مسألة انتقام

الجزء 9

الجزء التاسع :

بعد مدازت سيمانة العميد عبد رحمان بوذار مشا للسبيطار و لقا سمير خرجوه من الإنعاش و هدر معاه ، سولو العميد شكون لدار ليك هادشي؟ و جاوبو سمير بصعوبة واحد بنت تكرفصنا عليها ،سولو العميد انت و من؟ عطيني سميات! و هو يغيب و جاتو مضاعفات و رجعوه للإنعاش ،بعد 24 ساعة وصلاتو الأخبار بلي سمير مات.
العميد مقدرش يعتقل أي واحد من صحاب سمير حيث معندوش دليل، و بقات القضية مفتوحة شهرين و موقعات حتا حاجة.
البنت: ملي عرفت بلي البوليس حاضي خالد معتوق بعدت لمدة شهرين وفي هاد الشهرين وقعو ليا جوج حاجات مهمين، فالشهر الأول بدات كتشدني الدوخة و السخفة و كنتقيا و شكيت فراسي مشيت شريت اختبار الحمل و تصدمت بزاف ملي عرفت النتيجة!!! اه أنا حاملة من شي واحد من هادوك لغتاصبوني، بقيت 3 أسابيع مكنخرجش و فكرت فالإنتحار و تراجعت و قررت أنني نطيحو عند الطبيبة ،و فالصباح مقدرتش نمشي ، شنو ذنب هاد الولد نقتلو؟؟ راه ولدي الأول و ولدي غير أنا ماشي ولد شي واحد، بقيت كنبكي و ممشيتش عند الطبيبة و وقعات ليا من بعد جوج سيمانات واحد الحاجة زوينة بزاف رجعات فيا الروح، ملي كملتها انتقلت من مدينة الرباط مشيت لمدينة قريبة و بدلت البطاقة الوطنية على حساب عنوان الجديد و بديت كنفكر نكمل الإنتقام.
ماغاديش نمشي لعند خالد حدا دارو حيث يقدر يكون مزال البوليسي تابعو ،فكرت نبقا نمشي لحدا البار فشارع محمد الخامس حتا يبان ليا و واحد السبت شفتو دخل و ممعاه حتا واحد و عرفت بلي الحراسة مبقاتش، وجدت لباس قصير و درت ماكياج بزاف و هزيت معايا البنج و حبل و الليگات، و بعد يومين مشيت و هو يبان غادي داخل للبار، دخلت حتا أنا للبار و جلست بعيدة و طلبت قهوة كنشوف فيه كيشرب و كيحاول يهدر مع شي بنات و متسوقوش ليه، خليتو حتا سكر مزيان و قرب يمشي و مشيت لعندو جلست معاه و بديت كنضحك معاه و هو مرفوع سكران بزاف و كيسب فالبنات حيث مكيحملوهش، خرجنا بجوج مقدرش يسوق و شديت طاكسي صغير قلت لشيفور : وصلنا ا خويا لغابة فطريق زعير كورسا راه خلينا طوموبيل حدا الغابة ، وصلنا للغابة و دخلتو بزز و انا ندير ليه البنج و ربطت حبل مع واحد الشجرة و قجيتو بالحبل و حطيت موراه ورقة كحلة مكتوب فيها (4/5).
فالصباح ملي لقات الشرطة الجثة و حضر العميد عبد رحمان بوذار عرف بلي البنت رجعات كتقتل طلب من الشرطة العلمية تحاول تلقا أي بصمة أو دليل مادي يساعدو فالقضية و اتصل بالجوج المشتبه فيهم آخر وحدين بقاو حيين و قال ليهم : انا عارف واحد فيكم كان مع هاد الأربعة و اغتصب هاد البنت ضروري خاصو يعترف و يسلم راسو باش نحميه منها و يعترف ليا بكلشي باش نوصل ليها ......
#بنت_وزان
#كلكم_ظلمتوني
#إغتصاب_فتاة
قبل الآخير