نجمة نجمتي ( جمان فريد) منقولة

الجزء سادس والثلاثون

#نجمه_نجمتي

#جمان_فريد

الجزء 36 💔
هدي ياصاحبي المهم قلتها وارتحت
شاهين: بالعكس زدت خفت ردت فعلها خوفتني
طارق: اسمع مني مادام هيا ماقالت شي وهربت منك معناها في قلبها حاجه يالاك...
شاهين قعد يفكر..
...
نجمه : امي شفتي بشرى
بريكه : ايه عمتك شافتها راقدة
منى : حتى اني رقدت تولين فوق هك اريح
غاده جتهم : تعالوا ابراهيم بيخش يلبس نور الدبله..
مشت غادة ومشوا وراها...
خش ابراهيم وجي جنب نور كانوا واقفين يشبحوا لبعض..
ابراهيم يقلد في صوتها:"لو تقعد اخر راجل في الدنيا مش حناخدك"
نور: ههههههههههه...امم شن بندير قلبي طيب سخفته..
ابراهيم بضحكه ماكره وقرب من وذنها: تو نعلق عليك..
نور بتموت من الخجل: ياسخيف 😳
ابراهيم بعد: راجلك ياهبله 😂 وغمزلها...
ونور خلاص بتذوب في حوايجها..
نجمه اللي كانت لابسه عبايتها ووشاحها وواقفه حدا الروشن تتأمل فيهم وتبتسم ..تنهدت وتفكرت اللي صار قبل شوي لفت وجهها للروشن..شافاته..واقف ع صاحبه ويتناقشوا ..واضح في اللي صار قبل شوي..اللي خلاها تتلخبط وتتصارع هي وقلبها اللي يبي يتحرر من قيوده وينبض بالحب من أول وجديد بس هي رافضه ..كانت تشبحله وبس تتأمل فيه وخلاص"علاش ياشاهين أني ..انت شن ناقصك شاب صغير ربي عطاك مال وجمال وأخلاق عاليه..علاش تختارني اني علاش تختار بقايا مراة..حتتسعك مش حتسعدك..وانت والله ماتستاهل غير انك تعيش سعيد عمرك كله"
كيف بيلبس ابراهيم نورالدبله حطوا أغنية نانسي عجرم
إحساس جديد💓
اللي ع كلماتها نجمه تتأمل في الجارح اللي رغم عنها حباته بدون ماتحس..
🎵إحساس جديد بقلبك بيزيد
بتحسوا كل مابتطلع في
انك ع طول في مشغول
كتير بتشتئلي وبتموت علي..
أنا مابدي تئلي كلام
يذوب قلبي حنين وغرام
بيكفيني تقلي بحبك
هيدي الكلمه بتقتلني..
في الفاصل الموسيقي...
طارق جي نظره ع الروشن لمح نجمه تشبح لشاهين..
طارق: والله تحبك باهي
شاهين شبحله لقاه يشبح القدام ومبتسم ..تلفت لقي نجمه واقفه في الروشن وتشبحله ..والغريب انها ماهربتش منه هو سرح فيها وهي سرحت فيه..💖
🎵حدي بيكون قلبك مجنون
حتى نظرات عيونك مجنونه
بيعز عليك ترف بعينك
تمرؤ شي لحظه وماتشوفا عيوني..
انا مابدي تئلي كلام
يذوب قلبي حنين وغرام
انا مابدي تئلي كلام
يذوب قلبي حنين وغرام
بيكفيني تئلي بحبك
هيدي الكلمه بتئتلني..
نزلت من عيونها دمعه مسحتها وحولت من الروشن...
شاهين تنهد وغمض عيونه وفتحهم"آااه منك يانجمتي🌟💖"
***
تمت الحفلة ..والناس روحت ..نجمه بدلت قفطانها ومسحت المكياج ومشت للدار اللي فيها بنتها بش بترقد بحداها ...لما خشت لقت الدار فاضيه تماما..قلبها انقبض ..طلعت للحمام ادور فيها مالقتهاش..قلبها انقبض زياده...دورت في الدور التاني كله وتنادي يابشرى مافيش رد..
جتها غادة: كنك نجمه
نجمه بخوف شديد: ماشفتيش بشرى
غاده خافت: لا..
نجمه نزلت تجري : ماشفتوش بنتي..
للاهم: مش راقده فوق..
نجمه بدت تبكي: لامهناش مهناش بكل
بريكه ضربت ع صدرها: نهار احرش
ناديه :هدي حبيبتي حنلقوها..
النساوين دورا في الحوش زاويه زوايه مافيش اثر لبشرى..
