Yeḥzen Lwad Aεisi
Mi yebda imenɣi
Yewweḍ-iten lεeskeṛ deg yiḍ
Tuddar slant irkelli
Ṣubbent ɣer Tizi
Kul abrid a yettfeggiḍ
Ayen a yettfeggiḍ ?
Ur telli d tisselbi
Neḥwağ tilelli
Uqbel ad aɣ-ḥeṛṛen ɣer lhiḍ.
Akken nella zik ad nili
Ma yella imenɣi
Win immuten ad d-yennerni mmi-s
A wid iḥekmen ayenni
Ur nelli d ulli
Tamurt iban-d lsas-is
Tamaziɣt ad tennerni
Arṣeḍ ad yeffi
Kul lḥağa tesεa bab-is.
I tmes i iceεlen ma ad texsi
Yeqqim-d usteqsi
Uzzal igzem-it ṣṣdid
Ma d lεeskeṛ yewweḍ Tizi
D lbaṭel i yewwi
Γer Lezzayer yegzem ubrid
Ayen yegzem ubrid ?
Tendeh tmurt irkelli
Begset ya lɣaci
Γurwat ad ɣ-cudden s lqid !
Teggra-d s idim ma yeɣli
Nnif ad d-yali
Si zzman nesfa-d ur nerkid
Ayen ur nerkid ?
Ṛṛuman seg-neɣ yebbi
Wi d-yusan yebbi
Nezga nezdeɣ di ttweḥid
Xas εeddan leqrun nugi
Neched s ujenwi
Mi ɣ-d-wwin awal ajdid.
S yeqjan d leslaḥ begsen
Akken ad kublen
Widak i d-yeggurreεn tidett
Acḥal deg widak ḥebsen
Ur neẓri ma ddren
S iciwi rran-aɣ tirgett
T-tirebba i ten-id-ceggεen
S leslaḥ-nsen
Wehhan-asen adrar ččet-tt.
Di ṛebεa u εecrin yid-sen
Begsen-d wwin-ten
Mi tzehher tmes di Tizi
Ttun sεan atmaten
Ara ten-id-yessufɣen
Myefkan lεahd irkelli.
Beḥten-ten, wwten-ten
Ulac acu ur sen-xdimen
Ad d-inin ayen ur nelli
Ğeṛğeṛ yefṛeḥ mi d-ffɣen
Yark yeḥwağ-iten
Mlalen-d di Lwad Aεisi
Ma d widak yessefsaden
Ass-a nerna-ten
Ssqef n teεdawt yeɣli.
# Matoub Lounès.
