လွမ်းမောစရာ ခေတ်ဟောင်းမြေ (လြမ္းေမာစရာ ေခတ္ေဟာင္းေျမ)

p - 3

Unicode...

ထိုညတွင် မိုင်ရိုစ်ကို တစ်ယောက်တည်း အိပ်ခိုင်းသော်လည်း ကြောက်သည် ဆိုကာ နွေကို ခေါ်အိပ်သည်။နွေသည်လည်း ဘာစောဒကမှ တက်‌မနေတော့ပဲ အသာတကြည် မိုင်ရိုစ်နှင့် သွားအိပ်ပေးလိုက်သည်။

ချမ်းသည်ဟုဆိုကာ အရိုးကြေလုမတတ် ဖက်ထားသည်ကို သည်းခံရင်း...။

..

နွေ တစ်ကိုယ်လုံးညောင်းညာစွာ အိပ်ယာကနေ နိုးထလာသည်။ပေါင်ပေါ်တင်ထားသော ခြေထောက်ကို နိုးမှာစိုး၍ ဖြေးဖြေးချင်း ဖယ်ချရသည်မှာ အသက်ပင် မရှုဝံ့။

မျက်နှာသစ်ပြီး ဆံပင်ကို တပတ်လျိုထုံးဖွဲ့လိုက်သည်။ညအိပ်ဝတ်စုံတို့ကို အဝါနုရောင် ဝမ်းဆက်နှင့် လဲလှယ်လိုက်ပြီး မနက်စာအတွက် မုန့်ဟင်းခါးကို နှစ်ယောက်စာ ချက်လိုက်သည်။နိုင်ငံခြားသူလေးကို မြန်မာအစားအစာတွေ စားစေချင်သည်။မည်သို့မှန်းမသိ ထိုမိန်းကလေးကို ရင်းနီးနေသည့်ခံစားချက်ဖြစ်နေသည်။တစ်ခါမှ မတွေ့ဖူးပါပဲလေ..။

နွေ ခြံထဲ ဆင်းပြီး ပန်းပင်တို့ ရေလောင်းပေါင်းသင်ပြီး သီးပင်စားပင်တို့မှ ခူးဆွတ်ရန် အချိန်တန်သည့် အသီးအရွက်တို့ကို ခူးဆွတ်လိုက်သည်။ဘုရားပန်းကပ်ရန် နှင်းဆီပန်းတို့ကို ခူးနေရင်း မလှမ်းမကမ်းမှ ဖုန်းဖြင့် ဖွင့် ထားသော ခင်မောင်တိုး၏ ပန်းချစ်သူသီချင်းမှာလည်း နှင်းဆီပန်းရနံ့တွေနှင့်အပြိုင် ပျံ့လွင့်နေသည်။

🎶 ပန်းချစ်သူ တို့လက်နဲ့ကွယ် ခူးဆွတ်ဖို့ စိုးရွံ့လို့နေတယ်။
     ဆွတ်ယူမယ် ဟန်ပြင်ကာပင် ယုယစွာ ထွေးပွေ့ထားပါမယ်။
      အသာအယာဆွတ်ယူ ရင်မှာ သိမ်းထားမယ်။
      အိုလေ.. ပန်းလေးတစ်ပွင့်ရယ်။
       ပန်း.. ကိုချစ်တဲ့ ပန်းချစ်သူ ကိုယ်တိုင်ချူကာ ဆွတ်ခူးမယ်။🎶

မိုင်ရိုစ်သည် မျက်နှာသစ်ရေချိုးလိုက်ပြီး အိမ်ထဲ ဟိုဟိုဒီဒီ လိုက်ပတ်ကြည့်ပြီးနောက် အိမ်ရှင်ကို မတွေ့သဖြင့် ခြံထဲ ဆင်းလာလိုက်သည်။  အေးအေးညိမ့်ညိမ့် သီချင်းသံစဉ်ကို ကြားရပြီးနောက် တဆက်တည်းဆိုသလိုပင် နှင်းဆီပန်းရနံ့တို့ကပါ လေနှင်ရာ ဝေ့ဝဲရင်း မိုင်ရိုစ်၏ နှာဖျားသို့ ကလူကျီဆယ်နေသည်။
နှင်းဆီပန်းတို့နှင့်အပြိုင် ထိုအမျိုးသမီးမှာ လှသွေး‌ကြွယ်နေပြီး လေတိုက်သဖြင့် ဆံပင်တို့ ယိမ်းနွဲ့နေသည်မှာ မိုင်ရိုစ် နှလုံးသားလေးကို ကလူကျီဆယ်နေသကဲ့သို့ ယားယံလာသည်။