مسألة انتقام

الجزء 4

الجزء الرابع :
بعد متبعت بزاف الإشارات لقيت الدار لكنت مخطوفة فيها ، اه هادي هي الدار المنحوسة جات وسط الخلا و زدت تأكدت ملي شفت فيها الشرجم الأخضر ،كنت هازة معايا واحد الموس فالصاك ، و انا نمشي جهة الباب و دخلت يدي فالصاك شديت الموس و خليتو مخبي و بديت كندق باليد الثانية ،و والو حتا واحد محل الباب و مكاينش الحس ديال بنادم فالدار ،داز حدايا واحد الراجل كبير "فلاح" و قاليا : بلا متعذبي راسك ابنتي راه مكاين حتا واحد فالدار ، الناس لساكنين فيها كيجيو غير مرة مرة فالعطلة! و هو يمشي .
ملقيت مندير بديت كنفكر و كنشوف فالدار و هي تبان ليا بلاصة لتحت فيها مگانة ديال الما مشيت حليت صندوق و كتبت الرقم التسلسلي ديال المگانة و رجعت بحالي.
الليل كامل و أنا كنخطط شنو غادي ندير و كيفاش غادي نقدر ننتقم من هادو لتكرفصو عليا؟؟
مشيت لمركز شركة ريضال فتمارة و سولت علا هادوك لكايخذو الحساب من العدادت و قلت ليهم بلي بغيت شي واحد حيث عندي شي مشكل فالمگانة ،و وراوني واحد الولد و انا نطلبو قلت اخويا انا معندي لا مشكل لا والو غير واحد السيد تقدم خطبني و قريب انتزوجو و وراني الدار لغادي نسكنو فيها و قاليا راه داري و انا بغيت نتأكد واش بصاح أو كيكذب، هاك هاد الرقم تسلسلي و جيب ليا معلومات عليه عافاك و متخافش غير بيني و بينك و بقهوة ديالك ،حشم مني و قاليا : منواعدكش اختي ،خلي ليا تيليفونك نشوف و نرد عليك.
دازت يومين و هو يتصل بيا قاليا اجي آختي لعندي ،مشيت لعندو و هو يعطيني سمية و العنوان ديال مول المگانة و دورت معاه ،حسيت بلي شديت راس الخيط و بلي أنا فأول الطريق باش نلقا هادو لدمرو ليا حياتي و تكرفصو عليا ، مكرهتش ديك ساعة نمشي للعنوان لعطاني الولد ،و إلا لقيتو ديال شي واحد منهم نشدو نقتلو ،و لكن فكرت "الف تخميمة و تخميمة و لا ضربة بالمقص" رجعت لبيتي و مخرجتش دازت عليا يومين طويلة بزاف تفكرت فيها حياتي كاملة ملي كنت صغيرة فوزان حتا وصلت للرباط و دوزت فيها اربع سنين كلشي داز بالزربة و لكن ملي كنتفكر هاديك الليلة لتعداو عليا فيها، الوقت كيدوز ثقيل بزاف و لكيعصبني أكثر هو ملي كنتفكر هاداك الجدارمي و المحامي لموقفوش معايا، و قالوا ليا هاديك الهدرة.
كنتفكر هادشي و كنحس بقلبي كيغلي صافي ميمكنش نتراجع غادي نمشي مع هادشي حتا لأخر نقطة .
فقت فالصباح و لبست واحد الجلابة و درت نظاظر شمس كبار و مشيت كنقلب على العنوان حتا لقيتو دزت من حدا الدار و مشيت لواحد المحلبة جلست طلبت شي حاجة بقيت كناكل بشوية و بانو ليا بزاف ناس كيدخلو و يخرجو من الدار حتا بان ليا هاداك الولد!!! اه هو مول النظاظر!! بان ليا خارج من الدار و لابس هادوك نظاظر نيت غير شفتو و تفكرت كلشي و بغيت نمشي ديك ساعة نقتلو و لكن تحكمت فراسي.
رجعت بحالي ،صافي تأكدت بلي هاديك الدار لغتاصبوني فيها هي ديال عائلة مول النظاظر لسميتو "مراد بنعثمان" وجدت لبسة زوينة، سباط اكبر مني ،ليگات طبية ، زيزوار ، بنج، لانكول فقرعة صغيرة، فصباح لبست اللبسة و عمرت صاكي بهادشي و مشيت للعنوان ،وصلت للدار و بديت كندق فالباب.........
#بنت_وزان
#كلكم_ظلمتوني
#إغتصاب_فتاة