فتاة الميتم وأحببت مقدم

البارت السابع

وصلني أمير للسكن ونزلت طبيت كعدت شوية بالحديقة مال السكن استوعب شنو الديصير احسه
صار بسرعة يعني أمير مو طالب أمير ضابط يعني
ميحتاج اغار منة بعد لأن يطلع درجات اعلى مني 😂
هذا جان تفكيري وعرفت هوه ميقرة اصلاً بس الدكاترة يحطولة امتياز لأن ضابط ارتاحيت شوية
وصعدت للغرفة ميتة تعب بدلت ونمت ثاني يوم
كعدت نفس الروتين اتريكت وبدلت وطلعت لكيت
أمير منتظرني
أمير.. صباح الخير
شجون.. صباح النور
أمير.. مشتريتي تلفون حتى اتواصل وياج
شجون.. لا مشتريت
أمير.. اجيبلج تلفون
شجون.. لا ماقبل أمير رجاءاً لاتكول هيج مرة ثانية
صحيح احنة أصدقاء بس ماقبل استغل احد
أمير.. منو كلج هذا استغلال اني العرضتة عليج
شجون.. أمير سد الموضع ماحب احد يتعاطف وياية
أمير.. تمام بعد ماحجي بس لاتزعلين
شجون.. تمام
أمير.. اليوم عندج شي باليل
شجون.. يعني قصدك من ارجع من المطعم
أمير.. يي
شجون.. لا ماعندي شي ليش
أمير.. تمام لعد اني عازمج
شجون.. ماكدر اجي
أمير.. ليش
شجون.. الحارس مال سكن ميفوت اي وحدة بعد الساعة ٩
أمير.. معليج اني احجي وياه
شجون.. اذا هيج تمام
أمير.. ساعة ٩ انتظرج يم باب السكن
شجون.. تمام
طبينا للقاعة وجانت عدنة بس محاضرة بذاك اليوم
خلصناها وطلعنة وأمير أكد علية علمود العزيمة رحت
للسكن ارتاحيت شوية وراجعت المحاظرة وبدلت ورحت للمطعم ظليت اشتغل ابد مكعدت بذاك اليوم
جانوا اكو هواية عالم جان بوكتها مصادف عيد الحب
وكلهم لابسين أحمر ودباديب اني ابد ماحب هاي السوالف الصراحة احسها مملة مو من طرازي اني احب
الأشياء الكلاسك فماحب هيج سوالف كملت اتاخرت
نص ساعة يعني اني مخلصة شغلي بس العالم هواية
وملحكوا وحدهم ظليت نص ساعة زيادة خلصت وطلعت اركض اخاف يجون عالم وابو المطعم يجلب
بية رحت للسكن طبيت ركض سبحت وأخذت فستان
كشخة من لارا لون اسود وبية ورد ذهبي ونشفت
شعري وعفتة مفتوح
لارا.. هاا وين رايحة مواعدة حبيب الكَلب
شجون.. انجبي ترى بس صداقة مو شي ثاني
لارا.. لا واضح صداقة يومية ياخذج من باب السكن
ويكعد بصفج واليوم عازمج الله يدزلي هيج صديق
شجون.. اسكتي انتي فاهمة غلط
لارا.. راح تروحين هيج
شجون.. يي ليش محلوه
لارا.. يعني قصدي وجهج هيج
شجون.. يي ليش شبيج مستغربة
لارا.. تعالي بتي عزيمة ومطعم وجهج هيج شاحب
شجون.. شراح تسوين فهميني
لارا.. معليج ثقي بية
كعدتني كبالها وطلعت الجنطة مال مكياج وظلت تحطلي على وجهي
شجون.. لج لاتحطين هواية هسة اطلع مو حلوه
لارا.. معليج هسه اكمل وشوفي
ظلت تحطلي لحد مكملت حسيت وجهي ثقل لأن
اني ابد ماحط مكياج
لارا.. يلا كملت كومي شوفية
كمت شفتة انصدمت طالعة صدك اخبل يعني مامدح
نفسي بس شكلي اتغير ١٨٠ درجة حاطتلي ايلاينر
كلش حلو مسويتة وحاطتلي اشياء هواية وحاطتلي
حمرة حمرا
شجون.. الحمرة لونها بارز امسحها واحط لون وردي
لارا.. لج ثولة انتي لابسة اسود لازم أحمر حتى يطلع
حلو
شجون.. تمام
شفت الساعة تسعة وخمس دقايق طلعت ركض من
الغرفة نزلت وصلت الباب السكن جان اشوف أمير
ديضحك وية الحارس
أمير.. شوف هاي خطيبتي الكتلك عليها
الحارس.. تمام اخذو راحتكم
