မြန်မြန်လာခဲ့ဆိုပြီး ပျောက်သွားတဲ့ကောင်လေး။ လူကိုမြင်တာနဲ့ ရှောင်ရှောင်ထွက်နေလို့ တနေ့လယ်လုံးမျက်နှာချင်းပင်မဆိုင်ရပေ။ အခု အခန်းပြန်ဖို့ ရှာတော့လည်းမတွေ့။
ရုံက မကျေနပ်တာရှိရင် အမြဲတမ်းပွင့်ပွင့်လင်းလင်းပြောကာ ဖြေရှင်းနေကျ။ဒီအချက်ကို မကြိုက်ဘူး ငါစိတ်ဆိုးတယ်ဆိုပြီး သူစိတ်ဆိုးစိတ်ကောက်နေကြောင်းကို ဆက်မာန်ဟိန်းဆီ တကူးတကပြောပြီး အချော့ခံနေကျ။ဒီလိုရှောင်ဖယ်ပုန်းပြီး စိတ်ကောက်တယ်ဆိုတာ ဒါပထမဦးဆုံးအကြိမ်ပင်။ ပုံမှန်လည်း ရုံကို အလျှော့ပေးနေကျ၊ချော့နေကျဆိုပေမဲ့ အခုလိုစိတ်ကောက်တာကို ချော့ရမှာကပထမဆုံးအကြိမ်ဖြစ်တာမလို့ စိတ်ပင်လှုပ်ရှားနေသယောင်။
အခန်းဆီရောက်တော့ ရုံက သူ့ကုတင်ပေါ်မှာလှဲနေသည်။ ဆပ်ပြာနံ့သင်းသင်းလေးက ရုံ ရေချိုးပြီးကြောင်းကို ဖော်ပြနေသည်။
" နေမကောင်းဘူးလား ရုံ "
အနားသွားကာ နဖူးလေးကို စမ်းတော့ တဖက်ကိုလှည့်သွားသည်။ ဒီအေးစက်နေတဲ့အခြေအနေကို ပြန်နွေးထွေးလာအောင် ဘယ်လိုကြိုးစားရပါ့မလဲ။
" မောင် ကြက်ကြော်ဝယ်လာတယ် "
မှိတ်ထားတဲ့စေတနာရုံမျက်ခွံလေးတွေက လှုပ်လီလှုပ်လဲ့။ မနေ့ညက ကြက်ကြော်စားချင်တယ်လို့ တိုးတိုးလေးရေရွတ်လိုက်တာကို မောင် ကြားသွားတာလား။
" မုန့်ဆိုင်တွေက အစောကြီးပိတ်သွားတယ် ရုံ မောင် မနက်ဖြန်မှ ချောကလက်ပေါက်ပေါက်ဝယ်ကျွေးမယ်နော် "
ရုံ ဘာမှပြန်မဖြေဘဲ တိတ်တိတ်လေးသာငြိမ်နေလိုက်သည်။ အတော်အတန်ကြာသည်အထိ မောင့်ဆီမှ မည်သည့်စကားတစ်ခွန်းမှထွက်မလာခဲ့တော့။
ခနအကြာမှာ မောင်ရေချိုးခန်းထဲဝင်သွားသံကြားလိုက်သည်။ဘေစင်ကရေကျသံကိုကြားနေရသည်။ ရေချိုးခန်းတံခါးဖွင့်သံကြောင့်အလျင်အမြန်မျက်လုံးပြန်မှိတ်လိုက်သည်။
ထမင်းအိုးကိုယူလိုက်သံ ဆန်ဆေးသံ ထမင်းအိုးတည်သံတွေကိုတဂျောက်ဂျောက်နှင့်ကြားနေရသည်။ အသံတွေငြိမ်သွားသည့်နောက်မှာ ရုံဘေးကမောင့်ကုတင်မှာ မောင်ဝင်ထိုင်လိုက်တာကိုခံစားလိုက်ရသည်။ အခန်းငယ်ထဲစကားသံတွေပျောက်ဆုံးလျက်။ ဒါဘယ်လိုအခြေအနေကြီးလဲ။ မောင်က ရုံ့ကို မချော့ဘူးလား။
YOU ARE READING
" စေတနာရုံ ခြုံကာလွှမ်းလို့ မောင့်မေတ္တာဝေ"
Romance🤍 In a relationship with Mg's Saydanaryone Start Date - 3. 8. 2021 End Date - 6.11.2022
