حمامتي السمراء

البارت الخامس

حمامتي السمراء ل شفاء ال سالم

زينب
گعدت الصبح متأخره لان البارحه بليل نمت متأخره چان اكو شي بصدري يدغدغني كل مااريد انام عبالك حمامات بصدري جانت ترفرف مثل الخبله بقيت اضحك بيني وبين نفسي وبس اتگلب بفراشي اسمعه اذن الفجر گلت يخلص اذان واكوم اصلي وماادري شون غفيت گعدت قبل الغدا بشوي مردت اكل شي بس شلت گلاص الچاي طلعت برا ع الحديقه گعدت اكطع من النعناع واخلي بالگلاص اليوم الجو غير ماادري اني يتهيأ الي اشوف الدنيا غير عبالك ملونه والشمس حلوه والهوا يبرد الكلب ويرد الروح......
اروح لسمر اكيد هو هناك مشتاقتله اريد اشوفه لو عيب ثگلي يابنت انتظره هو يدز عليه واذا مادز عود اروح اني بحجة اشوفها لسمر واشوفه ......
حطوا الغدا وشربنا چاي ورا الغدا وگعدنا نتذكر ايام الي قبل داعش اللمات والطلعات وايام السفرات وبابا وعدنا اول مانتحرر ويرجعون البقيه من اهلنا نروح كلنا سفره وكل اسبوع اذا منزوح سفره ننزل للشاطي العصرونيات اذا الله خلانا بخير بقيما گاعدين وملتمين صار هواي مگعدنا وضحكنا هيج ختمناها بالله يستر من الجاي وان شاء الله تكون ضحكة خير يارب ويكفينا شرها احنا العراقين يخوفنا الفرح من نفرح نحط ادينا على گلوبنا هالشي ورثنا من اجدادنا علموا اهلنا هيج واهلنا علمونا هيج يعني بالوراثه الفرح يخوفنا ....
اجه العصر والله گلت مااشرب الچاي هنا اروح لسمر واكيد راح اشوفه توي طلعت من البيت وچان اسمع صوت هاون بس نزل بعيد الحمدلله رجعت اركض للبيت وكالعاده گعدنا جوا الدرج الجهال والنسوان والزلم برا نزل الهاون الثاني عبالك بيتنا طلعنا نركض وملگينا لا بابا ولا عمامي طلعت اني اركض وماما تصيح عليه بس مرجعت شفت الدخان يطلع من حديقة بيت سمر رجليه متشيلني من الخوف قبل لااوصل هناك وكع الهاون الثالث هم قريب بس مااعرف بيت منو شفت بس الدخان وصلت بيت سمر ولگيتهم كلهم ملتمين وجدتها بالگاع مدده والدم مغطيها چانت جايه زياره لبيتهم لان هي ساكنه ببيت ابنها الجبير يبعدون عنهم بيتين چانت سمر مصدومه بس واكفه لا تبجي ولا تحچي وجدتها الله يرحمها بسرعه ماتت لان متصاوبه بگلبها رغم چانت قطعه صغيره طايره عليها بس جايه بمكان يموت
هاليوم بالذات بدايته جانت تختلف عن نهايته شون جنت فرحانه وهسه كلشي انگلب ياربي ليش هيج ديصير بينا..

استوعبت سمر الي صار وبدا العياط والبجي احجي وياها ماكو متستجيب جانت كلش تحب بجدتها ومو بس هي كلنا جنا هيج حتى الحشد چانوا يسموها يمه شكد مچانت حنينه وشايله هم الكل وتنقهر وتبجي عليهم تكول هم مو يم اهلهم هسه گلوب امهاتهم مفرفحه كلوبهن عليهم وهم مبين عليهم تعبانين ومشتاگين لاهلهم ف جانت تخيط ملابسهم الي تشگگ وتغسلها وجانت تخبز وتنطيهم اكل وخبز جانوا يجون يرتاحون يمها بالبيت رغم بوضعنا صارت شحه بالاكل وكلشي بس هي الله يرحمها مااعرف شون چان الاكل يكفيها بحيث حتى الحشد الي يجي عليه توكله وتغسل ملابسه وتنطي كلشي محتاجه ويروحون من يمها وهم يدعون الها ومن يجيهم تكل او اي شي حصتها تطلع قبل ليطلعون حصتهم جانت تحاول تنطيهم شكد متكدر حنان الام الي مفتقديه وبوضعنا هاذ اكثر شي هم محتاجي .....
چان بيتها صغير بس مااعرف شون يوسع هالعدد الجبير من الناس والابتسامه متفارقها ابد حتى بأصعب الاوقات چانت تگول تهون وتعدي وتصير سوالف خلي يمكم ايمان برب العالمين ....هي چانت سند وعون للكل واي احد محتاج اي شي مايتردد يروح عليها اجو عناصر من الحشد من كل الطوائف البچي الي صار رهيب كل البيوت الموجوده حشد وجيش وشرطه كلها التمت اشوف حسام يأشرلي من بعيد بس مفهمت عليه
اجه سحبني من ايدي من نص الهوسه وكفنا بالمطبخ
- مو صار ساعه اشرلج شبيج
- شتريد متشوف سمر شون حالتها
- شعرج
- شبي
- شنو شبي غطي شعرج وروحي غيري ملابسج
- اغطي شعري افتهمت ملابسي شبيها
- شنو شبيها ماشوفين دشداشتج شون قصيره وانوبه نص ردن
- محد منتبه يمعود العالم بحالي هسه
- اني منتبه لتعصبيني وروحي بدلي ملابسج وخلي دنبوس بشالج حتى لا ينزل
- اهوووو بابا واگف محجه انت شكو