الشاعر علي الاصبحي
بآدي الطريق إبخطوه مابادي إبميل
وگبل المسير ادري المسافه اطويلـه
ودري بمعانات الگصب من أيميل
باچر يدفعه الحاسبه يتچيلـه
وأدري الصبر مريود والناس اتگول
الكعبه ماكملت إبيوم وليله
كلمن يگوم بحيلـه وانه بحيلين
لمثالك اوكف لمن ينهد حيلـه
من إلزم اعنان المهر عزمه ايزيد
ومن فايض الحيل الذخرته اطيلـه
من طبعي ماطب ابسبگ وخسر بي
من شيمت الخيال يعرف خيلـه
وانه إمن طبلي ابسبگ طبعي اختار
وين الكحيلـه الجايبتها اكحيلـه
هزيت ذيلك تلعب وياي اشبيك
المو عگرب احتقره ويهز بذيلـه
بس هزت الفنجان أحسبلها أحساب
والبدوي اذا هوس ودچ ابريلـه
هذا السلاح انشوف ياهو الرماي
انت السلاح اطاك وانه اطيلـه
ماطبقت فرضه وشّعيره وجايوس
ومن زرف الأبره اتفوت اخلي الچيلـه
بلگطن من ينداف ألوحنه الشيب
الليل غثني ولحت نجم اسهيله
لاتدگ صدرك صوره ما تندك بـي
بحاتم اتسولف وانت مومن جيله
ماشوف محبس بات عدك مو ضيف
غيري اليصدگ بالحچي التحچيله
براسك الواگف. و ادري گبل الي يدور
بس حچي وما دكت اچفوفك هيله
حته الفشگ من ينطعن ضهره يثور
ذراعك شماله وفزع حلگك حيله
من يطم راسه القفل يستر بيبان
والمو زلم تستر عليها الشيله