نجمه بإنهيار: بنتي وين بنتي ...بنتي ....وقعدت تبكي بالعبره..بعدين ناضت..طلعت برا ومن اللي هيا فيه مش حاطه وشاح ع راسها وشعرها كان مطلوق..طلعوا وراها..
نجمه تعيط: بشرررررررى ..بشررررررررررررى..بشرررررى ...وينك يامااااااما بنتييييييييي ..
من جهة تانيه..
ابراهيم: حس عياط..
طارق: اها..
طلعوا عمر وشاهين وعوض
عمر: شن في ..
"بشررررررررى"
شاهين "نجمه"..وفات يجري من حداهم..لقاها طالعه تعيط ويحاولوا يهدوها ..انطلق بأقصى سرعه لين وصل فيها..
شاهين بخوف: كنها شن في..
نجمه ناضت وشدت في ايده وهي تبكي: بشرى بشرى يااااشاهييين مش لاقيتها..
شاهين بصدمه: كيييف..
للاهم وهي تبكي: تعالي يانجمه تو ندوروها يابنتي..
ناديه تبكي: مرات تكون في مكان هنا الأرض كبيرة ..
نجمه بعياط: شن بيطلعها في الليل بنتي تخاف تطلع للحمام بروحها ..بشرررررى يامااااما وينك..
عمر جي : شن في ..
شاهين في وسط اللي هما فيه ماتحملش حديشوف نجمه من غير حجاب..حضنها بش يدرقها عنهم ...وداخلها..
نجمه:نبيييي بنتي...وين رافعني..
شاهين وهو حاضنها: وحق من عطاك بشرى حنجيبها لك..
نجمه : نبببيبييي بنتي شااااااهين..
شاهين بدون مايحس: حنجيبها لك ياروح شاهين..
دخلوها داخل...
والباقي داخل حصلوا في بريكه اللي سكرها هبط..
💔💔💔
هديكا الليله كانت اطول ليله للصبح وهما يدوروا ومش لاقين لبشرى اي اثر ونجمه انهارت وفقدت الوعي ..ورفعوها المستشفى...
***
مقعمز قدامه يتأمل في ملامحها الطفوليه البريئة ودموعه تنزل..ناسخته نسخ ..ابتسم بألم لما جت عينه ع نقرة الزين اللي فذقنها..شاف لعيونها بتركيز لما بدت تفيق وتفتح فيهم..
عيونه عيونه حتى في لونهم...بنته اللي نكرها ربي خلا صنعه فيها زي زي صنعه فيه بالزبط بش يكون اكبر دليل ع انها بنته...
بشرى: من انت..
شكري بإبتسامه الم: اني بابا..
ناضت بشرى وتشبحله بعقدة حاجب: اني عندي بابا لكن مش أنت..
شكري انصدم : من هو..
بشرى: بابا شاهين..
شكري قريب مات لما سمع الكلمه هادي قدملها شد ايديها جبدتهم..حط ايده ع راسها بعدت راسها..حط ايده ع خدها دفت ايده وحواجبها مقرونات بغضب...
بشرى: من انت علاش خديتني من ماما وين ماما...
شكري : اني بابا بابا يابنتي بابا..
بشرى قعدت تعيط: لاااالا انت كذاااب..نبي ماما ماااااما نبي ماااما..
حاول يشدها نتشاته..شكري طارتله..
شكري بعصبيه وصوت عالي وهو يفنص: انييي بابا انييييي بسسسي...
بشرى قاعدة قارنه حواجبها ولما عيط عليها ماخافتش دارت رد فعل غير متوقع ..دفلت عليه..ايه دفلت عليه..الأطفال نقاء قلوبهم احيانا يحسسهم اذا كان اللي قدامهم انسان كويس او العكس...
شكرى لما دارت هكي...بدون رحمه ضربها كف...
شكري بغضب: امك ماعرفتش تربيك...
بشرى بدت تبكي: شرير ياشرير نكرهك..نكرهك..وتبكي..
شكري استاقض ع روحه شن دار وقلبه وجعه هلبه وقعد يبكي..
شكري : اسف يابابا اسف يابنتي اسف سامحيني..
اما بشرى فقعدت تعيط بهيستيريا ماعرفش شن يديرلها..مالقاش إلا حل واحد يخدرها..وفعلا هذا اللي داره وبشرى رقدت ع طول..
***
شهقت بأعلى حس..لقت روحها في غرفه في مصحة ..بنتها
..بنتها مهناش...
نجمه بعياط: بنتييييييي بشرررررى بنتي..خشولها للاهم وناديه..
