My Unwanted Existence (Game of Love Series #1)

Chapter 1

"Cara, anak, kakain na tayo," tawag sa akin ni Tita Samantha mula sa labas ng aking kwarto.

Mabilis kong isinara ang kurtina ng aking bintana saka ako tumakbo patungo sa pintuan. Isang matamis na ngiti ang isinalubong ni tita sa akin pagkabukas ko ng pinto.

"Sige po, Tita. Susunod na po ako," nakangiting paninigurado ko.

"Sumunod kaagad, anak ha, habang maiinit pa ang pagkain," paalala niya na kaagad ko rin namang tinanguan.

Kaagad kong isinara ang pinto pagkaalis nito. Muli akong bumalik sa may bintana at tinanaw ang malaki nilang swimming pool. Wala na pala si Lucas; marahil ay nakapasok na sa loob ng bahay.

Simula pa noon, palagi ko na siyang pinanonood mag-swimming. Ang swerte ko nga dahil sisilip lang ako sa bintana ng kwarto ko ay makikita ko na siya. Hindi naman pwedeng doon ako mismo sa baba manood dahil paniguradong mapapaso na naman ang tainga ko sa mga maaanghang na salitang sasabihin niya sa akin.

Pagkatapos mag-ayos ay kaagad din naman akong bumaba sa may dining. Nandoon na sina Tito Luke at Suzy, ang kakambal ni Lucas.

"Daddy, can I go?" malambing na tanong ni Suzy sa ama.

"Hija, kain na," ani Tita Sam.

Kaagad akong umupo sa tabi ni Suzy na hanggang ngayon ay hinihintay pa rin ang sagot ni Tito Luke.

"Saan ba ang tungo niyo?"

"Sa mall lang po, Daddy. Kasama si..." Sandaling napahinto si Suzy at nagdadalawang-isip pa kung itutuloy niya ang kanyang sasabihin.

Nagtaas ng kilay si tito. "Kasama sino?"

Napakagat-labi si Suzy. "Sina Ate Zena po," sagot niya, tukoy sa pangatlong anak nina Tito Matteo at Tita Zyrene. Mga kaibigan ni Tito Luke.

"Sino pa?" muli pang tanong ni Tito Luke, maging si Tita Samantha ay naghihintay na rin ng sagot. Napalingon naman ako sa may entrance ng dining, nagtataka pa rin kung bakit hindi pa bumababa si Lucas.

"Ba-baka po sumama rin sina Zafara at Tammarie. Nagpapatulong po kasi sila para sa prom," sagot ni Suzy rito.

Si Zafara ay ang bunsong anak ni Tito Zach. Samantalang si Tammarie naman ay anak nina Tito Timothy at Tita Tine. Halos ang mga kabarkada namin ay anak din ng mga kabarka ni Tito Luke kaya naman halos magkakapatid na rin ang turingan ng mga ito.

"Sina Zafara at Tammie lang? How about Kendall?" Si Tita Samantha naman ngayon ang nagtanong. Si Kendall naman ay ang nag-iisang anak na babae nina Tito Kervy at Tita Grace.

"Maybe?" alanganing sagot ni Suzy.

"If kasama si Kendall, siguradong kasama rin si Ken. It's a no, Suzy," biglang singit ng kararating lang na si Lucas.

Napanganga na lang ako dahil sa kanyang pagdating. Basa pa ang buhok nito, mas lalo siyang gumwapo. Kahit ano naman yata ang ayos niya, ganoon na talaga siya. Gwapo.

"Daddy..." tawag ni Suzy rito, humihingi ng tulong.

"Suzy, wag nang makulit," ma-awtoridad na sabi ni Lucas sa kapatid habang abala sa pagkuha ng pagkain.

Hindi na nakaimik pa si Suzy, napayuko na lamang at itinuon ang buong atensyon sa kanyang pagkain.

Ang aking buong atensyon ay nasa kay Lucas. Ganoon talaga siya pagdating kay Suzy. Kahit nga yata lamok ay hindi niya hahayaang makalapit sa kapatid. Nagrereklamo si Suzy minsan sa akin dahil sa sobrang higpit sa kanya nito. Imbes naman na sumang-ayon ay nakararamdam ako ng inggit minsan.

Nanlaki ang aking mga mata nang makitang kong matalim ang tingin ni Lucas sa akin. Nakabusangot na naman ang kanyang mukha at para bang ako na naman ang may kagagawan kung bakit masisira ang araw niya.