فتاة الميتم وأحببت مقدم

البارت الرابع عشر

وصلني للسكن وراح طبيت ظليت افكر بكلامة بس
اني اريد اكمل السنة الأولة ورح لبغداد هناك اخلص
بقية السنين كلت ثاني يوم احجي وياه رحت نمت
واني فرحانة لأن أمير طلع صدك يحبني مو بس كلام
كعدت ثاني يوم واني بقمة النشاط والحيوية كمت
سبحت وبدلت ومشطت شعري وتعطرت وطلعت قبل
البنات طلعت من السكن ملكيت أمير تمشيت جان اصادفه بالطريق جاي علية للسكن
أمير.. هاا اليوم الحلو طالع من وكت
شجون.. لا مو من وكت بس حتى الحك عل محاظرة
أمير.. يلا تعالي صعدي خلي اوصلج
شجون.. لا أريد اتمشى
أمير.. تمام لعد خلي اطبك السيارة وانزل
طبك السيارة ونزل ومشينا
شجون.. أمير أريد احجي وياك بموضوع
أمير.. كولي شجوني
شجون.. أمير السنة الدراسية راح تخلص مباقيلها بس
شهرين ونص
أمير.. يي
شجون.. خلي اخلصها هنا وانجح انشاءلله ونروح لبغداد
أمير.. تمام عمري بس ليش هيج متوترة
شجون.. لا مابية شي
أمير.. تمام تخلصين السنة هنا بس لازم نعقد يعني نظل
هيج
شجون.. يي ماعندي مشكلة بالعقد بس أريد اخلص هنا
حتى اروح لبغداد ابدي سنة جديدة
أمير.. تمام هسة مثل متفقنة يوم الخميس نعقد
هزيت راسي بخجل
دأمير.. تروح فدوة عشيرتي هلجمال
وصلني للجامعة وطلع خلصت محاظراتي وطلعت
وصار يوم الخميس ولبست فستان سمائي فاتح كلش
حلو ولارا ولين حطولي مكياج وراحن وياية طلعنة
من السكن جان اشوف أمير كاشخ اخر كشخة وطالع
يخبل تقرب علية راد يبوسني من خدي
دفعتة بخفة ايدي
شجون.. مو هسة
أمير.. شوكت نوصل للسيد
وصلنة للسيد قبل لاندخل انطني البنات جبة وحجاب
وطبينا عقدنا واول مطلعنة البنات هلهلن جنت اتمنى
عندي أهل بهذيج اللحظة بس لارا ولين مقصرن
طلعنة من السيد أمير باسني من خدي
شجون.. أمير شدسوي انتة
أمير.. حلالي شيعجبني اسوي
شجون.. أمير امشي ترى احنة بالسيارة ومنا البنات عيب
لارا.. اخذ راحتك عيني راح نغمض
شجون.. يااا عزه بعينج
أمير.. هههه لا عيني صديقتكم نحيسة
شجون.. اني نحيسة
أمير.. لا اشاقة وياج عمري
عزمنا أمير بمطعم اكلنا واتونسنة ورجعنا طبن البنات
قبلي للسكن دانزل جان أمير يجرني
شجون.. هاا أمير
أمير.. شنو هاا
وغمزلي
شجون.. أمير ديربالك تسوي شي
اني داحجي جان أمير باسني بوسة سطحية
وجهي راد ينفجر معرفت شسوي
شجون.. حقير
وعفتة ونزلت مدري اني حابة هذا الشي مدري ضايجة
منة
من بعد معقدت اني وأمير مقبل بعد اشتغل هوه كام
ينطيني مصرف واشترالي تلفون خلصت السنة ونحجت الحمدلله طلعت درجات اني استحقها وصار
وكت نروح اني وأمير لبغداد حظرت غراضي ومن الصبح اني والبنات وحدة مكابلة الخ ونبجي تعودت
يومية اشوفهم دك علية أمير وكال يلا منتظرج صارلي
ساعة وصلني البنات لباب السكن حظنتهن وصعد السيارة ابجي واشهك
