رواية أهني بك حياتي يا قمرها .. وأهني بك عيوني يا نظرها ..♥️

البارت الخامس عشر

البارت ١٥ /
__________
عند جوري ..، بغرفتها ،،،
قامت ودخلت لدورة المياة وتروشت عالسريع ومشطت شعرها على ورا ولبست عباتها وطلعت مستعجله وركبت السيارة ورفعت جوالها ودقت على رقم محدد وانتظرت الرد عشر ثواني حتى رد صاحب الرقم : الو
جوري : السلام عليكم ورحمة الله وبركاته
صاحب الرقم : وعليكم السلام ورحمة الله هلا من معي
جوري : معك ام فيصل لقيت هذا الرقم في اعلان لشقة مفروشة للآجار هل هي متاحة والا تأجرت وكم بتأجرها سنوي والا شهري وكيف الشقة بشكل عام؟
صاحب الرقم : يا هلا ... ايه متاحة طال عمرك اما الامور اللي حابه تعرفينها راح ارسلها لك هالواتس اب باذن الله بالنسبه للآجار فهو سنوي
جوري بلعت ريقها : طيب اذا تسمح انا عندي ظروف وابي مكان استقر فيه هل تقدر تساعدني من فضلك اجي اسكن فيها لفترة وان شاء الله ما راح يضيع حقك يعني بدل بس مؤجل يكون تقدر ياخوي
سكت فترة : مو فاهم عليك ياختي
تنهدت وظلت ساكته مو عارفة تفهمه " لصغر سنها وقلة خبرتها عجزت تحاول توصل له اللي تبيه " تكلمت وانصدم حتى رفع حاجب باستغراب : على بلاطه ابيك تساعدني بأني اسكن الشقة والمبلغ نتفق عليه واعطيك اياه متى ما توفر والله بتفك ازمه وبتفرج لأختك المسلمة
كتم ضحكته وبسؤال صدمها: كم عمرك انتِ ؟
ووين اهلك عنك هاه؟
جوري ارتبكت: هاااه مين قال لك اني بزر انا انا شسمه اوووه بتساعدني والا لا
عض شفته وسكت وفكر الان هي واضح صغيره ولو تروح عند واحد ويصادف يكون واحد خسيس ممكن تروح فيها غير انه يحس بفضول ليه واحدة باين انها صغيره تحتاج شقة ومستميتة تبيها تنهد وتكلم : طيب موافق بس بشرط
رفعت حاجب : ايش هو ؟
: شوفي انا عارف انك بزر .. وواضح من صوتك وارتباكك وانفاسك اللي اسمعها شرطي هو تقولين لي كم عمرك ؟ وليه تبين الشقة هذه ؟
عضت شفتها : عمري ١٩ ابي الشقة بس بشكل مؤقت بس والله
رفع حاجب : ومتى بتجين تسكتين ؟
جوري : بكرة ان شاء الله
عقد حواجبها واضح الوضع متأزم : واهلك موافقين ما ابي مشاكل وشكاوى بعدين اروح فيها
جوري : انا بدافع عنك
مجرد ما انهت كلمتها صاحب الشقة فقع ضحك باعلى صوته وكل ما سكت رجع يضحك : اووف تدافعين عني مرة واحدة تمام اجل اتفقنا
جوري ظلت ساكته وقلبها يدق ومستغربه ومتفشله من ضحكه الغير مبرر بس سلكت له : كم غرفة ومن ايش تتكون الغرفة ؟
بضحكة : من ثلاث غرف ومطبخ وكل غرفه لها حمام ومجلسين وصالة وبس
جوري : حلو وكم اجارها
سكت وفكّر وتنهد وحط يده على كف عفريت وتكلم : ١٩ الف اجار سنوي
جوري : تمام اتفقنا خلاص بكرا بجي اسكن
والمبلغ خله بعدين
بداخله الله يستر : تمام اتفقنا متى تجين تاخذين المفتاح
جوري : اووووف بكرا يلا سلام
______
وصلت للمكان اللي اتفقت تلتقي فيه مع مهرة
وبعد صمت ونظرات عيون مكسورة
