Kristine Series 06: Kapirasong Papel

Chapter Eight

ILANG araw makalipas ay nagbalik ng Maynila si Aura. Isinubsob niya ang sarili sa trabaho gaya ng dati upang huwag magkaroon ng puwang sa isipan niya ang mga alaala ni Miguel.

Subalit kung gabi na'y inaatake siya ng pangungulila.

Naitanong niya sa sarili kung bakit nga ba ayaw niyang tanggapin ang alok na kasal ni Miguel pagkatapos na may mamagitan sa kanila?

At humantong siya sa conclusion na hanggang ngayo'y hindi pa rin niya kayang magtiwala sa mga lalaki pagkatapos ng panlolokong ginawa sa kanya ni Clark. Natatakot siyang muling magmahal at sa bandang huli'y mabigo.

Isang linggo na ang nakakalipas nang makatanggap siya ng tawag mula kay Krizelda. Kinukumusta siya nito, at sinasabing nasa mabuti na ang kalagayan.

"Aura..."

"Yes, Krizel? May sasabihin ka ba?"

"M-may sinabi sa akin si Miguel tungkol sa inyong dalawa."

Napipilan siya.

Nagpatuloy ang nasa kabilang linya. "H-hindi ko alam kung bakit ayaw mong tanggapin ang alok niya."

"Alam ko kung ano ang dapat, Krizelda."

"But it's not right, Aura!"

"And what is right, Krizelda? Ang muling magpaloko?" Napapikit siya. Hindi ba't nang may mamagitan sa kanila ni Miguel ay nagpaloko na siya? "I'm sorry, Krizel, pero hindi ako maaaring makipag-usap sa iyo nang matagal. Marami pa akong gagawin."

"All right, but listen to me first. Maligaya ako ngayon dahil sa tulong mo. And I want to see you happy, too."

"I am happy."

"No, you're not. And don't lie to me. Bye."

"Bye."

Nanlulumong napasandal sa executive chair si Aura matapos ibaba ang telepono. Parang sasakit ang ulo niya sa tuwing maiisip si Miguel.

Pumasok pa ang sekretarya niyang si Inez at nagpalista ng kanyang mga appointments. "You have a dinner meeting with Mr. Zeneroza at 7 o'clock this evening, Miss Fortalejo. And at 8:00, with Mr. Lee, 9:30 with Mrs. Schultz and—"

Pinutol niya ang pagsasalita ni Inez sa pamamagitan ng pagtataas ng isang kamay.

"Cancel all my appointments, Inez, I'm not feeling well."

Si Inez, na noon lamang naringgan na nagpapakansela ng appointment ang lady boss ay takang-taka.

"What's the matter?" napakunot-noong tanong niya nang makita ang reaksyon nito.

"Well— ah... I'm just surprised, Miss Fortalejo. This is the first time that you cancel your appointments."

"And this is the first time that I am not feeling well, Inez. Nakapagtataka nga dahil katatapos lang ng bakasyon ko."

"Maybe you need another vacation. I mean an out-of-the-country vacation."

"That won't be necessary." Tumayo siya sa kinauupuan at dinampot ang shoulder bag. "See you tomorrow, Inez."

"See you tomorrow, Miss Fortalejo."

NAGPAHATID si Aura sa Aurora Condominium nang bigla na lamang maisipang silipin ang unit na iniregalo ni Aurora kina Gabriel at Krizelda. Inookupa ng unit ang kabuuan ng 24th floor at kasunod noo'y ang penthouse na.

Walang tao sa penthouse na pag-aari ng kapatid na si Ismael kundi ang butler sapagka't kasalukuyan itong nasa ibang bansa.

Binati siya ng mga empleyadong nadatnan sa ground floor ng condominium.