يا صُدفتي النادرة وياهلاك البشر

Part 5

-
على آذان العصر .. بـ قرية " آل ثايب "

وقف سيارته قدام البوابة الضخمة الي توضح ان فيه طريق طويل للدخول للقرية و اللوحة الي ترحب بالجميع بالدخول ..
رفع طرف شماغه على راسه وكمل طريقه مشي وهو جاهل الطرق ، ولكن مشى بالطريق الوحيد لأنه الأكيد للدخول ، ارتاح نسبيًا اول ما بدا يسمع البعبعة وهذا يدل انه مادخل بمكان خاطئ ، اهو الآن ولأول مره بحياته يكون داخل قرية العدو ..
ليلة امس راودته افكار عجزت تخليه ينام ، والنار الي بجوفه ما يطفيه الا رد اعتبار للي سوته فيه قدام العشـرات و العشـرات!!
تنحنح بهدوء اول ما لمحه : اخوي لو سمحت
لف عليه ببتسامة : ياهلا امرني
وضاح في محاولة اخفاء ارتباكه : بيت فالح وينه؟
ناظره بستغراب : جديد انت هنا؟
وضاح ابتسم بتصريفه : ايه اني كنت برا الديار لسنين وتوني جاي ، وجاي ازور قريبي
تكلم الرجل المسن بتعب : والله ياولدي فيه كم فالح هنا ماتعرف وش العايلة؟
وضاح بجمود : آل ثايب
ابتسم له : عليـك نور! بس ياولدي فالح ماهو من السكان هنا ولكن ابوه وامه واخوه الصغير هنا وابد بيتهم بجوف القرية
وضاح ابتسم : وين يا عم وش بيخليني القاه دامه بجوف القرية!
ضحك عليه وهز راسه : ولا يهمك ولا يهمك
ابعد عنه كم خطوة وبدا ينادي احد اطفال القرية ، وجاه يركض : اخذ خالك لبـيت العم سلطان ابو فالح
الطفل ببتسامة حماس : يلا ياخالي امش معي
شد قبضة يده من بشاشة اهل هالقرية ، وكيف ماكان فيه استفسارات لوجود هالغريب بينهم وكأنهم متعودين !..
مشى لمسافة ماهي قصيرة ، وكانت متعبة بالنسبه له ..ممكن لأن القرية كبيرة و هو ماتعود بالمشي فيها بعكس قريته المُحبة؟
الطفل أشر على الباب الأزرق وبجانبه شجرة مثمرة وبجانبها زهور مُزينة الجدار : هذا اهو بيت ابو فالح
وضاح ربت على كتفه : ماتقصر
ضرب صدره بخفه وتكلم بغرور : ابد بالخدمة
كان بيمشي ومسكه وطلع له فلوس ودسها بمخبى ثوبه : هذي هديتي لك
ابتسم له بفرحة : مشكور جعل عمرك طويل يا خال
ودعه ومشى عنه ، و وقف قبال الباب واخذ نفس عميق ولف على طول على الصوت ..
هزاع بستغراب : ياهلا
وضاح بسرعة : ياهلا فيك
بدأ مألوف له نوعًا ما بس مو قادر يصيد وين شايفه : بغيت شي اخوي؟
وضاح ابتسم : ابد بس جاي لأبو فالح
هزاع هز راسه بهدوء : ابد اقلط
فتح الباب بمفتاحه ، وأكد له ان هالشخص من اهل البيت وبدا يرفع صوته : ياولد درب درب
دخل ودخل وراه وضاح ودخلوا المجلس على طول ..
هزاع : دقايق بس واناديه لك
طلع برا وهو يسمعه ينادي المُلقبه بـ خلود تسوي القهوة والشاهي ..
مسح على وجهه بتوتر ، ما يدري ليش جاي! اهو يبيها اهي والحين بيبتلش بكبير السن ..
دخل وسرعان ما تلاشت ابتسامته اول ماشافه ..
وقف وباس راسه احترامًا لتقدم سنه ..
ابو فالح بهدوء غريب : عسى ماشر فيه حكي بعد ينقال؟
هزاع ناظرهم بستغراب وكان وده يسمع الباقي ولكن مناداة خلود له استوقفته وطلعته لجلب القهوة والشاهي للرجال ..
وضاح بستغلال لفرصة خروجه : ياعم يشهد الله ماجيت للمشاكل ولكن بنتك امس رجعت وسببت مشاكل وهذا انا الي قايلك فكني من شرها!
ابو فالح بحدة : انت عارف وش تقول! حفيدتي امس كانت حولي عند بنت عمها ماطلعت برا القرية
وضاح شدت اعصابه : ماجيت الفق تهم هنا! لو ما انت مصدق عندك التجار بالسوق تقدر تروح وتسألهم عن الي صار