للاهم تحاول تشدها: نجمه اهدي اهدي يابنتي..
نجمه تعيط : مالقيوتهاااش..
للاهم سكتت..
ناديه : حيلقوها يابنتي...شاهين والكل يدوروا عليها في كل مكان..
نجمه هسترت بالعياط لين خشوا عليها عطوها يبرة مهدئه ...
...
هو والله هو..
طارق : ماتستعجلش ممكن يكون حد يبي فلوس..
شاهين : اللي يبي فلوس عليش يخطف بنت نجمه عليش مخطفش واحد من عيال عبدالله الله يرحمه..ولابنت فارس..
عمر: حنى نا نقول هك..شكري شخص خطير..واللي سمعته عنه يثبت هالشي..
شاهين ناض : بنقعدوا هك نتفرجوا مش دايرين حاجه..
ابراهيم: خشت فيها الشرطه وحتى ناس من الجيش وقاعدين يدوروا عليها...
شاهين: مراته عندها حوش هنا..
عوض: بنت طاهر***..اها عندهم..
شاهين: تعرفه وينه..
عوض: اها ماشيلهم اكثر من مرة..حي(******) شارع(****)
طلع شاهين يجري ولحقوه طارق وأبراهيم...
***
طلقها!!
طاهر بأسف: ايه من مدة وبنتي حالتها النفسيه صعبه بسببه..
ابراهيم : ماريتش احقر منه فحياتي..
شاهين: به ماتعرفش عنه اي شي..
طاهر: ابدا ولانبي نعرف..علاش تسألوا عليه..
طارق: بنت نجمه انخطفت ومتوقعين يكون هو اللي خاطفها..
طاهر فكر بعدين ابتسم بتهكم: حيضغط ع نجمه ببنتها بش يردها..لهالسبب طلق بنتي..مريض
شاهين فكر في كلام طاهر وقلبه انقبض خاف لويكون هكي فعلا ونجمه ترضخ لشكري ع خاطر بنتها وترجعله..
***
دارو عمليات بحث مكتفه في كل مكان حتى في المطار..وصلوا لمعلومه ان شكري سافر في نفس الليله ومعاها بنت صغيره بإسم تاني...شكري دارلها جواز سفر مزور والموضوع مش صعب طبعا..دوروا حتى برا وساعدهم طاهر بمعارفه في السفارات ومعارفهم حتى هما وادخل الأنتربول..لكن شكري وبشرى فص ملح وذاب...
مر شهر كامل💔
نجمه خشت في حاله نفسيه لاماكله لاشراب محبوسه في دارها تبكي وتصلي بس..كذا مرة صارلها هبوط ودارولها تغذيه...ضعفت هلبه ..
في يوم ..
كانت راقدة جثة هامده ع السريرعايشه من قلة الموت...
طق الباب..وخش عليها ..لقاها في هالحاله..قلبه انفطر💔..
قدملها لقاها فاتحه عيونها وسرحانه ودموعها تنزل..
"مش لايق عليك الضعف
مش لايقين عليك الدموع
مش لايق عليك الحزن"
نزل ع روس صوابعه وقعد يشبحلها: عرفتك مراة قويه من اول مرةجت فيها عيني عليك ..وانت مالكه قلبي بنظرتك القويه اللي كنت نحق فيها كل ماتجي عيني في عينك"
نجمه بصوت مبحوح: اني من غير بنتي نموت ياشاهين
شاهين غمض عيونه: اشششش ماتجبيش سيرة الموت...انتي لازم تصبي تقوي نفسك عشانها..حنلقوها بإذن الله حنلقوها..ولما تجيك بنتك لازم تلقى امها كيف ماعرفتها قويه وسمحه ..وابتسم..
نجمه شبحت لعيونه هلبه بعدين قالت: بنتي حترجعلي ولا..
شاهين خدي ايدها وباسها هي نزلوا دموعها لما دار هكي..
شاهين: وحق من حط حبك في قلبي حنرجعهالك لو عطيت روحي مقابل هالشي..
نجمه قعدت تتأمل في عيونه اللي اضيع فيهم وتحس بأمان العالم كله فيهم.."ياريت لو نقدر ياشاهين نقولهالك ياريت بس صعب هلبه"..
شاهين ناض: وتوا صبي ..ديري دوش وكولي حاجه..واطلعي للمربوعه في واحد يبي يساعدنا عشان نلقوا بشرى يبي يحكي معاك...
نجمه شبحتله هلبه بعدين هزت راسها بإيجاب وابتسمت ابتسامه خفيفه..
