) : ارتاح وبعدها اطلع الشيب براسكم فرداً فرداً
واستمروا بجلستهم وانتهى يومهم على نفس روتين اليومي والكل راح لغرفته ينام
__________________
يوم جديد .... ١٠:٣٠ صباحاً
..~..
فتحت عيونها على صوت جوالها يدق تنهدت بكسل وردت : نععم
: بللل شكل الاخلاق قافله
جوري: وش تبين ؟
: انا وماريا قررنا نطلع المول تجين معنا
شافت الساعه : متى ؟
مهرة : كيذا عالساعة ٤ العصر
جوري: تمام
سكرت منها وهي تتأفف الساعة ١٠ وتدق علشان طلعه الساعة اربع خبله
انسدحت وظلت تناظر السقف ليه تحس بفراغ .. ليه تحس نفسها مو متقبله اي شيء كانت تحبه من قبل .. ليه تحس الاماكن ضيقة رغم اتساعها
كان من اجمل الاشياء اللي تسويها طلعتها مع مهرة وماريا للسوق شفيه تغير شعورها وماتبي تطلع خلال هالايام كثير كانت تلازم غرفتها ولا تطلع منها اكلها وشربها بالغرفة ومن مسلسل الى مسلسل
ومن فيلم الى الثاني .... ما تطلع الا مجبورة من ابوها يوم جمعة العائلة غيره ما تحب
تساءلت متى ينتهي شعورها بالفراغ اللي بداخلها وضاق صدرها اكثر انا تذكرت انها وخلال هذه الايام ما تصحى الا على كوابيس لدرجة صارت تخاف تنام علشان ماتبي تشوفها ....
جوري تلحفت وبكل قهر تحس فيه سحبت اكبر قدر ممكن من الاوكسجين و : اووووووووووفففففف
غمضت عيونها وفتحت جوالها سورة البقرة وظلت تسمعها حتى شوي شوي غمضت عيونها ونامت
_____\_____\_______________

الساعة ٦:٠٠ الليل

فتحت عيونها بخمول ومسكت جوالها وردت : نعععم
بصراخ وصوت باكي : يا حماااااارة ليه سحبتي علي ليه خليتيني اكرهك جوري اكرهك
فزت وشافت الجوال من مهرة وبهدوء وقلبها يرقع : شفيك ؟
عقدت حواجبها من صوت شهقات مهرة : عيوني مهرة فيك شيء؟ خالتي فيها شيء ؟ شفيك
مهرة : مقهورة يا جوري مقهورة بموت من القهر والحسرة تخيلي تخيلي اخر حل توصل له لازم انتِ يا مهرة ياحماره يالكلبه تروحين لميتم علشان اختك ال### تتعالج اكرهها اكرهها يا جوري واكرهني واكره ابوي
وانهارت مهرة تبكي وقلبها يوجعها من القهر والالم اللي فيه
جوري بعد صمت : انتِ  وينك ؟
مهرة بيكى :  بالبيت ..
جوري بجمود:  قومي غسلي وجهك وخلينا نتقابل انا وانتِ ولا تقولين لابوك انه معي قولي مع واحدة من صاحباتك وجيبي بطاقتك معك ...
مهرة : وش بتسوين ؟
جوري وفي بالها مخطط : انطمي واخلصي تعالي بسرعة
..............~~~~~~~~~............

انتهى البارت ...
تفاعلوا

واسفه عالتأخييير ...😩😭😭😭

تعليقاتكم تحمسني اكتب واكمل

وعذرا على الاخطاء الإملائية