Kakakambal ng luha ay ang saya
Karugtong ng wakas ay ang simula
Kasama ng paglubog ay ang paglutang
Kasunod ng tag-araw ay ang tag-ulan
Kasama ng tapang ay ang takot
Sila'y mga bagay sa iisang bahagdan
Tulad ng digmaan at kapayapaan...
Ng kahirapan at kaunlaran..
At kung inyong iisipin kanilang kaugnayan
Matatanto ang lalim ng pinanggaligan
Sapagkat ang mga bagay na magkasalungat
Ipinagtambal ng diwa at may iisang ugat
Ano nga bang pagkakaiba?
Ng pakabigo at tagumpay?
Ng kahinaan at kalakasan?
Ng kasamaan at kabutihan?
Sila'y mga bagay sa iisang balangan
Malaki man ang kaibahan
Sila'y nasa iisang kanlungan
Sapagkat ang pagitan ay iilang hakbang