شاهين بضحكه: عندك نص ساعه نحسبلك فيهن من لما نطلع من هالباب..ماتعطليش الراجل يرجى فيك..ابتسملها وغمز بعينه وطلع..وهي ضحكت بأمل..وناضت دوشت..وطلعت لقت امها دايرتلها فطور..كلت بالسيف..وبعدها لبست عبايه ووشاح وطلعت..
لقت شاهين مقعمز مع واحد
نجمه: السلام عليكم..
سامي وعيونه لوطا: وعليكم السلام..
نجمه قعمزت مقابلتهم بس بعيد شويه..
شاهين: هضا سامي صديق وأخ عزيز ..كان توأم روح عبد الله خويا الله يرحمه..
نجمه : اهلا بيك
سامي : وبيك اختي..
شاهين: سامي في الحرب انضم للجيش ..وعنده معارف حيساعدونا وهو نفسه كان يخدم ضمن القبض ع الدواعش والتحري عنهم ايام الحرب..وتوا يعني عنده خبرة..
سامي: احمم ممكن نحكي انا 😒
شاهين : تفضل😑
نجمه ابتسمت ابتسامه خفيفه: كيف تقدر تساعدني بش نلقى بنتي..
سامي: بعون الله...اللي متأكدين منها توا إن اللي خطف بنتك هو راجلك..
شاهين بنبرة حاده : طليقها...😡
سامي: اسفين تلخبطنا😑..المهم هو خطفها لغرض الضغط عليك وهضا واضح يبي يعذبك ويتعبك لين توصلي لمرحلة اللي يطلبها منك تنفذيها عشان بنتك..
نجمه خافت وقعدت ساكته وشاهين يراقب فردة فعلها..
سامي: عندي احساس يقولي ان هو ماطلعش من هنا اساسا
شاهين ونجمه انصدموا.
سامي: لإنه واحد بإسمه وسمعته في الخارج اكيد حيلقوه بسهوله...غير عن هك انا بنفسي سألت برا ناس واثق منهم قالوا انه ماخشش ولابأي شكل لأي بلاد من الدول اللي فيهم يسير في أعماله..
شاهين : مرات يكون في دوله عربيه..
سامي : فكروا معاي اذا هو يبي ياخد الأخت نجمه بالغصب ..فأكيد مخطط للهروب من هنا لما نجمه تستسلم وتقبل ترجعله..مايبيش يضيع الوقت ويفتح عليه العيون لو مالقوش توا حيلقوه لما يحاول يهرب الأخت نجمه..
شاهين ونجمه يفكروا بصدمه...
سامي: هو اكيدحيتواصل معاك إما مكالمه ..او رساله..
خل عندك في الهاتف تطبيق تسجيل مكالمات...للإحتياط..
نجمه : تمام..
سامي : حاليا حنهدوا وحنوهموه اننا ندروروا عليه برا ومش فبالنا انه يكون موجود جوا البلاد..
نجمه ابتسمت: كيف تتكلم بثقه عطيتني أمل كبير ..
سامي ابتسم: إن شاء الله حنجيبلك بنتك لغاية عندك وعد..
نجمه :إن شاء الله..
شاهين يغلي: احممم ..مش بروحه ره..
نجمه ضحكت: عارفه...
سامي : ومن قال غير هك..
شاهين: نذكر بس..
سامي: الله يعينك ع هالهبل..
نجمه تلاشت ضحكتها وتحشمت ...
شاهين ابتسم : هيا صبي وانت خذيت راحتك..
سامي ناض: زي ماوصيتك اختي نجمه..
نجمه : إن شاء الله...
وطلعوا سامي وشاهين وخلوا عند نجمه أمل كبير تلقى بنتها...
***
مقعمزة في المرسم قدام لوحه وترسم ..وسط مشاعرها المختلطه "الصدمه..الندم..الضياع..تأنيب الضمير"
فلاش باك...
كيف خاشه للحوش تسمع في صوت نقاش حاد..والباين مكالمه..
كاريمان: بشن تبيني نخبرها..بأني مش امها..بإن بنت غير شرعيه..بإنها بنت اختي الطايشه اللي غلطت مع واحد فرنسي..لما كانت تقرا غادي...واني داريت ع فضيحة أمها وخديت البنت وسجلها راجلي ع اسمه..
نور مصدومه بشده وحست الدم جمد في عروقها..
كاريمان : اسمعيني ياماجده نور بنتي انا ..خلاص انسيها مستحيل نسلم فيها بعد كبرتها وتعبت عليها...وصكرت وقعدت تبكي ..اما نور انسحبت بهدوء بدون تبين انها كانت موجوده وصدمتها كانت كبيره...