جوري مسكت يدها وبصوت مخنوق : تتوقعين ان حياتك مقلوبه اكثر مني ؟ قوليلي مين يشيل اثار اللي صار لي من عقلي وروحي وجسمي " بلعت ريقها بغصة " كنت البس ملابس عيال مو متقبله كوني بنت بسبب الم بُعد امي عني واني كبنت احتجت لها اوقات كثير وماكانت جنبي انا الان يوم تقبلت وقلت بتغير " ماقدرت تتحمل غصتها وبكت وبصوت باكي مكسور " : ما اقدر البس لان جسمي ما يساعد اثار ضربه وتعنيفه لي لازالت تزين ظهري لازالت عالقه بعقلي بسبب كوابيس كل مانمت وكأني اعيش وقت اختطافه لي لما كنت هناك .. كنت ما انام الا بعد جهد وصراخ وانهيار انه ما يقرب مني ولا يلمسني ( ضحكت بسخرية ) شكله انتهى مستقبله لاني كل مرة يجي فيها بيحاول فيني ... اضربه ويتألم ويهدد ويروح عني
رفعت عيونها لمهرة وبكت : لو خيرتيني وكنت انا مكانك عايشه حياتك وابوي مد يده علي علشانها حبسني بالمخزن بالظلام بسببها حسسني بعدم الثقة بسببها حرمني من الاكل بسببها عادي بروح للميتم بدون حتى ما يرف لي جفن تدرين ليه ؟ لانه ارحم من اني اعيش هذا الخذلان كل يوم والله ارحم
قامت مهرة وسحبت جوري وحضنتها وانخرطت في بكاء مرير مقهورة وهي تشد عليها وتصيح بأنين وشهقات تبين وجعها : جوري ... انا .. احبك
جوري ابتسمت بوجع : وانا احبك الان اسمعيني بكرة الساعة ٩ الليل تشيلين شنطة لك فيها اشياءك الضرورية فقط وتجين عند الموقع اللي برسله لك والموقع هو مكان الشقة راح تروحين وتسكنين هناك ووووو كملت لها فكرتها ومهرة تناظرها وتفكر بداخلها لولا الله ثم جوري وش بتسوي ؟
______________
رجعت جوري للبيت ومرت من عند غرفة الطعام وشافتهم مجتمعين ياكلون
ابوها : جوري
جوري زمت شفايفها : هلا
ابوها : تعالي كلي
جوري : اكلت برا بالعافية
ابوها : وين كنتي؟
جوري باختصار : مع مهرة مطعم .. ءءء مع السلامة تعبانه وبروح ارتاح
فارس : هي كيذا كل يوم نفسية ؟ احححح
مد يده لراسه والتفت على ابوه : ليه يبه شسويييت هذا وانا ولدك اللي مشتاق له
ابوه : ايه كثر منها
فارس : الله يصبرني شكلي بارجع مكان ما جيت
ابوه وقف ببرود وطلع ساحب عليه
فارس : اوووف والله الوضع هنا ممل ...
خالد ابتسم : ليه هناك وش كنت تسوي ما تمل ؟
فارس : اذاكر وطلعات مع الشباب الان ماعندي شيء .. يبغى لها بكرة نشوف لنا حل
خالد رفع حاجب : وشهو ؟
فارس حرك حواجبه فوق وتحت : ماراح اقول لك
وقف : يلا فوتكو بعافيه
________
فوق بغرفة جوري ...
منسدحة بعد ما تروشت ومغمضه عيونها بصمت ودموع من اطراف عيونها تنزل بكل صمت وصوت مهرة وبكاها يرن باذنها رنّ تنهدت تبي تبعد شعور كاتم على انفاسها واستعادت وتحركت بكل خمول واندست بفراشها  وغمضت عيونها ودقايق ونامت
...~.... الساعة ٤:٠٠ الفجر ..~....
بدت تعرق وتتحرك بكثرة وانفاسها بدت تتزايد بشكل مرعب .. ثم ابتدأ انينها وبكاها بخوف ومو قادرة تطلع من تأثير الكابوس وواضح انه مرعبها ويزيد رعب وزاد انينها حتى وصل لابوها اللي كان راجع من الصلاة وسمع انينها وبكاها دخل الغرفة واسرع ماشي لها جلس عالسرير وبهدوء يطبطب على خدها وبحنية : جوري .، يا ابوي اصحي ... جوري ياامي قومي ياروحي .. كابوس ياعيني كابوس
ارتاع لمًا فزت وهي تشهق ارفعت راسها له و بكت وهي تناديه : باااباا
حضنها : هششش يا روحي اهدي كابوس كابوس
ظلت تبكي بحضنه وهو يقرأ عليها بعض الايات بهدوء وصوت خاشع لحتى نامت بحضنه سدحها ولحفها
وطلع من الغرفة بعد ما طفى النور وسكر وراه الباب
____________

نهاية البارت
تفااااااعل

والمعذرة على الأخطاء الإملائية

وتفاعلكم وتعليقاتكم تحميني اكتب واكمل 😁✌️😉😉😉