Summer Of Luoyang

အခန်း ၄ / အခန္း ၄

Unicode

အမတ်မင်းရှောင်းအား လူစိမ်းကားကြီးလို့ မိန်းမပျိုလေးတွေပါးစပ်မှာ ချစ်စနိုးဖြင့်ခေါ်ဝေါ်ကြသည့် အမည်နာမဟာ လက်စသတ်တော့ ဘာမှမဟုတ်တဲ့ကောလဟာလတစ်ခုပါပဲ။ အခုသူမြင်တွေခဲ့ရသည့် အမတ်မင်းရှောင်းဟာ ယဉ်ကျေးသိမ်မွေ့သလို စကားပြောရာမှာလည်း ပြေပြေပြစ်ပြစ်ရှိ၏။ တစ်ဖက်သားကို မောက်မာသောလေသံဖြင့်လည်းမပြောသလို သူ့ကိုယ်သူနှိမ့်ချထားသည့်လေသံနှင့်လည်းမပြောဘဲ အလွန်ရင်းနီးသည့် သူငယ်ချင်းတစ်ယောက်ကို စကားပြောနေသလိုမျိုး ပေါ့ပေါ့ပါးပါး သွက်သွက်လက်လက်နဲ့ ပြောဆိုလာသည်။ သုံးနှုန်းတဲ့စကားလုံးတွေကလည်း ရင့်သီးမှုတစ်စက်မှမပါဘဲ ပျူငှာဖော်ရွေမှုရှိ၏။  အမတ်မင်းရှောင်းရဲ့ စကားပြောဆိုပုံဟာ ဟန်လုပ်တတ်သောစာတတ်ပေတတ်တွေလိုမျိုး စကားကိုကွေ့ဝိုက်ကာဥပမာတွေပေးနဲ့ ပြောခြင်းမျိုးမဟုတ်ဘဲ တည့်တိုးဆန်ပြီးပြတ်သားလွန်း၏။ ပညာရှိတစ်ဦး၏ ဂုဏ်အင်လက္ခဏာများပင်ဖြစ်၏။ အမတ်မင်းတစ်ယောက်ပေမဲ့ ဟန်လုပ်နေခြင်းမျိုးကိုလည်း ဝမ်ရိပေါ်ကအကဲခတ်ကြည့်သော် မတွေ့ရ။ အမတ်မင်းရှောင်းဟာ သူများတွေပြောသလို မာနကြီးတတ်သူမဟုတ်ပါဘဲ တသီးတတစ်သန့်ဆန်သူသာဖြစ်လေတော့သည်။ လူဆိုသည့်အမျိုးမှာလည်း ကိုယ့်ထက်သာလျှင် သွားပုပ်လေလွင့်ပြောတတ်ကြသည့် မကောင်းသောအကျင့်လေးကရှိနေပြန်တော့ အမတ်မင်းရှောင်းလို အထက်တန်းလွှာကလူစားမျိုးကို မကောင်းပြောတတ်ကြတာဟာ အထူးအဆန်းရယ်လို့မဆိုသာ။

သူများတွေပြောသမျှဟာ ယုံကြည်ချင်စရာတစ်ကွက်မှမရှိသည့် လန်ကျုတ်ဇာတ်လမ်းတွေဆိုပေမဲ့လို့ အမတ်မင်းရှောင်းကို နှစ်သက်သဘောကျသော မိန်းမပျိုလေးများဖြစ်စေ အမတ်မင်းရှောင်းကိုမနာလိုသူများဖြစ်စေ အမတ်မင်းရှောင်းအားလေးစားသူများဖြစ်စေ အမတ်မင်းရှောင်းအား အားကျသူများဖြစ်စေ သူတို့ပြောလေ့ရှိသည့်အရာတစ်ခုကတော့ ပြောင်းလဲမှုမရှိတူညီနေမြဲ။ ထိုအရာကတော့ အမတ်မင်းရှောင်းရဲ့ရုပ်ရည်အကြောင်းပင်။ အမတ်မင်းရှောင်းဟာ ယောက်ျားဆန်သောမျက်လုံးမျက်ခုံးတွေနဲ့ အကြည်ဓာတ်ခံရှိသည့်မျက်ဝန်းတွေအား ပိုင်ဆိုင်ထားကြောင်း။ သွယ်လျသောမေးရိုးနှင့် မို့မောက်သောပါးအို့လေးတွေရှိကြောင်း ဆိုးဆေးမကူသည့်နှုတ်ခမ်းတွေဟာ အမြဲလိုလိုစိုစွတ်နီမြန်းနေကြောင်း။ နှုတ်ခမ်းအောက်က လူတကာရဲ့စိတ်ဝင်စားမှုကိုညှို့ယူနိုင်သည့် မှဲ့နက်လေးဟာလည်းမပါမဖြစ်ပေါ့။ အမတ်မင်းရှောင်းရဲ့ တမူထူးခြားပြီးချောမောသည့်ရုပ်ရည်သည် ပျိုမဒီတွေအားဆွဲဆောင်နိုင်စွမ်းရှိကြောင်းတွေဟာ မည်သူမဆိုပြောဆိုကြသည့် အကြောင်းတွေဖြစ်လေတော့သည်။ အမတ်မင်းရှောင်းအား အမြင်မကြည်သူများကပင် အမတ်မင်းရှောင်း၏ရုပ်ရည်ချောမောပုံအား စကားထဲထည့်မပြောဘဲမနေနိုင်ကြ။ ဒါကိုတော့ သူတို့ဘက်ကနေ ဝမ်ရိပေါ်လည်းထောက်ခံရပေတော့မည်။ မှန်သည်။ အမတ်မင်းရှောင်း၏ ရုပ်ရည်မှာ သာမန်ထက်ထူးကဲ၍ အရမ်းကိုလက်ရာကောင်းမွန်သော တစ်ယောက်ထက်မကသည့် ပန်းပုဆရာများက အချိန်ပေါင်းများစွာပေးကာ တတ်သမျှမှတ်သမျှတွေကိုအသုံးပြုလို့ အသေသပ်ဆုံးလက်ရာမြောက်တစ်ခုဖြစ်အောင် သေချာထုဆစ်ထားသည့် အလှပြပန်းပုရုပ်တစ်ခုလို ခန့်ညားထည်ဝါပြီး ရိုသေလေးစားချင်ဖွယ်ကောင်း၏။