أستغفر الله♡︎..
،.
"في مكان آخر"
.،
دخل البيت بخطوات هادئه وكان بيطلع الدرج لولا الصوت اللي وقفه: لا بدري... كان تأخرت زياده.
لف مفجوع وتنهد براحه: يمه... الحمدلله انها انتي فجعتيني.
ابتسمت بسخريه: ليه؟ عبالك ابوك؟
ابتسم بعبط: اي والله.. حسيتني بموت من الخرعه.
قربت منه ومسكت أذنه: اذا خايف من ابوك كل ذا الخوف ليه تتأخر ها؟ تكلم.
عفس ملامحه بألم: أي يمه والله يعور...
شدت اكثر على اذنه: تكلم ليه تأخرت؟؟
مسك يدها وهو يحاول انها تترك اذنه: يمه شفيك نسيتي؟ دقيتي علي وقلتلك اني مع براء كنا بالمستشفى والله العظيم.
نزلت يدها بتذكر: اي والله... وابتسمت: نسيت.
ناظرها وهو يفرك اذنه: عورتيني على الفاضي.
ناظرته بطرف عين: تستاهل ماجاك.
مسك يديها الثنتين وناظرها بجديه: يمه .... شرايك نوديك المستشفى احسك خرفتي وصرتي تنسين بسرعه.
ناظرته بصدمه وسحبت كفوفها منه ونزلت لنعالها (يكرم القارئ) ورفعته ورمته عليه، جرا هو ورقا الدرج وهو يضحك ولسوء حظه جا النعال ( اكرمكم الله)على راسه.
ولتفت لها ورجع يضحك ويدخل غرفته ويقفلها عليه.
هزت هي راسها بأسى على ولدها: اه ياذا الولد متى بيعقل ويريحني.
وطلعت لغرفتها هي وزوجها.
"فهد"
ناظر بدر جهته وقرب وجلس بجنبه وحط يده على كتفه وتنهد: فهد ... انا.
قاطعه فهد بدون مايناظره: يبيلك تخفف ايدك.
عقد بدر حواجبه: كيف؟
لف فهد عليه بجديه وقال: اذا رفعت يدك خففها واذا جيت بتنزلها على الخد شدها وحط كل قوتك واعطي الكف، جرب وصدقني بتجي معك.
مارد بدر وكان ينتظره يكمل لانه مو فاهم شي.
ناظره فهد وشهق: لاتقولي انك اذا عرفته ولقيته بتعطيه كف بس؟
تنهد بدر بعد مافهم قصد اخوه.
كمل فهد: لا ياحبيبي الكف مايكفي..الا اذا كنت انت بتعطيه كف بس وانا بمردغ وجهه بالتراب مااقول لا.
ابتسم بدر: فهد، انت ت..
ناظره فهد بملل: خلاص ياخي اعرف انك ماكنت تقصد ومازعلت لا تخاف.
ضحك بدر بخفه وهو يعرف ان فهد مايقول كذا الا عشان يخفف عليه وعلى نفسه ويعرف انه خايف من نتيجة التحليل مثله.
كشر فهد وحط يده على خده المحمر: بس ترا والله يدك قويه ماشاءالله عليك، كنت بتكسر ضروسي.
ناظره بدر بجديه: ان عدت كلامك او سمعتك تهبد من عندك كسرت راسك مو بس ضروسك ولا تفكر ان اختك يعيبها شي...فكر قبل تتكلم،،.
نزل فهد راسه بندم واردف: والله ادري انك تثق فجود اكثر من نفسك ومني بعد وجود رفيعة راس طول عمرها والغلط ابدا موب منها،، واعرف انك ماسويته الا عشان تتأكد اذا هذاك الكلب لمسها او لا لكن والله من غبنتي وقهري، وجود بعد اذا درت والله بتموت من القهر.
هز بدر راسه: الحمدلله، المهم جود ماتدري والباقي ييسره ربك ولاتنسى انو للحين ما تأكدنا اذا السالفه فيها كلب او لا.
ناظر فهد بتساؤل: اذا مافيه شخص وصلها لذي الحاله اجل وش صار معها؟
تنهد بدر يمسح على ملامح وجهه: مادري والله، عقلي مشوش مو قادر افكر.
انتهى من كلامه على جيت الدكتور وبيده اوراق وخمنو هم انها نتيجة التحليل، ووقفو قبال الدكتور ووجيههم تشرح مليون شي- خوف،قهر،توتر- فهد كان وده يصرخ لاتقول تكفى لكنه مسك نفسه، اما بدر كان يدعي، لان لو صار وطلعت مو مثل مايبو بتنتهي اخته من حزنها وقهرها.
وقف الدكتور قبالهم وشاف توترهم وطمنهم بإبتسامته: الحمد الله كل شي تمام.
تنهدو براحه وكمل: تقدرون تدخلون لها اللحين، واذا صحت بنفحصها ونحدد موعد خروجها.
هز بدر راسه بإبتسامه: مشكور دكتور ماقصرت.
الدكتور: ولو هذا واجبي.
تقدم فهد: عفوًا دكتور... معليش والله على اللي سويته... يعني كان س...
قاطعه الدكتور بضحكة وحط يده على كتفه: ماعليك مسامح.
حول نظره بينهم: الحمدالله على سلامتها وماقدامها الا العافيه.
راح الدكتور ودخلو عليها وشافوها كيف نايمه بسلام على السرير الابيض، قربو وكل واحد جلس فجهه.
