D taɛɛeǧǧaǧt n lmuta
I d-iyi-sxewḍen temẓi-w
Ṛuḥen kan baba d yemma
Teɣli tgejdit n lfaṛḥ-iw
Ajgaggal n lmizirrya
Yuɣ amḍiq di ddunit-iw
Ḍḍefṛaɣ lkas d lǧebba
Tewwet rrba deg uxxam-iw..
Cfiɣ ass mi akken ffɣeɣ ṛɣiɣ
A ṭaṛḍḍiqen yidmaren-iw
Σecrin urɛad iten-bdiɣ
Mi d-fṛuṛxen laɛyub-iw
Γef teḥdayin ttnadiɣ
A sargel yekkes i lɛacq-iw
Γef xenfuc tagara ɣliɣ
D iceqfan yebḍa nnif-iw..
Iffuk waḍu lemḥibba
Iluḥeq-d waḍu n tdukli
Yewwi-yi yid-s qbala
Isḍḍal-iyi deg yefri
Anda ma llant tlufa
Yid-sent akk izewǧ-iyi
Ur d asent-briɣ ara
Armi cabbeɣ di temẓẓi ..
A turra dayenni
Tirgett-iw texsi
Siwa tissirt n ndamma
I d-yeggran teẓẓa-d deg-i ..
Taqṣiṭ n ddunit-iw
Yecfa-as-d mkul lawan
Yefsa, yeǧǧuǧeg lḥif-iw
Deg ul-iw yefka iẓuṛan
Swayeɣ-t s yimeṭṭawen-iw
Iḥaṛ yak deg-i imeḍqan
Yeṭṭef-iyi ccib di temẓi-w
Ḥefḍaɣ tilufa n zzman ..
Ulac abrid ur wwiɣ
Ur telli teɣɣmaṛt zegleɣ
Ass-a ḍḥid fecleɣ, ɛyiɣ
Di tezmart-iw i tt-uɣeɣ
Si texwcact n ndama swiɣ
Ur d-ukkiɣ armi qlalḥeɣ
Si laɛyub n zzman ččiɣ,
Ččiɣ, ilaq ad xelṣeɣ ..
Temẓi-w tewser aksum teqquṛ
Ass mi s-tecṛeḍ lemḥibba
Terra-tt amzun d azaṛzuṛ
Yeggran ur yuffig ara
Meskin yencew seg unaɣuṛ
Iṭij ur s-yezmir ara
Atmaten-is cergen lebḥuṛ
D taṣmuḍḍi deg i ttafen ddwa ..
Fkiɣ-as lebɣi i ṛṛay-iw
Ḍefṛaɣ acrurred n tullas
Taggara wedfaɣ temẓi-w
D ssuq n lḥif d tburdas
Γer lemri sakkedɣ udem-iw
Tacmatt ufiɣ teḍla-as
Ccib yeṭṭef aqaṛṛuy-iw
Am udfel yessa fell-as ..
Nwiɣ ur d tidireɣ ara
Aṭṭan n lḥubb d timqestin
S kra n win i ɣef iɛedda
Udem-is akk cergent lesnin
Ziɣ mazal fell-i asigna
Di gedrez iyi ggunin
D taddukli ay d ssebba
D leḥbab ad iyi-rwin ..
D laman i d-iyi-kelxen
Rriɣ akk meden d leḥbab
D ṛṛay-iw i iyi-sburren
S tqecabit laɛtab
Yebra-yi deg yiɣemɣumen
Am wid ur nesɛi ara bab
Kul tiɣmaṛt at-id wten
Kul acṛuf degs i-neqqlab
Ur faqqaɣ faqen akk medden
Ziɣ mazal deg-i nniya
Ass-a kullec d idrimen
D nutni i d tirrugza
Ma telliḍ seg wid ixuṣṣen
Dek ad yaṛṛwu zman taḍṣa
Γas d ccmata i ten-ikesben
Anda yedda d laɛnaya !
Ddunit akka i tebna
S yiḥaṛqan akked ctawi
S lisar akked lmaḥna
S wungif akked uḥṛaymi
S lḥif n wadi akked wa
S wayes i yerbeḥ wa-gi
Mi ɣ-tewweḍ twecrirt lqa
Neqqaṛ-d sidi Ṛebbi ..
Muqqel tiyita ansi i ak d-tekka
Ad taffeḍ d sidi bnaddem
Iked iḍḍeqaṛen lmeḍla
Ar leḥq-ik akken ad t-yeddem
Sidi Ṛebbi d lqedṛa
Ur yelli ara d imesṭṭlem
Am kečč am wadi, neɣ wa
Seg-naɣ ulac win t-yessnen ..
