الشاعر كاظم اسماعيل گاطع
الليله اموت
الليله اخر ليله
الغيم مد ايده اعله راسي
والمطر شد حيله
الليله كَطرات العمر
ناكَوط حب سهران
يمه ادخيلج..
اترجاج
ضميني بسواد الشيله
الليله ليله
هد عليه الليل بخيول الظلام
منين اجيبن حيل ويرد خيله
حيرتني اضنوني موتي
اوف نعشي اشلون اوصله الباب اهلنه
ومن يكَابلني عيله ونشيله
الليله اموت
الليله كَلبي ينام دافي
وتندفن وياه حرارة جيله
الدم ينبع من سراديب الضلوع
ويرسم جروحي على الفانيله
وطير من بين الضلوع يطير
وتلحكَه السهام
وقيس يخسر ليله
وكَمر سكران اعله ميز اقمار
ضيع ليله
تفيض روجات الحسافه
وتكسر الشط
يا سنيني الراحيات..وداعة الله
انطيني بوسه...موادع الخل الخليله
يا نخل يا عاكَر احبل
ضوكَ طعم الفاجعه بموتة فسيله
ويصيح:
يا هور الحزن..
لا تغفه يا هور الحزن
تابوت اجاك اويه الكَصب
بهداي حطه عالجرف
ومحمداوي امن الكَلب غنيله
يا مطر
ياسيل..ودني اعله نهران الحبيب
بلجي اصادف صورته
شي باقي منه
اثر جدمه عالرمل
واشكيله
ونزع اعيوني براحته
وهي العيون امعلمه
اشتبجيله
جن ربابة كاولي اتزتني بعتابه
وتركَص الغربان
عالجثه الثكَيله
يا طيور الليل
وديني اعله ناسي
اليموت..
يشوف..يسمع..يلتفت.
ينكسر كَلبه ويعرف اليبجيله
تمنى
وعادة الموات يتمنى ويجيله
انا اتمنى
الشته..وحضن الحبيب
وسيف جاتلني كَبل هالليله