مسك بدر يدها اليسار وباسها ونطق بعد ماتأمل وجهها لثواني: شبيهة امي.... ليش تسوين كذا فينا؟ تعرفين حنا مانقدر على فراقك ولا تعبك... كيف تنامين وتسوين بنفسك كذا؟ ها؟.
كان فهد حاط جبهته على قفى يدها اليمين: جود.. جودي حبيبتي... ت تكفين قومي... والله ابيع الدنيا واشتريها عشان تصحين بس..... والله يومنا من دونك مظلم... قومي قومي الله يخليك... ماراح ازعلك ولا ازعجك وبجيب لك اللي تبينه بس انتي قومي.
كان بدر يناظره بهدوء بعدها حول نظره لها وحط يده الاخرى على راسها وهو يمررها على شعرها: يانظر هالعين...هالليله مرت كانها سنين.
،.
مر وقت قرابة الساعتين او اكثر وهم على جلستهم ينتظرونها تصحى...
كان بدر جالس بالكرسي المقابل لها وهو يمسح على راسها ويتأملها، وفهد بالكنبه المقابله للسرير.
ناظر ساعته وكانت (4:12صباحاً)ورفع عينه لأخوه: بدر.
ناظره بدر، وكمل هو: بروح البيت بجيب لنا ملابس غير ذي وملابس لجود.
هز بدر راسه دليل على الموافقه: تمام بس لا تتأخر.. ورجع نظره لأخته: أبيها تصحى وحنا بجنبها.
وقف فهد وقرب لها وباس راسها: ابشر، تأمر انت وجود قلبي. ابتسم له بدر وطلع فهد متوجه لبيتهم.
.،
نزّل بدر يده ومسك كفها وشد عليه: اسف... والله العظيم اسف... ادري مابتنفع الحين ب بس ماكنت ناوي أتأخر عليك المفروض اكون رجعت لك العصر بس ليه اليوم؟ ليه؟..... نزل راسه وحاول يمسك دموعه بس خانته ونزلت ورفع راسه وهو يناظرها كيف نايمه : لو كنت داري انه بيصير كذا ماكنت اهتميت بالشغل ولا الشركه.... جود انتي تعرفين كل همي انت وفهد و و..... تنهد ومسح دموعه: قومي يانظر عيني.... قومي وريحي قلبي انك بخير....
شد على يدها وعض شفايفه بغضب: قومي وقولي لي من اللي وصلك لذي الحاله؟ مين؟ بس انتي اصحي وقولي مين.... والله والله لأدفنه وهو حي والله لخليه يتمنى الموت ومايلاقيه.. والله لخليه يتمنى انه ماطلع من بطن امه...
.......،
دخل ورفع نظره من شافه كيف حاط راسه على طرف السرير وماسك يدها، ابتسم وقرب منه وهو يحط يده على كتفه ونطق بكل هدوء: بدر.... بدر
فتح بدر عيونه وناظره وحرك رقبته اللي تألمه من نومته الغلط: ليه تأخرت انت؟؟
حط الكيس اللي فيه الاغراض على جنب: بس بدلت وجبت لك ولجود بعد.... وناظره: صليت؟
ناظر ساعته ووقف بسرعه: لا والله نمت وماحسيت وناظره بتساؤل: وانت ساعتين عشان تبدل بس؟
جلس فهد ونطق: لا كنت بالمسجد.
ابتسم بدر وهو ياخذ الكيس ويتوجه للحمام( الله يكرمكم) عشان يبدل هو بعد وخرج منه ونشر سجادته وصلى ودعا ربه انه يشفي اخته ويخليها لهم... انتهى من صلاته ووقف وجلس بجنب فهد السرحان: ليش للحين ماصحت؟
تنهد بدر: ان شاء الله بتصحى اللحين و.... بتر كلمته من لف نظره لها وشاف عيونها اللي تنفتح وحركة يدها اللي وضعتها على راسها، فزو وقربو منها ونطق بدر: جود حبيبتي.... الحمدلله.
ضحك فهد بفرح: جودي..بدر صحت اخيرا صحت.
.،
فتحت عيونها وناظرتهم وبعدها حولت نظرها فأرجاء الغرفه، فزت وجلست وهي تطالعهم ونزلت دموعها وطلعت منها شهقه.
مسح بدر على شعرها: جود... فهد روح نادي الدكتور بسرعه
طلع فهد وهو يسابق خطواته،، وناظر بدر جود اللي تبكي واضح الخوف فيها اول مافتحت عيونها: جود حبيبتي.. خلاص لاتخافين انا هنا بجنبك.
ناظرته ونطقت بين شهقاتها: ب بدر تكفى لاتروح وتخليني ت.... سكتت لما سمعت صوت الدكتور اللي دخل مع فهد.... ناظرته بخوف وضمت رجولها لصدرها وحطت راسها على ركبها: لا يقرب تكفى بدر ل لا شهقت بين دموعها وكملت: لا تخليه يقرب مني.
حضنها بدر بخوف عليها ومن بكائها الهستيري : لا تخافين ماحد بيقرب منك وانا موجود... قرب فهد بخوف من حالة اخته وابتسم عشان يخفف عليها: جودي... ناظري فيني.. وحط يده على راسها اللي بحضن بدر: ارفعي راسك وناظري فيني.
رفعت عيونها المليانه دموع له وهي مخبيه راسها فصدر اخوها.... ابتسم فهد ونطق بنبرة حانيه: لاتخافين حنا معك.... شايفه ذا، ورفع يده على الدكتور: دكتور جا عشان يعالجك ونرجع البيت تمام؟
حولت نظرها بين فهد والدكتور وسكتت لثواني وهزت راسها دليل على الموافقه.
.،