أمير.. شبيج عمري قابل اني وين ماخذج وعندج ارقامهن تكدرين تتواصلين وياهم
شجون.. اتواصل وياهن بس مو مثل ماشوفهن
أمير.. مايخالف عود نفتحلج كامرة
شجون.. تمام
أمير.. الحمدلله اقتنعتي
شغل السيارة أمير وظليت اباوع من الجام لحد مغفيت
ومحسيت بس على صوت أمير يكعدني
أمير.. شجون كعدي يلا وصلنة للبيت
فتحت عيني وباوعت احنة بفرع
شجون.. أمير وصلنة بغداد
أمير.. يي احنة بغداد كومي يلا خلي ننزل
مصدكت من سمعت اني بغداد نزلت من السيارة وعيوني مدمعة لزم ايدي أمير وفتح الباب مال بيت اهله وطبينة من باب المطبخ جانت بس أمة بالمطبخ
أمير راح بأس راس أمة وأمة مصدومة تباوع علية اني
كل ظني هية تدري بية يعني أمير مسولفلها علية
ام أمير.. هاي منو أمير
أمير.. يمه هاي شجون مرتي
اباوع على ام أمير كامت تلطم وتصيح
ام أمير.. عزه العزاك هاي مين جايبلياها لاتعرف أصلها
فصلها شبيها بت خالتك
اني من سمعت هيج مسيطرت على دموعي عفتهم وطلعت برى دافتح الباب جان يلحكني أمير
شجون.. أمير عوفني أريد اروح
أمير.. شجون لاتحكمين عليها بعدج متعرفيها مو قصدها هيج والله
شجون.. أمير عبالي امك تدري بيه ليش مكايلها ليش خليتني اتحمل الموقف
أمير.. شجون شكللها اذا الكها متخليني اطلع من بغداد
تريد تزوجني بت اختها
شجون.. وهسه شنو الحل
لزم ايدي أمير
أمير.. تعالي معليج
طبينا للمطبخ
أمة واكفة مصدومة ومعاجبها الوضع ومطايقتني
أمير.. يمة شجون تعبانة خلي تنام وترتاح ونتفاهم
أمة صافنة وحاطة ايدها على حلكها اخذ غراضي وداني لغرفة اضافية بيتهم يعني محد ينام بيها
أمير.. هاي الغرفة الج لحد منزوج وهسة نامي وارتاحي
وبعدين نتفاهم على كلشي
حط الجنطة مالتي وطلع من الغرفة ظليت افتر بالغرفة
غرفة مال نفر واحد يعني جرباية ام النفر بدلت ملابسي وكعدت اسمع أمير
وأمة يتعاركون كل شوية اكول اطلع لو ابقى هنا بالغرفة ظليت كاعدة واكل باظافيري مادري شسوي
تعبت من التفكير وحطيت راسي ونمت حسيت على
ايد أمير تلامس شعري فتحت عيني
أمير.. يلا حبيبي كومي كافي نوم كومي امي تريد تتعرف عليج
شجون.. امك تريد تتعرف علية
أمير.. يي كومي شبيج متفاجئة
شجون.. بس ابدل ملابسي واجي
أمير.. تمام
عافني وطلع لبست كلابية مال بيت مستورة لأن أمير
اخوانة كاعدين وياهم طلعت لكيت أمير ينتظرني
اخذني للصالة كلهم متجمعين اخوان أمير وزوجاتهم
واخت أمير وأم أمير سلمت على ام أمير احسها تسلم
من وره خشمها يعني شلون اكلكم عبالك وحدة مقنعيها
بشي ومسكتيها واخت أمير مبينة كلش فقيرة اني اكبر
منها بسنة اسمها سهام واخوان أمير هم حبابين سيف
يشتغل مهندس وحسن دكتور باطنية زوجة حسن سلمت علية واستقبلتني وجانت كلش حبابة اسمها
زهراء بس زوجة سيف مبين معاجبها الوضع وتباوعلي
