الشاعر ايهاب المالكي
ابشرك خلصو ما بقو عندي اهواي
كل المشتريهم رخصو بيه
اصافحهم واحس بطراف اديهم غيض
كاتل منهم وما دافع الديه
بسد بوساتهم دفنو شكد انياب
وكول يجوز جانت عن حسن نيه
ويمر طاري ويذكرولي الشينات
وصد الغيبت اسمي التنوكل نيه
وانه الجنت اضل واكف بالاستعداد
من اسمع عزيز يفوت طاريه
حسبالي العدد بيه ثمر من يزود
وعن قلة الواحد تفرق الميه
بس تالي ادركت طين القلوب اصناف
و العشره الطويله تريد نوعيه
على كل ً عشت ما خذت بس اطيت
وي ليل المجازه الماشفت ضيه
وينه وينه اللكاء بيه جاي يبيع
وين الانه مطيه من هوء الريه
والزم جفني خاف من ارمش ايزعلون
واتناسه الحجايه البذني محجيه
ومن الكالي حق عد محب ما داعيه
اكو حق برجعته يعيب راعيه
عرفتله و كمت ما زاعل اليرحون
ولا على الباب اضل متاني ليليه
من شفت الحلم ينوخذ مو عله اللون
بعد بطلت اضم احلام ورديه
ناس اختلفت وظهرك اتجيه وين
اذا ما تلكه حايط تكعد بفيه
لهسه وما عرف عايش وياهم ليش
ويذوب الثلج بس ينجوي اشويه
حته جروحي خذتهن شوك
ابد ما حسستهم بيهه منيه
من سالوني صح كالو اطوك جروح
لا كلت للشماته اطوني عديه
شايف من تجيك الطعنه من احباب
هجي جروحك اتحس بيهه روحيه
تصور تبتدي تشتاك للجتال
اذا جف التطعنك بيهه حنيه
المهم عاذرهم وكل البقن سهلات
انه الجرف اليسامح روج شاطيه
حته من انجرح ما دام همه بخير
انه بخير يعني وكلشي ما بيه