هالحقيقة هادي عرفتها نور قبل الزردة..وكانت تبي تكلم شاهين عليها..لأنها متأكده انه الوحيد اللي حيكون معاها..بس مع الأسف فات الأوان..شاهين كان يعرف هالحقيقه وكان مستعد يدير المستحيل بش مايخليهاش بروحها كان يبي يولي اهلها وناسها ويغنيها عن وجود الناس لو جي يوم وعرفت الحقيقه..بس هي اللي ضيعت شاهين بأنانيتها وغرورها...
وقفت رسم وهي مصدومه...لما شافت لوحتها..لقت روحها راسمته...راسمه شاهين بدون ماتحس ..وبدت تبكي بندم شديد....
***
بعد مرور ايام...نجمه كانت تحاول تتماسك ع قد ماتقدر ومتفائله ان بنتها في النهايه حترجع لحضنها وهي مقعمزة في دارها وفي ايدها التليفون جتها رساله
(تبي تشوفي بشرى مرة تانيه لازم تقبلي انك ترجعي ع ذمتي ..وتعيش بنتنا بيناتنا ..لو حتسكري راسك..حنربي بنتي بروحي ونحكليها كل ليلة قبل لترقد قصة امها اللي تخلت عنها وتزوجت الحليوة الشرقاوي)
نجمه بغضب : حقيييير منحط سااافل...الله يلعن اليوم اللي حبيتك فيه هذاكا اليوم الله يلعنه..اووووف استغفر الله وأتوب إليه...
ورت الرساله لشاهين وسامي اللي زاد تأكد إن شكري قاعد هني كثف عمليات البحث..
اما شاهين فعصب ع الآخر وخاف لو نجمه تستسلمله و ادير اللي يبيه ...
***
طالعه من المستشفى وهي تاعبه تراجي امتى تروح للحوش تأففت لما شافت لسيارتها اللي درستها في الطرف التاني من الطريق بسبب الزحمه وكيف بتقص الطريق وقفت لما حد شد ايدها..
عمر : للاهم كيف حالك
للاهم : كيف بيكون حالي يعني..وبعدين انت شنو ماتملش يابن آدم..
عمر بتوسل: للاهم ارجوك تفهميني..انا عمري مانسيت حبك..
عشت عليه طول هالسنين اللي فاتن..
للاهم بملل: مادخليش بيك هذا شي يخصك ..حول عليا ترا..
ومشت وهي معصبه مش مركزة ف الطريق وتجيها سيارة..
عمر غمض عيونه وبصوت عالي : لللللااااهم ..فتح عيونه ببطء وانصدم باللي شافه..
للاهم في حضن بو العيون الزرق..
للاهم بعدت وقعدت تشبحله..
طاهر بأبتسامته الساحرة: مش حنسمح لنفس الحادث ياخد مني حد تاني حبيت الحياة ع خاطره..
للاهم مصدومه وقلبها يدق..وهو مبتسم وبس.
طاهر : تعالي نوصلك لسيارتك...
للاهم ابتسمت بخجل:تمام..
وقصوا مع بعض الطريق..
عمر اللي كان يشبحلهم تأكد ان للاهم خلاص قصة وتمت من 25سنه....وانه كان عايش في وهم فاتوا 15يوم تانيات ومازال مافيش اثر لشكري وبشرى ..وشكري معاش تواصل مع نجمه بتاتا ورقم اللي بعتلها منه الرساله حرقه طول بش مايتعقبوشي بيه..
نجمه نفسيتها تعبت بزايد وبدت تفقد الأمل ...
وفي ليله..
الساعه 10
رن تليفون نجمه وكان رقم غريب ردت..
نجمه بلهفه: آلووو..
شكري : شن فكرتي ياحبي ..
نجمه : حقيير
شكري : الباين مازال مافكرتيش...
نجمه بخوف: خلاص خلاص ..اللي تبيه نديره..
شكري :حلو ياحلوة نبيك توا تجي لطريق الغابه في (*****)
توا تجي يانجمه بنتنا تبكي وتبيك..انتي وبس ولاتبي تاكل ولاتشرب ...وصكر..
نجمه ناضت لبست عبايه بسرعه ووشاح وهي طالعه وقفت شبحت للتليفون في ايدها..خلاته ع الكامدينو وطلعت مستغلة نوم أمها...
...
يمسد ع راس بنته اللي تعبت من البكي..
شكري: خلاص ياعمري اني ماشي نجيب ماما ونعيشوا مع بعض طول العمر...وصا عليها المراة اللي مأجرها بش تقعد معاها..وطلع ...

...يتبع...
الفصول الاربعة