ضحايا داعش

الرَابِع عَشْر

سلام المحبة💖

بديت اشتاقلك يومية واحتار

واذا مايووم اسمع صوتك احزن

جبت كلبي بيدي كربته للنار

وليش بنار حبك كلبي أمن

أخاف اعيوني من الشوك تنهار

وخايف لا يجيهن يوم يبجن

ويدمع اعيوني ينزل مو دمع نار

وكل دمعه شهر من توكع اصفن

___________________

    فرقان ..

تركت جلنار بأمان وطلعت اشوف صيد هالليله مشيت لكدام وضليت افتر بهالبساتين المحاوطتني من كل الجهات، شموخ النخيل العالي وبروده الهوه اليتناغم ويه سعف النخل وهدوء المكان التام يخلي الواحد يتمنى يفرش بهالكاع وينام بعد مايكعد..

  امشي واراقب من كل جهه ماخلي مكان ماركز بي زين وامشي بهدوء حتى ماصدر اصوات مشي عاليه حزام رصاص ملفوف ع ركبتي اخذته من اخر داعشي كتلته واخذت سلاحه هم لان نوعيته كلش زينه عجبتني خوش تصيد، لحظظظه....

رن بأذني صوت من الجهه الوراي ثبتت بمكاني التفت ع كيف لوره رفعت سلاحي وباوعت لكل مكان ماكو شي! ثواني ورجعت اكمل مشي بهدوء وماحس غير حديده نغرست برجلي اليمنه ووكعت بالكاع

__ اااااااااخ رجليييي ،فارت روحي من الاللم.

_ نعلعله شنو هايييي مصييده خرب حظي الزفت مالكت الا انه اعثر بيها ااااخ ياربييي، دم يجري بالكاع واحس بحراره قويه بجسمي شلت سلاحي خليته بحضني وضليت ازحف بالكاع اريد اوصل لاقرب نخله تصير كدامي، بعد سيل من الدم والالم سندت ظهري ع جذع نخله.

_ اااه ياعلي يامولاي راح اموت من الالم ااااخ فرقان انجب مابيك شي صير سباعي لاتضعف عفيه البطل عفيه نزعت الجفيه ولفيتها ع جف رجلي حيل وانه صرخت مكتوم من قوة الالم ورجعت لفيته مره ثانيه بلكي يقل النزيف ولو شويه ضليت بمكاني مسنود لدقايق اتنفس بأنفاس سريعه ألهث عبالك جنت اركض لساعات اخذت سلاحي ورفعت رجلي اليسره وسندت وذببيت ثكلي كله ع السلاح ووكفت.

_ ياااااعلييييي يأبا الحسن عونتك يامولااايي ااااخ.
كمت واحس المكان كام يفتر بي دخت بقيت واكف شويه وبلشت اول خطوه ورجعت ادراجي لمكان جلنار همزين مامشيت مسافه هواي جان متت بنص طريق، امشي وبكل خطوه اصيح ياعلي وتهون الخطوه عليه وفجاه سمعت صوت حركه سريعه وره النخل سحلت روحي بسرعه ولبدت وره نخله اراقب المكان الجنت امشي بي وشفت خيال واحد وصدك بلش يرمي ع مكاني الموجود بي وجاوبته بكل رحابة صدر شلت السلاح وكمت ارمي علي ربع ساعه احنا نتاكتل منا لمن وكع بطلقه بطنه خلته يرافس بمكانه ضليت واكف تحسب لاي شي، الوضع هدوء سحلت روحي باخر قواي المنهارة اخذت جهازه اللاسلكي ومشيت للبيت صار كدامي بعد مسافه قليله بس انفاسي بدت تقل وحرارتي صارت ناررر كمت اشوف الطريق خمسه طرق وكعت بكاع بعد ماكدرت ابد صار البيت قريب عليه صرت ازحف وارجع ارتاح انام وارجع ازحف الى ان وصلت للبيت حاولت افتح المدخل بس ماكدرت يرادله قوه ضليت احاول وياه ماكو اخر شي سحلت الحديده بكل قوة عندي وشمرتها بصفي وزحفت زحوف لجوه.