-THAT MAN- [Complete]

Episode 5 ✓

Unicode ✅

-THAT MAN-

ဂျီမင် ကိုယ်တိုင်လိုက်ပြီး ရွေးပေးထားသည့် ဆိုင်ကယ်လေးအား Suga အတော်လေး သဘောတွေ့နေရှာသည်။ ဂျီမင်ကပဲ အမြင်ရှိလေသလား။ ဆိုင်ကယ်တွေ အများကြီးထဲမှာမှ Suga ကြိုက်တဲ့ အနက်ရောင်ကိုသာ ရွေးပေးတဲ့အပြင် စမ်းစီးကြည့်တော့လည်း သူကိုယ်တိုင် အနောက်ကနေ ထိုင်လိုက်ပြီး အကဲခတ်ပေးတာမို့ Suga တစ်ယောက် ဒီနေ့တော့ ထီပေါက်သလိုပါပင်။

ဆိုင်ကယ်လေးအား ဝယ်ပြီးချိန်မှာလည်း နှစ်ယောက်သား အတူတူ မြို့ပြင်ဘက်သို့ ပတ်စီးဖြစ်ကြသေးသည်။ ပုံမှန်ဆိုရင် ဂျီမင်အနေနဲ့က Suga အပေါ် ဒီလောက်ထိ အလိုလိုက်တာမျိုး မရှိသော်လည်း သူ့စကား တစ်ခွန်းကြောင့် ဆိုင်ကယ်အားရောင်းပြစ်လိုက်သည့် Suga အပေါ် အားနာစိတ်ကလေး ခံနေတာကြောင့် ဒီနေ့တော့ Suga အားအလိုလိုက်ပေးနေမိ၏။

မြို့ပြင်ဖြစ်သည်မို့ တစ်လမ်းလုံး ခရီးသွား ကားတွေလောက်သာရှိပြီး လမ်းကြောင်းက ‌အတော်လေး ရှင်းလင်းလှသည်။ Suga ကတော့ သူမှာထားသည့်အတိုင်း ဆိုင်ကယ်အား ခပ်‌ဖြေးဖြေးသာ မောင်းနေကာ သူ့ကိုလည်း မကြာခဏ စကားလှည့်ပြောသေး၏။

“စုံထောက်ပတ်ခ်”

“ကျွန်တော် နားထောင်နေတယ်”

“ဗိုက်ဆာနေပြီလား”

အနောက်သို့လှည့်ကာ မျက်နှာချင်း နီးကပ်နေသည့် အနေအထားနှင့် Suga မေးလေတော့ ဂျီမင်မျက်နှာ အနည်းငယ် ဆူပုတ်သွားလေသည်။

ဘာကြောင့်ဆို တနေကုန် အလိုလိုက်ပြီး ဆိုင်ကယ်တစ်စီးနဲ့ လျှောက်သွားနေတာ သူဗိုက်မဆာဘဲ နေပါ့မလား။ ပြီးတော့ ဒီနေ့တစ်ရက်အတွက် သူ့အလုပ်တွေလည်း အကုန်ဖျက်ထားရတာ မဟုတ်လား။

“ဟားဟား တကယ်ဗိုက်ဆာနေတာပဲ ခင်ဗျား မျက်နှာ ဆူပုတ်နေတာလေး သိပ်ချစ်ဖို့ကောင်းတာပဲ Little Park”

“ကျွန်တော် မပြောလည်း လူကြီးမင်း သိရမှာပေါ့”

“ဟောဗျာ မပြောဘဲ ကိုယ်ကဘယ်လိုလုပ်သိမှာလဲ”

Suga မျက်နှာခပ်ပြုံးပြုံးနဲ့ မေးလေတော့ ဂျီမင်သည် မသိမသာ မျက်စောင်းလှလှလေးထိုးကာ မျက်နှာ တစ်ဖက်သို့လှည့်သွားသည်။ ဒါကို မြင်ဖြစ်အောင် မြင်လိုက်သည့် Suga မှာတော့ ခပ်ဟဟသာရယ်မောရင်း ဆိုင်ကယ်အား နောက်ပြန်လှည့်ဖို့ ပြင်တော့၏။