تحت مسمى القسمه والنصيب

البارت التاسع والعشرون

#تحت_مسمى_القسمه_والنصيب

لـ الكـاتِبه حَــوُراء آلـ طائـي

يا مِفتاح رُوحي ،
والسِوالـف بيّڪ تِحلىٰ
والهوىٰ يمُرني ويِرطبني هبوبك
يا نِدىٰ الغُبشة
يا خُطار عيني ، ها كِثر موجود !
ومن رِمش لـ رِمش بعيَوني تتمشىٰ

-----------------------------------------

اديــان "

-اني اعرف ماراح اسلم من شرهم وراح يسوون شي يكسروني بي حاولت اتجنب امي ومااحاچيها هوايي وهو بالاساس اني مااحچي وياها وشبه مقطوعه عنها بس من تسألني ارد عليها بـ اي او لا ،لااكثر لحد ما ورا الصار چنت عايفه ايه بالبيت واني اروح للمعهد الي سجلني بي خالو ابو لمار قبل لايتوفى ودفع كل فلوسه بس رجعت چان البيت فارغ دخلت اصيح بـ اسم ايه

اجاني صوتها بَس واضح چانت تبچي هي هسه عمرها سنه ونص تقريباً وحافظتها حفظ كل تحركاتها وتصرفاتها ابتسمت بوجهها وشلتها طلعت الحلويات الجبتهن الها بس هل مره مو مثل كل مره مافرحت بيهن بس اخذتهن من ايدي وراحت للغرفه مشيت وراها شفتها خلتهن على الميز مالت الچربايه وراحت نامت استغربت وضعها خاف اني مزعلتها بس لا والله مامحاچيتها

رحتلها: توته الحلوه شبيها

ماردت انمردت روحي وانقهرت لحد ما انگلبت وشفت تيشيرتها انرفع وبصفحتها اكو اثر احمرار چبير ركضتلها اگلب بيها بفزع وهي خافت وضلت تبچي حاولت اهديها واعرف شبيها مبين الاثر جديد بس سكتت گالت والشهگه بعدها بيها: زعلتي مني

رغم عمرها صغير بس كلماتها واضحه ومفهومه

-ليش انتِ شمسويه وازعل منچ

حچيتها امثل العصبيه بس اني ارجف من الخوف: ماسويت شي والله هو سوه

بس حچتها النفس ضاق بصدري و اول واحد اجه ببالي هذاك العار

حاولت مااخوفها واستدرجها بالكلام وصوتي بي رجفه واضحه

-منو سوه حبيبتي على منو دتحچين

بچت اكثر وترجف خفت عليها حضنتها اهدي بيها لحد ما سكتت وبس سكتت گالت بخوف: احچيلچ بس لاتزعلين مني

-احچي امي ماازعل والله

-هذا الولد الچبير اجه اليوم

-منو ياولد؟
-هذا الحچيتي ويا ذاك اليوم وصيحتي عليه

مثل ماچنت مفكره هو ايي هو ردتها تسكت خايفه اسمع غير شي بس ضروري اعرف شسوالها