ابو فالح وعيونه على هزاع الي دخل وصرف الموضوع على طول ، يعرف هزاع ويعرف طبايعه حتى لو ان هالشخص صادق مستحيل يسكت له بيدفنه وهو حي : ايه ماعليه كلها كم يوم ونخلص ان شاء الله
ناظره مستغرب لوهله و بعدها استوعب ان مايبي هالشخص يعرف بألي صار ، فقرر السكوت ومجاراته بالكلام ..
سالفة تجر سالفة لحد ما التفت ابو فالح بهدوء : هزاع وانا ابوك خلني مع الرجال شوي
هزاع وقف بسرعه : ابشر
طلع وسكر الباب وراه ..
ابو فالح : والمختصر جيتك هنا لأيش؟
وضاح عدل ترسيمة شماغه : البنت تقضب ارضها وماتتعدى حدودها معي
ابو فالح تنهد بتعب : بنت ولدي هذي قشرا مالقيت الا تطيح بيدها؟
وضاح بحدة : ان كانت قشرا فما تهون عني بس البنت يا عم لازم تكون محترمة حالها وتخاف على سمعة اهلها وماتسو..
رفع يده امام وجهه وتكلم بحدة : مهما سوت تبقى بنت ولدي ولا ارضى عليها بكلام مثل هالنوع يا ولد "آل هازع " وانت اكيد عندك نسوان ماترضى عليهم
وضاح شد يده من العصبية : نسواني مايطلعون من الديار من دون اذني
ابو فالح : كأنك بديت تغلط يا وضاح؟
تنهد ليهدئ نفسه وهز راسه بهدوء : اعتذر
ابو فالح بنبرة هادية غريبة : اشرب قهوتك
ترك فنجاله و وقف على طول : تسلم وماقصرت وان شاء الله اخر الجيات ، وما اجيك اشتكيك
ابو فالح بحدة : على خير
طلع بسرعة تحت صوت اطلاق النار ..
دخل هزاع وسكر الباب وناظر جده : بدوا الهبال عيال القرية
ابو فالح كشر بغضب : الله يمحقهم قل امين
هزاع بضحكة : امين
وضاح تنحنح واتجهه للباب : عن اذنكم
هزاع بسرعة : وين وين! ماتسمع النار
وضاح بستغراب : الا اسمعه ولكن وش يدل؟
هزاع ناظر لجده بشك : يا جد هالرجال غريب على القرية؟
ابو فالح تجاهل سؤاله وناظره : ابقى هالكم ساعة يا وضاح وبعدها اطلع
وضاح بستغراب : ليه؟
ابو فالح بهدوء : عائلتين هنا مستقعدين لبعض وان كان فيه طلق نار فهو يدل على عراكهم ..احفظ روحك بجلستك هنا ولا تطلع وتتأذى
وضاح ببرود : لا ماتقصرون والله ..انا مشغول
طلع بسرعة وسكر الباب خلفه ..
هزاع التفت لجده : هذا وجهي ان ماكان غريب على ديارنا
ابو فالح : وان كان غريب بتطرده؟
هزاع : لا! بس موب صاحي يسمع النار ويروح له على رجوله
ابو فالح بملل : ملزوم بنفسه مالنا دخل فيه
هزاع تقدم لجده ومسكه من يده : امش امش نتقهوى عند معشوقتك
ابو فالح ابتسم : يازين طاريها
هزاع ممازح له : اخص والله شيبان اخر زمن يحبون بعد!
ابو فالح تنهد براحة : بلاك ما جربت الحُب يا هزاع ولا ماتلومني بحب جدتك
هزاع رفع يده للسماء : يالله عقبال ماتجيني المره السنعة مثل جدتي و تحببني بها مثل حبك لجدتي
ابو فالح بضحكة : اللهم امين
بشوارع القرية ..
بكل مره يقرب للبوابة الأصوات تعلى ، وسيارات الشرطة ملتمه حول المكان وصوت المكبرات يسمعها الكل ..
وضاح بملل : داخل حلبة مصارعة مو قرية
رجعت اصوات الطلقات النارية ، و وقف من المشي يحاول يتخبى مع الأشخاص الي بدوا يندسون بكل مكان ..ولكن سرعان ما صرخ طريح الأرض ومسك جنبه وتلوى بالأرض بألم ..
ماحس الا انه انسحب تحت طاولة كبيرة وضغط على جرحه بقوة : ياولد وش بك صاحي انت تسمعني؟؟
وضاح صرخ بألم : جنبي جنبي!!!
قلبه للناحية الثانية وشهق و ارتفع صوته : يا شــرطــة! فيه مصاب هنا
صرخ الرجل المسن : هذا من اهل سلطان ابو فالح
تقدم له اثنين من الشرطة ..و كان هذا اخر شي يتذكره !
-
بعد ساعات طويــلة بالطيارة ، على اراضي كوريا تحديدًا ..