مصدقتش نفسى الا لم ركبت عربية ناهد
عربية اخر موديل حمرا و فخمة تعملها بالمية مليون جنية
و المضروبة ناهد كمان واخدة بالها من نفسها لبس غالى و شيك و ابن ناس مش لبس الحوارى اللى بلبسة
و ابيضت..بجد البت دى كانت سودة و مقشفة حرفيا العز بقى و اكل الوز
قالتلى : دى راحة بال يا حبيبتى.. الفلوس بتريح البال و تحلى البنى ادم
************
مصدقتش نفسى تانى اييييييييييه العز دة كلة
دة بيتك يا موكوسة
-ايوة فيلا صغننة محندقة على قدى
-ياروح امك محندقة..صغننة..دى و لا الف فدان
-الله واكبر ( وخمسة ف وشى بكف ايدها و هى فاردة صوابعها الخمسة) انتى لسة فيكى الخصلة الوسخة دى
-لا انا تبت بس علشانك انتى رجعت تانى
اضربها ف كتفها " مربربة بنت الكلب "
بهز معاكى يا ناهودتى
*******
وقعدنا بقى ف البهو الفخم و شربنا و اكلنا من كل اشى
و حكتلى ع كل حاجة حصلت معاها فى الكام سنة اللى فاتو و ازاى اتعرفت على جوزها و وقعته فى شباكها
و اتجوزو و اطلقوا و طلعت منه بكام مليون و العربية و الفيلا و اهى مستورة
-عارفة يا ناهد انا نفسى اقع وقعه زى بتاعتك دى
مصمصت كدة و عنيها حزينة: كل حاجة و ليها تمانها
تقف و تمسك ايدى
-تعالى اوركى اوضتك اللى ح تنامى فيها
-انا بايتة معاكى الليلة دى بس زى ما اتفقنا .." بهزار " بس مفيش مانع تتبنينى اعيش معاكى
-طول عمرك زبالة يا بت يا ليلى ههههههههههههه
***********
الفرش كان ناعم اوى و هدوء ماللوش حل
و ريحة الاوضة برفيم من المعتبر
بس انا من طبعى معرفش انام فى مكان جديد عليا
بس هنا لأ
معرفش نمت ازاى زى القتيلة
كانى مخدرة
نمنا الساعه 3 بعد نص الليل
ناهد فى اوضتها و انا زى ما قالت لى اوضة الضيوف
و باقى الفيلا فاضية
حتى محلمتش
متهسألى صحيت على العصر كدة
راسى تقيلة و ريقى ناشف و جعانة اوى
ياترى ح نطفح اية ؟
*******
و على العشا كنت فى الحارة
بوسة من خدى اليمين و تانية من الشمال كدة ودعتنى ناهد عند بيتى
-لازم اشوفك تانى
-اكيد يا قلبى موبايلى معاكى
***
امى : لساكى فاكرة
-ف اية يا اما
-مش قلتلك ابقى كلمينى
-ما انا اهو قدامك هو انا لحقت سواد الليلى
-ماشى براحتك انا كنت جيبالك خبر حلو
نطيت قعدت جنبها: خبر اية ؟
-جيبالك شعلانة سقع
-شغلانة عسل اوى اهرى
-واحد عندة سلسلة مطاعم كشرى ف وسط البلد عاوز بنت كاشيرة من اللى بتلم الحساب بمرتب الف جنية ف الشهر
-الف ايييييييييييييه...؟؟؟؟؟ لية بشحت......؟؟؟
-ياهبلة بقولك راجل عندة سلسلة مطاعم
-و الف ج.........
-اهمدى بقى مش مهم المرتب المهم الراجل
-ااه فهمتك اوقعه
-دة عريس لقطة
-و السفى بتاعه اية
-حلو 65 سنة و عامل قسطرة ف القلب يعنى رجل جوة و رجل برة
-حلو اوى دة و متجوز و لا ارمل
-لا مطلق
**********
ع الفجر كدة
حسيت بوجع فى بقى
زى عضمة رفيعه بتشكنى فى لسانى
حسست عليها براحة بطرف لسانى
بس ماكلتش حاجة فيها عضم او شوك سمك هو طبق الفول
اكيد قشرة فول محشورة بين سنانى
و من كتر عمق النوم مكنتش مركزة ح اعرف بعدين انى كنت غلطانة و وقعت فى اكبر مقلب نداله ف حياتى
و بضمير نقى بزيادة
نمت من تانى
*