بطرف عينها وسلمت علية من وره خشمها المهم كعدنا
نسولف ويسألوني اخوان أمير شلون وصلت لهاي المرحلة بحياتي واني جنت عايشة بدار وسولفتلهم
وكلش اتونسنة بس ام أمير وزوجة سيف وحدة تباوع
عل لخ وسوين حركات بوجهن قاطعنة أمير يحجي
أمير.. شجون انشاءلله العرس الخميس الجاي
ظليت ساكتة محجيت
أمير.. هاا شكلتي
شجون.. بكيفك
أمير.. تمام لعد الخميس الجاي العرس بس قبل كلشي
باجر لازم نعقد محكمة
شجون.. انشاءلله
زهراء.. بهاي المناسبة الحلوة كومي خلي نسوي كيك
وجاي
سهام.. يي والله
جرني من ايدي واخذني للمطبخ لاكيك ولاشي كعدن
يحققن وياية شلون عرفتي أمير
سولفتلهن اول لقاء وشلون اعترفلي وزهراء كاعدة
تسوي الكيكة وتسمعني وسهام تحظر بالجاي
زهراء.. هذا أمير الثكيل الميتحجة تاليتة اجتي وحدة
سحولتة وراها هههه😂🤣
سهام.. يي والله بس حقة جنها كمر
زهراء.. يي والله صدك حقة عل هلجمال أمير يمكن
ميخليج تطلعن لباب البيت
شجون.. هههه لا مو لهدرجة أمير راح يخليني اكمل
الكلية هنا
زهراء.. لج سهام هالمرة احنة نجهز العروس ونروح وياها
يسولفن بالعرس فرحانات اكثر مني اباوع عليهم وابتسم طلعت الكيكة من الفرن انتظرتها تبرد كاعدين
بالمطبخ جان تطب زوجة سيف باوعت علينة صفح
واندارت فتحت الثلاجة وحجت غير نغلة راح بشغل
وخلتة يجلب بيها صدك نغلة
زهراء تاشرلي اسكت طلعت من المطبخ جان تحجي
زهراء.. معليج بيها ختولي ضايجة منج لأن هية وعمتي
رادو أمير لاختها
شجون.. ليش هية بت خالت أمير
زهراء.. يي شلون عرفتي
شجون.. أمير سولفلي
زهراء.. هاا أمير ميظم شي عليج😉
شجون.. ههه يعني
خلص اليوم بسرعة وياهم بس مرتاحيت لزوجة سيف
وأم أمير بس كلت عادي يمكن مستغربة مني نمت بالغرفة الجوة وراسلني أمير كلي نامي من وكت حتى
الصبح نروح للمحكمة نمت وقتت التلفون كعدت الصبح
غسلت ولبست فستان وسويت ضفيرة راخية ولبست
الحذاء وطلعت كعدت انتظر أمير ينزل وكلهم كاعدين
سيف جان بالشغل وحسن بعده مطالع وزهراء وميار
زوجة حسن ديسون ريوك دنطلع جان نسمع صوت ميار
تصيح بالمطبخ رحنة ركض جان انشوف ام أمير مكعدتها عل كرسي وأم أمير علساس متخربطة
أمير.. شكو شبيج شبيها امي
ميار.. مادري يمكن ضغطها هبط
أمير.. وشكو هلعياط والمبالغة روحي جيبي لبين وملح
جابتلها وكلتها وبعدها متخربطة
من شفت هذا المنظر حسيت بتمثيلة دتصير
أمير.. ميار روحي جيبي جهاز الضغط
ام أمير.. لا ميحتاج صرت احسن
أمير.. لا جيبي حتى نتأكد
فحص ضغطها امير
أمير.. يمة ضغطج طبيعي يمكن تعبانة كومي ارتاحي
بغرفتج
اخذني وطلع وأمة معرفت شتحجي من فحصها بالبداية مجنت اعرف مخططهن بس بعدين افتهمت السالفة...

       وهنا وصلنة لنهاية البارت موتنسون
      التصويت والمتابعة وتصبحون على خير