Unicode
"မုန့်တွေက ထည့်ပေးလိုက်တာနဲ့လောက်လား။လိုသေးရင် အိမ်ထိန်းကြီးဆီ ဖုန်းဆက်ပြီး လာပို့ခိုင်း။သူများအိမ်က လူကြီးတွေကို ဟိုဟာစားချင်တယ် ဒီဟာစားချင်တယ်နဲ့ အပူမတိုက်ရဘူးနော် ဂျွန်ငယ်။ဒယ်ဒီပြောတာ ကြားလား"
"ဟုတ်ကဲ့"
နှုတ်ခမ်းဆူကြီး လုပ်ထားရာက ကျွန်တော့်စကားကို သားတစ်ယောက် မဖြေချင့်ဖြေချင် ပြန်ဖြေသည်။မပူဆာတတ်သည့် ကလေးမှန်းလည်း သိသည်။အလိုက်သိ၍ လူကြီးမိဘစကားကို တစ်ခွန်းဆိုလျှင်တစ်ခွန်း နားထောင်တတ်သော ကလေးမှန်းလည်း သိသည်။သူစိမ်းသူရံအပေါ် မဆိုထားနှင့်။မိဘ အုပ်ထိန်းသူ ကျွန်တော့်အပေါ်တွင်တောင် အတင်းအဓမ္မ ဂျီပူဂျစ်ကျတတ်ခြင်း မရှိသောကလေးက သူတစ်ပါးအိမ်က လူကြီးတွေကို ဂျစ်တိုက်ပူဆာပါမတဲ့လား။သိသိကြီးနှင့် ထိုသို့ ကျွန်တော်မှာနေရခြင်းမှာ အကြောင်းရှိ၏။ဆက်၍ ရှုပါလေ။
"အပြင်စာတွေလည်း မစားနဲ့။ရေကိုလည်း ထည့်ပေးလိုက်တဲ့ ဘူးထဲကပဲသောက်။"
"ဟုတ်ကဲ့"
သားက အပြင်စာနှင့် ဓာတ်မတည့်။ရေမသန့်လျှင်ဖြစ်ဖြစ် ရောင်းချသည့်အစားအစာတွင် သန့်ရှင်းမှုအားနည်းလျှင်ဖြစ်ဖြစ် အလာ့ဂျစ်ထတတ်သည်။အသေးသောဆုံးသောကိစ္စမှာ မျက်နှာတွင် အနီဖုများဖြစ်လာတတ်ခြင်းဖြစ်ပြီး ထို့ထက်ပိုဆိုးလျှင် ၀မ်းလျှော၀မ်းပျက်ဖြစ်တော့သည်။ထိုမှတစ်ဆင့်တက်လျှင် အသည်းအသန်အော့အန်ကာ အစာအဆိပ်သင့်သည်ဟူသော လက္ခဏာဖြင့် ဆေးရုံတက်ရတတ်၏။သိပ်နုသောသား။အထိခိုက်သေးသေးကလေးပင် မခံနိုင်ရှာသော ပိုးဟပ်ဖြူကလေးကို ကျွန်တော့်မှာ နေပူလျှင်လည်းပူလို့၊မိုးရွာလျှင်လည်းရွာလို့ အခြေအနေအကြောင်းကြောင်းကိုလိုက်ပြီး ပိုးမွေးသလို ထုပ်သိမ်းစောင့်ရှောက်နေရခြင်းကို သားတစ်ယောက်ကတော့ "ဒယ်ဒီက သားအပေါ် တင်းကြပ်တယ်"ဟူ၍ ဆိုလေကာ အပြစ်မြင်ချင်လှ၏။
"အကယ်၍ စာလုပ်နေရင်းနဲ့ ခေါင်းထဲ နေလို့ထိုင်လို့ အဆင်မပြေတာ၊ဗိုက်ထဲမအီမသာဖြစ်တာရှိရင် ဒယ်ဒီ့ဆီ ချက်ခြင်းဖုန်းဆက်မယ်နော်။"
