Nagparaya (NagpaSeries #2)

Ngprya 13

Ngprya 13 // Special Gift | KKK

Nakakamangha ang Manila - lalo na ang Makati kung saan nakatayo ang condo nila Eddard Vane. Sa 43rd floor, kitang-kita ko ang lahat na para bang ako ang reyna ng mundo. Madaling araw na pero kahit pagod galing sa gig concert, gustong-gusto ko pa rin makita ang mumunting ilaw sa iba't ibang bahagi ng lugar.

Ito pala ang city lights. Ito pala ang night life. Ganito pala sa Makati.

"Sana ako na lang tinititigan mo nang ganyan."

Nilingon ko siya na nakaupo sa mahabang sofa ng sala ng condo. Kakalabas lang niya sa CR, medyo basa pa ang buhok. Nakasimpleng pambahay siya na shirt at shorts, na parang pinahiram niya sa akin.

Gusto nga niyang shirt na lang daw ang ipahiram pero pinilit kong pati shorts na rin. Boxers ang pinahiram niya at na-amaze ako dahil kasya sa akin ang boxers na sinusuot niya no'ng bata siya.

"Ang ganda kasi talaga," natutuwa kong sabi.

Sinenyasan niya akong lumapit sa kanya. Ako naman si uto-uto ay lumapit at naupo sa gilid ng sofa. Tumawa siya, tiningnan ang malaking space sa gitna namin bago lumapit sa akin at siniksik ako sa gilid.

"May tanong ako."

"Interesado ka na talaga sa akin?" tanong niya dahilan para manlaki ang mata ko kasabay ng pag-init ng pisngi ko. Tumawa siya at hinawakan ang ulo ko. "Joke. Anong tanong mo?"

Nakikiliti ako sa pagmasahe niya sa ulo ko pero hinayaan ko na. "Taga dito ka talaga. . . pero bakit sa probinsiya ka nag-aaral?"

"My dad wants me to study there. Para raw maging mas matino ako," nakangisi niyang sagot. "Hindi ata niya alam na iba rin mag-isip ang mga nasa probinsiya."

"Hindi ka ba matino?"

Nagkatitigan kami sa tanong kong 'yon. May kung ano akong napapansin sa mga mata niya na hindi ko mawari dahil sa dilim na rin. Nagpigil ako ng hininga nang mapansin kong palapit nang palapit ang mukha niya sa akin. Nakailang kurap ako bago siya tumigil sa ilang pulgadang layo saka ngumiti.

Pinindot niya ang ilong ko bago siya tumayo. Tumingala ako para makita siya nang mabuti.

"Mukha ba akong hindi matino?"

Ngumiti ako. "Medyo bad boy."

Tumaas ang kilay niya saka natawa. "Chicks dig bad boys, right?"

"Siguro."

Kumunot ang noo niya. Hinawakan niya ang kamay ko at hinatak patayo. Nagpabigat pa ako pero kiniliti na niya ako kaya napatayo ako nang maayos, halos magtama ang katawan namin sa isa't isa.

Kung nakikita siguro ako ni Auntie, baka kagalitan niya ako at hampasin ng hanger dahil nasa condo ako kasama ang isang lalaki. Kung matino akong babae, hindi ako sasama kay Eddard in the first place.

Pero kahit sa logical thinking ko, gustong-gusto kong sumama kay Eddard. Kahit saan. Kahit kaming dalawa lang sa madilim na condo, nang madaling araw ng August 8.

"Siguro lang? You don't dig bad boys?"

Ngumiti ako. "Sakto lang."

Ngumuso siya habang titig na titig sa akin. "Anong mas gusto mo?"

Naiilang na ako sa titig ng malalim niyang mata pero hindi ko magawang iiwas ang tingin ko. Dahil kapag iniwas ko ang titig ko sa kanya, parang hindi ko kakayanin. Babalik at babalik ako sa pakikipagtitigan sa kanya.

Napansin ko ang pagngiti niya nang napahigpit ang hawak ko sa kamay niya.

Mula sa mga mata ko, bumaba ang tingin niya sa labi ko. Sa simpleng tingin na 'yon ay halos sumabog ang puso ko sa kaba.