سلاسل متشابگة

السلسلة العاشرة

سلاسل_متشابگة

بقلم : اية الـ عبد

حبايب لا تنسون التصويت من النجمه + التعليق بين الفقرات + متابعه حسابي 🤎.

- ‏شخص تتخبط روحه في كل الإتجاهات محاولًا أن يجد مستقرًا يأوي إليه بأمان على الأرض بعدما ظل يناهز دهرًا كاملاً من العوم في الفراغ.

_________________________________

رحت للحديقه حتى اشوفه ورحت للمكان المعتاد وما لكيته موجود بقيت كاعده بمكاني انتضره قرب وقت رجعتي وكفت اريد ارجع وشفته جاي باتجاهي رحت عليه ركض بس تصنمت بمكاني من شكله اتقرب مني ووخر شعري من وجهي باطراف اصابعه وحجه بصوت مبحوح
أسـمـرانـي : شلونج يَبِاَ
ايلي : هاي شصاير بيك؟
أسـمـرانـي : ماكو شي يَبِاَ لا تهتمين
ايلي : شنو ما اهتم ليش هيج صاير بوجهك؟ منو مسوي هيج؟ وشلون خليته؟

وجه جان بي اثار ضرب وخشمه بس دم قليل وناشف باوعت عليه وكتله
ايلي : تعال وياي
سحبته من الردن مال التيشيرت ورحنه للصيدليه ابو الصيدليه يعرفني كبل من شافني كال
ابو محمد : خيرج عمو ايلي محتاجه شي؟
ايلي : عمو تكدر تعالجه؟
ابو محمد : اي بس شصاير؟
ايلي : تعارك ويا ولد بالشارع لأن راد يضربني

ابو محمد : الله يطيح حضه اكو واحد يسوي هيج بس الولد شنو يصير منج؟
ايلي : ابن كرايبنه

هز راسه وحجه ويا أسـمـرانـي كال
ابو محمد : عمو تعال تفضل هنا
هز أسـمـرانـي راسه بقبول وكعد وبده يعالج بوجه ورجعنه للحديقه وكتله
ايلي : يلا احجيلي

أسـمـرانـي : شنو احجيلج؟
ايلي : منو سوه بيك هيج؟ وشنو الي صاير؟
أسـمـرانـي : تعاركت ويا ولد بالشارع لأن راد يضربج
ايلي : تمشي جذبتي عليه؟ احجي الصدك

أسـمـرانـي : اتعاركت ويا زوج امي
ايلي : ليش؟ على شنو؟
أسـمـرانـي : هيج مو جديده علينه دائماً نتعارك
ايلي : يعني هاي الفتره كلها هم جنتو تتعاركون ابد ما صفيتو؟

أسـمـرانـي : بس من ما نتلاكه
ايلي : مو تحس صاير ما تحجيلي شي؟
أسـمـرانـي : وليش حتى احجيلج؟

باوعت عليه ورمشت بتكرار وكلت
ايلي : صح ماكو سبب حتى تحجيلي اترخص اني
كمت وعفته ومشيت وسمعت يصيح وراي
أسـمـرانـي : يَبِاَ اوكفي بس اسمعيني

كملت طريقي للبيت وما انداريت ابد مشت الايام واني بعد ما رحت للمكان الي متعوده اكعد بي غيرت مكاني وصرت اكعد يم رشا وعلي زادت صداقتي ويا علي بس بأحترام بدينه بامتحانات نهايه السنه واني ابد ما خليته يشوفني من هذاك اليوم بس اني اشوفه من بعيد صح اشتاق لسوالفنه سوا بس حسيت بكلامه يقصد صداقتنه اقل من العاديه او ما يثق بيه فما يحجي شي يخصه فعفته براحته خلصت الامتحانات وبدت العطله وبيوم جنه كلنه كاعدين ببيت جدو بالصاله وبابا وعمامي وجدو بالديوان واندك الباب طلع مراد وطب كال
مراد : ام سجى اجتي تسير عليجن
قصده على ماما ونسوان عمامي طبت وكعدت تسوف وتضحك ماخذها الواهس جان تضرب كصتها وكالت
ام سجى : عزا غير نسيت الغراض ما وديتهن للبيت
ايلين : عادي يمعوده من ترجعين وديهن
ام سجى : لا يولي غير سجى تسوي يوم اسود عليه رادت الغراض تسوي بيهن كيكه ونسيت اوديهن