محلة نجيب باشا

البارت 44

محلة نجيب باشا

بقلمي عطر الياسمين🌸🖤

البارت 44

_____________

الفتيله التي ضمتها الشمعه طويلاً
هي التي احرقتها !!
اوجع احتراق هو الذي يأتيك ممن كُنتَ تضُمَّه ..!

_____________

ميسم ..

ماما كلش تأذت ورا اللي صار بابا من اجه و شافها تبجي و مقهوره سأل شنو صاير كعدت حجتله كل شي هز راسه

و كال .. هو اخوج ترى من زمان يركض ورا حجاية مرته عبالك طفل شتكول هو يكول اي صح هاهيه اللي يريد يروح خل يروح لا تضوجين و لا تنقهرين

جنت اباوع عليه يحاول ينسيها بس هو مبين شكد مقهور و متأذي

حسام فات شافها تبجي و بابا يهون عليها كال .. شكو شبيكم ؟!
ردت ماما .. ماكو شي
- لعد ليش تبجين

بابا حجاله اللي صار
عكد حواجبه و حجى بعصبيه .. و هو جاي مناك لهنا حتى يتهمنه بايكين بيته ؟!
ما خجل من نفسه من حجاها ؟!!
ولو كلمن يشوف الناس بعين طبعه
جان ذكرتي باللي اخذو و خل نشوف هذاك الوكت منو اللي اله يم منو

رد بابا .. كافي ابني سد الموضوع
- لا ما اسده ليش ما ذكرته باللي اخذه هو
اخاف نسى شلون احتال على بيبي و قشمرها خلاها تروح تحول حصتها من البيت بأسمه هو و خالو فارس و حرمو امي و خالتي ؟!!

نسى شلون بهذل امه تالي عمرها و مرته صارت تتشمخر عليها و تطردها لأن صدكت بروحها هذا بيتها و بيبي حمل ثكيل عليها ؟!!

التفت على ماما و كمل .. بس هو كله من ايدج تدرين لو لا اللي عامل امج هيج شلون تبقين تضحكين بوجها و تفوتي لبيتج بس فهميني

ردت ماما .. صارت بوكتها ساعة شيطان و غلطو بس يبقون اخواني
- هاا ساعة شيطان كلتيلي و انعام ؟!! هم اختج ؟!!

- يا ابني لأجل عين الف عين تكرم و اني هم جنت اخذ منها موقف من تتجاوز على امي و اكثر من مره صارت مشكله بيني و بينها لأن فزعت لأمي و حتى طردتها من بيتي اكثر من مره بس من تجي تعتذر و تبجي مقهوره مني ما اكدر اردها والله ما اكدر

هم لخاطر اخويه و هم ما اعرف احقد على بشر يمكن ما تصدكني بس هاي الحقيقه والله ما اعرف اشيل بكلبي على احد و اني ما بقالي من اهلي غير ناصر جنت اشوفه سند و ظهر الي تالي كسرني هيج كسره و محى كل شي حلو بلحظه

انعام صح اذت امي بس اني ما جنت اسكتلها و بالمقابل عدها مواقف ويايه توكف بعيني و ما اكدر اتجاوزها اني اختي بعيده عليه و هي صارت بمكانها بكل مناسبه و تفصيله تمر بحياتي هي اول وحده توكفلي

- توكفلج مو لسواد عيونج جانت مستفاده منج و الدليل هسه ابويه من وكف شغله و باع سيارته و وضعنا المادي تغير و ما صار مثل قبل طلعت وجهها الحقيقي بالمقابل خالي رجع لوظيفته و راتبه خير من الله شتسوي بيج بعد ؟!!