يا صُدفتي النادرة وياهلاك البشر

Part 7

بعد ساعات طويلـة ، بالمطار ..

ركبت السيارة اخر وحده بعد مارتبت شنطتها بشنطة السيارة ..
نوف ناظرتها : سنة
الجازي بهدوء : تكفين فكيني من لسانك من وانتي بالطيارة تناقرين
كانت تسوي هالشي لأجل تغير من مزاجها لأنها ماوقفت بكاء ابدًا من بعد ماشافت حال امها وتركتها ..
نوف بهدوء : اسوي كذا من هالدموع الي نشفت
الجازي خنقتها العبرة : ماشفتي كيف شكلها! والله ما يطمن
نوف بأسى : طبيعي الي فيها ماهو سهل بس امي قوية وبتقدر تتغلبه
قاطعهم ذيب الي وقف وتقدم لهزاع : شغل اغنية
الجازي سحبته وجلسته وتكلمت بتعب : اقعد لا يسحب فرامل وتطير قدام
ذيب بملل : انتي و خالتي من الطيارة تتهاوشون طفشتوني!
نوف كشرت : سد اذانك يالقزم
الجازي بحدة : نويف! لا تقولين عنه كذا
ضحكت وناظرتها : يابنتي خليه يرد ! خليه يدافع عن نفسه لا تنقزين انتي وتردين بداله
ذيب بستفزاز : انا و امي واحد
نوف خزته وناظرت لهزاع : ياولد العم ودي بشي
هزاع بهدوء : وش؟
نوف تكلمت بستغراب : وش عندك من ركبنا ما حارشت الجازي!
الجازي ناظرتها بسرعة و واضح عليها العصبية ..
هزاع بملل : ذا الي ودك فيه؟
نوف ابتسمت : لا بس استغربت ، الي ودي فيه توقف عند بقالة قبل ندخل خط القرية
هزاع تنهد بملل : طيب
ذيب نقز بفرحه : ياسـلام!
الجازي بحدة : مافيه حلويات من الحين اقولك
ذيب ناظرها بزعل : ليه؟ كل شي حارمتني منه
الجازي تكلمت بنبرة قاسيه على غير عادتها : مو اذا منعتك من شي جحدت الباقي ! استح على وجهك
تكتف بزعل وعبوس وحضنته نوف وهمست بأذنه : بشتري لك ماعليك
سمع نبرتها له و واضح انها مو طايقه شي من اسلوبها مع الكل ، حتى لما كانوا بالمطار ماناظرت فيه و ولدها طول الوقت كانت نوف ماسكته ، شي غريب بالنسبة له لأنه يشوف هالأنسانه متعلقه بطفلها بشكل كبيـر ..بس واضح الموضوع الي تفكر فيه مزعلها !..
نزلوا للبقالة لدقائق معدودة ورجع يركب السيارة لأخذ محفظته وسمع جزء من المحادثة الي واضح انها تكلم احد بجوالها " اتصل علي يبي ذيب "
وسرعان ما سكتت اول ما استوعبت انه ركب مكانه..
هزاع من دون لا يناظرها : تبين شي قبل نمشي؟
الجازي نزلت جوالها بهدوء : لا ما ابي ، بس قول لنوف وذيب يجون بسرعة
نزل من السيارة ورجعت تكلم والدها ..
ابو الجازي : ورا ماعلمتيني يوم انك عندي؟
الجازي بتعب : اول ما نزلت من الطيارة لقيته متصل ..وش الحل يبه؟
ابو الجازي تنهد : انا بكلمه و اشوف وش وضعه و ارد لك خبر
عيونها على الي جو متجهيين للسيارة وتكلمت بسرعة : طيب يا حبيبي انتبه لنفسك
سكرت منه وعدلت برقعها وعيونها على اغراض ولدها الي جلس جنبها : زين تسمع الكلام
ذيب ابتسم لأن حلوياته مع نوف : ايه اسمع الكلام انا
هزاع : خلاص ماعاد تبون شي؟
نوف بسرعة : لا يلا نرجع للبيت عظامي تفتت من هالمراتب
هزاع بهدوء : طيب
-
بـ قرية " آل هازع "

تركت سجادتها بعد انتهائها من صلاة العشاء ، ومسحت على وجها بهدوء : الحمدلله
طوت سجادتها بسرعة وطلعت لبرا ..
ام وضاح بحرص : اخوك وينه غاطس! علمني يا رواف ان كانك مخبي شي ياويلك
رواف بذهول : وانا وش دخلني! لو ادري عن مكانه ماكان اتعبت نفسي وفريت القرية كلها عليه
عزوف جلست جنبها ومسكت يدها بحنان : يمه الله يهداك قالك اهو وينه وقالك بيجيك بكره خلاص عاد لا تعندين!
ام وضاح بتعب : والله اخوتس ماهو بخير قلبي ناغزني انا
عزوف بصدمة : اعوذ بالله! لا تتفاولين عليه وصدقيني بكره بيجي باذن الله وقولي عزوف ماقالت
ام وضاح بغضب : بكره لو ما اشوفه قدام عيوني اني لا اروح ابلغ عنه ضايع يسحبونه لي غصب
رواف ابتسم : ابد ولا يهمك انا بنفسي الي بوديك للشرطة وتهاوشي معهم بعد لو تبين
ام وضاح : ليه تبيني انمسك؟
رواف بضحكة : افا من لنا غيرك! بس دامك معصبه قلت تطلعين حرتك فيهم
ام وضاح ابتسمت ولكن بالها مشغول عليه من اختفائه امس و اليوم ..
-
بـ قرية " آل ثايب"
واخيرًا وصلوا حفيدات الجد و الجدة ..