اني ظليت صافنة شنو خطيبتي الكتلك عليها
صعدت السيارة واجة أمير صعد
شجون.. ليش اجذب عل رجال
أمير.. لعد شكلة صديقتي وين يصدك
شجون.. تمام بس بعد لاتجذب عل احد
أمير.. احس طالع وية امي مو وياج
شجون.. هههه 
حرك أمير السيارة وظل يمشي لحد موصلنة للمطعم
أمير.. يلا نزلي وصلنة
شجون.. هذا المطعم
أمير.. يي ليش معجبج اذا معجبج نغيرة
شجون.. لا مو هيج قصدي بس المطعم كلش فخم
واني ممتعودة على هيج اشياء
أمير.. راح اعودج انشاءالله يلا نزلي
شجون.. تمام
نزلنة ودخلنا للمطعم تحسون المطعم اثري كلش حلوو
حسيت اكو اشياء مشتركة بيني وبين أمير يعني نحب
نفس الأشياء تقريباً كعدنا على طاولة
أمير.. شتحبين تاكلين
شجون.. مادري ماعرف انتة اطلب على ذوقك
أمير.. تمام
طلب أمير وكعدنا نسولف
أمير.. اليوم طالعة مختلفة عن بقية الايام
شجون.. مفهمت يعني شلون
أمير.. يعني اليوم محلوة زيادة
شجون.. هذا الحجي بس الي لو لكل البنات التواعدهم
أمير.. يابنات
شجون.. الي تجيبهم للمطعم
أمير.. اصلا اني ميعجبني هيج نوع من البنات اني
اوعدهم حتى اخذ معلومات
شجون.. معلومات مال شنو
أمير.. بعدين افهمج ماكدر احجي هنا بالمطعم
شجون.. تمام
اجة الاكل وأمير جان موصي ستيك لحم شوي
وياه خضروات ومقبلات اني ماكل هواية اكلي كلش
قليل اكلت شوية وظليت كاعده اباوع على أمير
ياكل كمل اكل
أمير.. راح اغسل واطلب تحلية واجي
شجون.. تمام
كام وعاف محفظتة عل طاولة جانت محفظتة شوية
مفتوحة وطالع من عدها سلسة مال كلادة تمالكني
الفضول اشوفها جريت السلسة جان اشوف الكلادة
مالتي الي ظيعتها بالمستشفى ظليت صافنة شعدها
بمحفظة أمير شفت أمير من بعيد واكف يطلب رجعتها
بالمحفظة ورجعت المحفظة بمكانها رجع أمير كعد
وجابوا التحلية اكلت شوية وظلينة نسولف ونضحك
شجون.. أمير شوف الساعة ١٠ ونص ماكدر اتأخر اكثر من هيج
أمير.. تمام يلا كومي نروح
كمنا اني وياه طلعنة من المطعم ركبنا السيارة
بالمحافظة الي احنة بيها اكو بيها نهر عل طريق اني
صافنة علية
أمير.. ننزل شوية نكعد يم النهر
شجون.. اخاف الحارس ميقبل ادخل السكن
أمير.. والله خبصتيني بالحارس معليج كتلج اني حجيت وياه
شجون.. تمام
جنت مكيفة لأن ابد مرايحة لهيج أماكن نزلنا اني وأمير
واكو مسطبة كعدنا عليها نتفرج عل نهر وجانت السمه
مليانة نجوم وعم الهدوء بيناتنة
شجون.. يعني هسة اهلي اذا عايشين راح يشتاقولي
ميكولون بتنة عايشة لو ميتة
أمير.. اكيد يشتاقون بس محد يعلم شنو حالهم
شجون.. تصدك اني مشايفتهم ولا اعرفهم بس اشتاقلهم
أمير.. اعتبريني اني وأحد من اهلج
شجون.. هم راح يجي يوم وتروح ترجع لبغداد وابقى
هنا وحدي
أمير.. منا لحد ماخلص شغلي الف عمامة تنكلب
شجون.. يي صدك
أمير.. هاا نروح
شجون.. يلا
ركبنا السيارة وصلني للسكن وحجة ويه الحارس
والحارس معارض دخلي بدون ميحجي طبيت للغرفة
والبنات استلمني تحقيق شسويتو شكلتو شحجيتو
اني جنت أكلهم محجينة شي يعني مو الة يعرفون
كلشي صار بيناتنة اني بنية احب كلش الخصوصية
ماحب احد يتطفل على حياتي..
وهنا وصلنة لنهاية البارت مو تنسون التصويت شوية
قدرو تعبي ومو تنسون المتابعة وبااي