Yekkes-as i zznad uckal,
Ma d times tecɛel
Rṛsas di tmurt yettmiri
Wa yemmut, wayeḍ yerwel
Iḥkem-d lhal
Di lehna yewwet iɣisi ..
D lḥif, d laẓ i iqubel
Mi yekker ad yehmel
Uqcic ɣer lbeṛṛani ..
Yeḥkem ɣef yiri,
Yura ɣef yixef-iw
Lefraq gar-anaɣ
Ur ttrut fell-i
Kulci yettɛeddi,
A lwaldin ḥemmlaɣ ..
Ur ttru a yemma,
Ilaq a baba,
Ad tsebṛem fell-i..
Teḍḥa-d lgirra,
Ammer azekka,
Si ṭṭlam ad d-naki
Ma iruḥ ɣer lɣerba
Mmi-t-wen ass-a,
D aɣrum ara inadi ..
Teckulleɛ-d deg-i,
Udem-is am lemri :
Weltma tamecṭuḥt;
Tejbed-iyi-d weḥd-i,
Tekker temla-yi,
Γef lemnar n tewwurt,
Tenna-d: Gal-iyi,
Ma d-tezziḍ ɣur-i,
Glu-d s tqendurt a gma ḥnini ..
Iẓri-w seg wurfan
Icuba ssebyan
Ur nesɛi dduḥ,
Γef ul imeṭṭawen
Bran d isaffen,
Ad nejṛen di ṛṛuḥ
Γer tin ɛzizen
Mi tt-qublent wallen,
Neddfen akk lejruḥ.
" - Yuggi-yi wul ad kem-ǧǧaɣ
D lmouḥal ɛewqaɣ,
A tin ɛzizen fell-i..
Ad kkraɣ ad inigaɣ
D ssmaḥ ad am-ḍelbaɣ
Aṭas i agh-tecrek tdukli ..
Dɛu-yi ɣur-m ad d-ḍewraɣ
Ma twalaḍ ɛeṭlaɣ,
Xas zzweǧ, ruḥ thenni .
- Awal i d-bedreḍ qerreḥ,
Deg ul ijerreḥ
Amek ara kregh ad zewǧaɣ ?
Di tdukli tḍelbeḍ smaḥ,
Ad tfarqeḍ s rrwaḥ
Arwaḥ-ik kecc ad t-ḥesseɣ
Mennaɣ-ak abrid n rrbaḥ
Ad k-ɛassen ssellaḥ
Ruḥ di laman, ad sebraɣ."
Yenjer ubrid i lmeḥna
Teḍleq lɣerba ssem-is
D ajdid ɣer ɣur-s i d-yerza
Aqcic ad yennaɣ laẓ-is
Yeɣli-d lbatel am lehwa
Wid ur iɣad tetten tidi-s..
Yettbedda ɣef kul amnar
"Fket-iyi lxedma a lɣaci"
Yesber i lḥif d ujeddar
Fell-as ɣellin-d d abruri
Ul-is seg urfan yeqbar
Yeǧǧa axxam di lemḥani ..
Di taddart, teḍra twaɣit
Zzman yefra-d ccɣel-is
Ccedda tsebleɛ talwit
Lmut, tnuda lḥeq-is;
Lgirra, axxam thudd-it
Mmuten akk lwaldin-is ..
Zzman yettawi-d wayeḍ
Ass-n mi d-yeṛkeḍ
Tamurt i deg yetturebba
Yekker, s axxam ad yaweḍ
A tidett tɛetleḍ !
Aqcic, ad kem-iẓar tura;
Yufa axxam di lqaɛa, yenfeḍ
Rruḥ ma tenfeḍ
Mi iruḥ, yekker yesteqsa :
" - Uh ya leflani,
Eyya-d qim yid-i,
Hku-yi-d ayen yeḍran;
Ini-yi-d kulci,
Ur teffer fell-i,
Wid d-ǧǧiɣ anida ddan ?
- Tidett ad ak-tt-iniɣ,
Yir tagnit cfiɣ..
Cfiɣ ass-n mi mmuten !
Γer tentelt ddiɣ
Deg yifassen-iw i wwiɣ
Weltma-k mi s-ɣelqent wallen..
Tinna akken ara taɣeḍ,
Ass-agi ad tt-tezreḍ,
Tedda d tislit ilindi ..
Sber ma tsebreḍ
Atas i tɛetbeḍ
Eyya-d ad tiliḍ ɣur-i."
Yeggul i medden ard iḥjeb,
Yetterra ttlam d arfiq-is;
Di lmux-is yebda aqelleb,
Yessimṛiɣ di ddunit-is;
Ulac lmeḥna ur ijeṛṛeb,
Ameẓyan, icab yixef-is ..
Fell-as ttɛeddin leɛwam,
Lehlak, deg-s ur yenqis;
Udem-is, itbeɛ-it lhem
Imal ubrid ɣer lḥeq-is
Yiwen wass, tewwet-d s axxam,
Lmut yewwin lwaldin-is .
# Matoub Lounès.
--------------------------------------------------------
Je voudrais remercier #Y_Bombastico pour son aide précieuse. Encore merci !
