مسألة انتقام

الجزء 3

الجزء الثالث :
بعد موقعات ليا هاد المصيبة لقيت راسي مرمية فواحد الزنقة خاوية وسط تمارة ،لابسة حوايج قدام و مصدومة بحال شي حمقة ،أول حاجة فكرت فيها مع الذوخة هي نمشي كنجري للمحطة و نرجع لدارنا فوزان و انا نتفكر بلي معنديش الفلوس و بلي أنا مبقيتش بنت، بأي وجه غادي نرجع للدار و نقولها لدارنا و للواليد ديالي! صافي حياتي تدمرات خسرت كلشي ، بديت كنبكي و شافني واحد الولد جا كيسول فيا : مالك اختي ؟ قلت ليه خاصني اخويا غير باش نركب الا ممكن تعاوني ؟ و هو يعطيني مسكين باش نركب و رجعت للحي الجامعي.

دخلت و دوشت و بدلت حوايجي و بقيت كنبكي بزااف حتا ضروني عينيا و بديت كنفكر واش نقولها لدارنا أو نخبي هادشي؟ و فكرت بلي إلا قلتها ليهم الناس فوزان مغاديش يرحموهم و غادي نكون بحالا جبت ليهم العار و قررت منقولهاش ليهم و نبقا مع هاد المصيبة بوحديتي، كنشوف فالكتب محطوطين قدامي ،صافي كلشي سالا ماكاين لا قرايا لا حلم لا والو كلشي مشا و سالات حياتي الدراسية.
خرجت مشيت لعند الدرك الملكي ديال تمارة لكيتحكم فهاديك المنطقة باش نتقدم بشكوى ، و دخلت عند واحد الدركي عاودت ليه شنو وقع ليا و هو يجاوبني ببرودة أعصاب: خاصك تعطينا الأسماء ديال هادوك لخطفوك أو العنوان ديالهم و سيري عند الطبيب ديري شهادة طبية عاد اجي باش تقبل منك الشكاية!!! صدمني بزاااف بهاد الرد !! كيفاش انا نعطيكم الأسماء و العنوان ؟؟ و انا مخطوفة و مكنعرفهمش أصلا؟ و حتا بلاصة معرفتش فين كاينة؟؟ تصورو معايا الإحساس ديالي ملي سمعت منو هاد الهدرة و أنا باقية مجروحة و قبل ساعات كنت مع 5 ديال المجرمين كيغتصبو فيا !! حسيت بلي هاد الجواب أكبر إهانة ليا بعد ما تعرضت للإغتصاب.

خرجت و مشيت عند واحد المحامي قلت يقدر يشكل ضغط و يلقا شي حوايج باش الدرك يشد هاد العصابة و لكن زاد كمل عليا و عاود ليا نفس الهدرة : ضروري تعطيني الأسماء ديالهم أو العنوان و تجيبي شهادة طبية و تسبقي ليا شي حاجة ديال الفلوس! فهاد اللحظة حسيت بالذل و بلي الدنيا كاملة ضدي و بلي أنا بوحديتي و مكاين حتا واحد يقدر يوقف معايا، ملي كنت خارجة من عند المحامي حسيت بالحگرة بزاف و بداو دموعي كيسي لو بوحديتهم بحالا الغلط ديالي انا، مكنتش كنتوقع انه غادي يعاملوني هاد معاملة بحالا انا مجرمة ماشي ضحية حسيت بلي القانون حتا هو ضدي و بلي ماشي غير هادوك 5 لظلموني لا كلشي ظلمني.
رجعت لبيتي و جلست كنفكر شنو ندير؟ و كنحس بالعافية لداخل فصدري و كنقول خاصني ناخذ حقي بيدي بلا درك بلا محامي ،و شديت ورقة و ستيلو و بديت كنكتب داكشي لوقع ليا كامل بالتفاصيل، صافي خاصني ننتقم من هاد 5 مبقا عندي منخسر ،خسرت شرفي و حلمي ضاع و منقدرش نرجع لوزان و ميمكنش نتزوج فالمستقبل و مستحيل نعيش حياة طبيعية.

من بعد مدازت 4 أيام و ارتاحيت شوية، فقت فالصباح و لبست واحد الحوايج عاديين و خرجت شديت طاكسي لتمارة و خديت طاكسي ثاني لطريق سيدي يحيى و نزلت فالبلاصة فين دارو ليا الزيف على عينيا ، غير نزلت من طاكسي شداتني الخلعة وتفكرت داك الإحساس ملي كنت مخطوفة، بانت ليا البلاصة فيها غير الخلا مكاين حتا دار بدا قلبي كيضرب بجهد و بديت كنحسب دقات ديال قلبي و غادية كنتمشا حتا وصلت ل 526 دقة و بانت ليا واحد دار بعيدة جات وسط ارض فلاحية هي لكاينة، ملي وصلت ليها كنشوف شراجم لقيت واحد شرجم اخضر لون ديالو كيشبه لشرجم فهاديك دار لكنت مخطوفة فيها ، و أنا نعرف بلي لقيت الدار........
#بنت_وزان
#كلكم_ظلمتوني
#إغتصاب_فتاة