راسين في الحلال ©️ كاملة ✅

الفصل الخامس

الفصل الخامس :

اجتمعت الفتيات عقب انتهاء اليوم الدراســـي في أحد الكافيهات العامة ، وبدأن ثرثرتهن المعتادة حـــول طبيعة العمل مع الأستاذة إعتماد وتحكماتها الغير مبررة، و....

-أية بنبرة ساخطة : والله انتو ربنا بيحبكم إنكم مش أعدين معاها في مكتب واحد

-ميادة بلهجة شبه جادة : يا بنتي دي أصلاً مش تطاق ، أسلوبها وحش أوي

-هناء بحنق : هو في حد أصلاً بيحبها ، بجد أنا مش متخيلة إن في مديرة بالشكل البشع ده

-ليلة بهدوء : على فكرة في أسوأ منها

-رانيا وهي تزم شفتيها في تأفف : معتقدش

-عاليا بنبرة شبه حـــادة : دي مش بني آدمة ، مافيش حد اتعامل معاها إلا وشتمها وقال كلام زبالة عنها

-ميادة بجدية : ده طبع فيها

-هناء بتنهيدة : فين أيام مس دولت ، بجد كانت سكرة ولذيذة وبتحترم الكل

-ميادة وهي توميء برأسها إيماءة خفيفة : اه فعلاً .. كانت بتقدر ظروف أي واحدة

-سارة بنبرة متذمرة تحمل في طياتها التهكم : جربي انتي بس تقولي لأبلتك اعتماد عاوزة أخد اذن ، يمكن تقيم عليكي الحد

-هناء بضجر : أعوذو بالله

-عاليا بنفاذ صبر : ربنا يهونها علينا ، ونخلص بقى

-أية بنبرة ناعمة : انتو عارفين لو كلنا عملنا ربطاية عليها ممكن تمشي

-ريمان وهي تعقد حاجبيها في عدم اقتناع : معتقدش

-نشوى بعدم اكتراث : هي أصلاً متقدرش تعملنا حاجة

-رانيا بإنزعاج : ماتفككم من السيرة دي ، وخلونا نشوف حاجة تانية أحسن

-أية مبتسمة في رقة : حد شــاف المز بتاع النهاردة

-رانيا بتذمر : لأ ملحقتش

-نشوي وهي تلوي فمها في ضجر : يدوب بس خدنا كلمتين في جنابنا

وضعت أية يدها على شفتيها لتكتم ضحكاتها ، و..

-أية ضاحكة : ههههههههههههههههه ، أه شوفتكم ، كنتم مسخرة فعلاً

أمسكت ميادة بهاتفها المحمول ، وألقت نظرة سريعة على منشورات الفيس بوك الحديثة ، فرأت المنشور الخاص بالمديرة إعتماد و...

-ميادة بنبرة جـــادة : بصوا يا بنات دي منزلة بوست على الفيس بوك بتقول فيه محدش يغيب بكرة

-أية بهدوء : أيوه صحيح ، ما أنا قولتلكم عشان مقابلات الوظيفة الجديدة

-عاليا بتذمر : يادي الغلب ، يعني مافيش يوم يعدي علينا من غير ما نرتاح