Ur deqqim deg-i tqeṭṭiṭ
I d-igezren d aɣuṛṛu
Seg wass mi yi-gezmen timmiṭ
I itenneḍ felli wagu
Kkiɣ-d iɣẓeṛ am tceṭṭiṭ
Ḥefḍeɣ mkul daɛwessu
Weṣṣaɣ-k a bu yiwet n ṭiṭ
Ur ggan yis-s deg temmu ..
Ya win swaɛden medden
Ṭṭef iṣuḍaf, trewleḍ
Gar wid-ak akk i k-yesnen
Siwa lḥif ad temlileḍ
Qelleb ɣef wid ur k-yessinen
Aɣṛum gar-asen ad t-teččeḍ
Ad k-salin, ad k-cekṛen
Di summa ad taɣlayeḍ
Anda akken k-snen meṛṛa
Akken telliḍ ay teswiḍ
Anda ur tettwasneḍ ara
Akken telsiḍ ay teswiḍ
Amdan i ɣef ur tettkileḍ ara
Zwer-it zdat-k ad t-walliḍ
Ma iɛaṛḍ-ik-id ɣer lmakla
Aɛrrur-ik senned-it ɣer lḥiḍ.
Ur d-ǧǧan yimezwura
Ayen ara d-nebder nekkni
Argaz lqedd tṛuka
Yella deg awal: d Umerri
S lkuṛaǧ d tirugza
I yettḥaṛab aṛumi
Ass mi yeɣli ghef lǧefnna
Ssebba, d sidi Aqbayli !
Weṣṣaɣ-k ay uḍṛif
D tmeyiz ṛẓen tikli
Ma tqaṛbeḍ assif
Zger anda ur k-yettawi
Taḍṣa n wuglan tettɣuṛṛu
Tessawal i daɛwessu
Ad k-yefk yinijjel i yefri
Γef ɛebbuḍ bnaddem i ileḥḥu
Am yizrem i yettṣuḍu
Izemr-as siwa Rebbi .
Win ad k-yesqaṛḥen
S tidett ur nesɛi ara ddwa
D netta ay zeglen
Tifxett ur k-tettḥaz ara
Bnadem ara k-id yesfaṛḥen
D netta ara k-inefḍen
Ma yella ur tebniḍ ara
S kra n umdan yettamnen
Ayen yak zerɛen medden
Ssaqf-is yezga yaɛra ..
Win k-id-yesteqsan
Liḥala-k amek tella
S taḍṣa n wuglan
Zmumeg-as ad yesteqna
Ini-as aqli-yi labas
Γef yiḍ yezga yuli wass
Seɛeṛq-as ayen yebɣa
Hder-as ɣef lǧebba d lkas
D wanda akk i wwḍen leǧnas
Ul-ik ur s-tesnaɛd-t ara ..
Ur t-ttamen ara
Ad ak-yini ekker ad tt-id nesker
Ad k-yeḥwiǧ ass-a
Azekka ad k-iḍeqqeṛ
A win k-innan ma teḥṣiḍ
Anwa laṣṣel deg i d-temɣiḍ
Ini-as d mmis n lzzayer
Tewɛaṛ twaqsa n uṣemmiḍ
Yewɛaṛ ma ad k-id-yerr lḥiḍ
Yewɛaṛ ubrid n liser .
Zemren mi d-ṛuḥen
Ad ak-d-smunzun tiqṣiḍin
Ad tekiḍ yid-sen
Allaɣ-ik ad ak-tarwin
Ma yella kra ur teẓwiṛeḍ
I temsal ur t-ḥebbṛeḍ
Tawaɣit ad k-terr d aɛwin
Wa ma ma yella tfahmeḍ
Tqebleḍ ɣas tettmeyizeḍ
S lesrar ad tqableḍ lesnin ..
Xḍu-k i ttnefxa
Eǧǧ-asen i meden ad k-cekkṛen
Ur sfuǧǧuɣ ara
D yir awal a k-inefḍen
Gar-asen abrid nǧeṛ-it
Ma di laṣṣel d msakit
D tɛici tamɛict-nsen
Win teẓṛiḍ yefhem simen-it
Sser-is qelleb issin-it
Kufer-as deg wafriwen !
Lhi d ccɣel-ik
Muqel abrid yessufuɣen
Ṭṭinez ɣef waraw-ik
Mur yella deg acu xuṣṣen
Ur snefsus i lǧib-ik
Ldi kan cciṭ afus-ik
Γas farreq deg yimdanen
Win ad yaẓẓen ɣer nnif-ik
Dinna xas ɛamṛ lfuci-k
D aḥlalas ad tt-ilaɛben.
# Matoub Lounès.
