أستغفر الله♡︎..
،.
في عاصمة ايطاليا "البندقية"
.،
واقفه قبال الدكتور ودموعها شلال على خدها عجزت توقفها، وماسكه يد اخوها الصغير اللي يبلغ من العمر6 سنوات....ناظرت في الولد الصغير ورفعت نظرها للدكتور تطلبه برجاء....
( النقاش بالايطالي)....
ميرال بدموع: ارجوك دكتور قل غير هذا الكلام.
الدكتور: انا اسف لكن يجب عليكي دفع المبلغ كاملًا من اجل اجراء العملية لوالدتك.
ميرال برجاء وضعف: من اين سأحضر هذا المبلغ ارجوك دكتور فت...
قاطعها غير مبالي لدموعها ولا للطفل الصغير الذي تحتضن يدها الصغيره يده: لايهمني اذا اردتي لوالدتك العيش احضري المبلغ من اجل تكاليف معالجتها والا فالتبحثي عن مشفى آخر.
التفت بيمشي عنها ولكن تشبثت بمعطفه الابيض: تكفى دكتور تكفى.
ناظرها وعقد حواجبه من غير فهم لكلامها: لا أفهمكي تكلمي بالايطاليه.
تنهدت وهي تحاول اظهار القوة من اجل اخيها الصغير:حسناً سأحضر المبلغ، لكن ليس كاملًا بل نصفه، والنصف الاخر مع الايام اسدده.
ابتسم الدكتور ابتسامة جانبيه: أيْ تقصدين دين؟
هزت رأسها وهي تدعي الله يقبل لأن ذي اخر فرصه لها، ماتقدر تدفع المبلغ كامل، وامها عندها فرصة شهر بس واذا ماسوت العمليه بتفقدها، ماتتخيل حياتها من دون امها، ولؤي وش بيسوي وكيف بيتخطى موت امه فذا العمر؟ هي تعرف شعوره مات ابوهم وهو بعمر السنه.. مرت 5 سنوات وللحين ماتخطت ولا راح تتخطا... كيف بتتخطا الحين الشخص اللي كان لهم الام والاب والاخت والاخ؟ كيف بتكون حياتها هي ولؤي من دونها؟.
،، صحت من سرحانها على شكل الدكتور اللي حاط يده تحت فكه دليل على التفكير وهز راسه بموافقه: حسنًا انا موافق، يمكنكي تسديد باقي المبلغ بعد عملية والدتك.. ولكن عليك الان احضار النصف.
ضحكت بفرح وهي تحضن لؤي: اخيرا ياربي الحمدلله ورجعت تلتفت للدكتور وتكلمه بلغته عشان يفهمها: شكرًا لك دكتور لن انسى لك هذا المعروف ماحييت.
هز الدكتور راسه بإبتسامه: العفو هذا واجبي.
مسحت دموعها وعلى وجهها ملامح الفرح وكأنهم زفو لها خبر علاج امها.... عندها امل بان امها بتوقف على رجولها وبيجي يوم ويرجعون لبيتهم بعد ماجلست سنه كامله وهي تروح وتجي لأمها اللي تدهورت حالتها فالايام الاخيره: نقدر ندخل لها دكتور؟
هز راسه الدكتور: لا، يفضّل ان تتركوها الليله يجب ان تستريح.
هزت رأسها بإحباط: حسنًا دكتور، شكرًا لك مرة اخرى.
تركها الدكتور وتوجه لمكتبه، التفتت على لؤي اللي دموعه تنزل بصمت، شهقت وحاولت تمسح بقايا دموعها بسرعه ونزلت لمستواه وهي تمسح دموعه: شفيه اميري الحلو مين زعله؟
رفع اكتافه وطلع شفته السفليه بطفوليه: ماعرف بس شفتك تبكين والدكتور كمان يقول انو ماندخل على ماما.
مسحت على شعره وقربته لحضنها: انا ما ابكي هذي عيني بس دخلت فيها تراب مدري رمشه.
بعدته عن حضنها وهي تفتح عينها على وسعها: شوف شوف كيف صارت حمرا بالله لولي شوف لي اذا فيها شي.
قرب منها وهو يناظر عيونها ببرائه: لا مافيها الا اللون البني.
ضحكت وهي تقرص خدوده: حبيبي اللي يفرق ويعرف البني من الاسود، كبرت ماشاءالله وصرت أمير حقيقي.
بعد وجهه عن يدينها وهو عافس ملامحه: طيب ليه ماندخل على ماما ها؟
تنهدت وهي تحط يديها الناعمه واللي من بياضها صارت مائله للون الوردي على خده: لؤي حبيبي ماما بخير هي اللحين تبي تنام خليها ترتاح وحنا بنرجع لها بكرا تمام؟
نزل راسه بزعل ورفعت راسه بسبابتها: شفيه اميري ها؟ واردفت لما ماسمعت منه رد: لؤي انت تبي ماما تزعل؟ تعرف ماما اذا سهرنا لوقت طويل تزعل وكمان اذا ماخليناها تنام برضو بتزعل خلينا نرجع البيت ونسوي عشا شرايك؟
رفع عينه لها ومارد وكملت هي: وحنا راجعين للبيت بشتري عصير كبييير يكفينا يومين، ها وش قلت،
ابتسم وبانت غمازته وضحكت هي تقرص خدوده: يازين الغمازه ياناس يازينها، موافق؟
هز راسه بموافقه: موافق، يلا خلنا نروح.
هزت راسها بلا: نسيت شي اول.
وحطت السبابه على خدها، قرب منها وهو يضحك ومسك وجهها بيدينه الصغيره وقبل خدينها وجبهتها وخشمها وفكها، ضحكت ووقفت وهي تمسك يده وناظرت غرفة امها واردفت بصوت يسمعه لؤي: استودعك الله الذي لاتضيع ودائعه.
ناظرها لؤي ونزل نظره لغرفة امه وحاول يقلد منطوقها للدعاء لكن فيه كلمات صعبه عليه، ضحكت وطلعت من المستشفى.
،.
