انا و حبيبة زوجي (باللهجة الجزائرية)

partie 06

هيا البنات شوي تفاعل خلينا نحطلكم القصة و متنساوش تعرضو صحاباتكم يقراو معاكم   و تقراو قصتي الاولى "الحب الابدي" قصة شابة
و اذا اي تعليق او انتقاد اني هنا بكل روح رياضية و شاركوني توقعاتكم للمستقبل  😍😘😘😚
Vote +commentaire =nouvelle partie
        ENJOY SWEETYS 👩👩👩👩
..................................
حكاية انا و حبيبة زوجي الجزء الثاني عشر 12

32)….فاتو علينا شهر في دارنا الجديدة وحد المرة راح فارس يخدم وانا قاعدة ندير في الميناج اليومي نسمع في الباب يطبطب رحت فتحت لقيتها مروة ضربت الباب ودخلت ماش حاسبتني طول دارت في الدار وقالت الله يباارك واشي هاذا راكي قايمة بالدار يا خطافت الرجال مالا انت هي الخدامة الي جابك فارس مسرارة بسلامتك قتلها واش تحوسي عندي قاتلي انت الي واش تحوسي عندي انا راني في داري قاتلي معلابلكش بلي هذا البيت كان راح يكون تاعي بلي هذا الجنان انا الي غرستو بلي انا الي درت الديكور تاع البيت انا الي خيرت هذي لكويزين انا الي شريت لماعن هاذو ودور في الدار وتحكي وتبكي قاتلي جيتي لقيتي كلش واجد الراجل ولقيتيه واجد انا كنت حاطة يدي على فمي ونبكي وجعني كلامها لقيتها قربت مني قاتلي تبكي يادموع التماسيح انت زاهيتلك وانا نتعذب قاتلي هذا العز مايدوملكش قتلها انا اذا تحبي فارس اديه انا منمنعش سعادتكم قاتلي علاه انت شكون باه تمنعي سعادتنا وبدات طيح في الهدرة وتجيب من وتدي من انا تقلقت وقتلها انت وحدة طماعة شفتيه تزوج اخطيه فارس راجلي انا وانت مابقالك والو تقدري تخرجي ضكا من داري هي تشوكات وقاتلي راكي مسترجلة بعايلة فارس بصح تندمي عليها وراحت …انا مت بالبكا المرا تدي راجل تتهنا وانا ديت راجل باه نتعذب ونعيش المر كبرت قلبي كبرت قلبي بصح من رايحة وتضياق عليا ……………..
33)….في الليل جا فارس مقلق مره وجهو مقلب جا لقاني في الصالة نتفرج شدني من ذراعي وقالي واش قلتي لمروة انت واش حاسبة روحك كيفاه وحدة كيفك تحكي معاها بهدلني وشبع فيا سب وايهانات ماخلا مايقلي انا حبيت نغلق وذنيا باه مانسمعوش ولا كاشما ندير في روحي باه نتهنا وهو يتهنا قالي منحبكش تزيدي تحكي معاها اصلا وين لقيتي نميرو ديالها ولا راكي تقلبي في تلفوني انا ثما عرفتها كذبت عليه وماقاتلوش بيلي هي الي حكات معايا الاولى و هو مادارش في بالو هي الي جات عندي وتهجمت عليا وكلت انا ربي وحملتها. وسكت ماعندي ماراح ندير وديت هذيك الليلة نصلي ونبكي وندعي في ربي يفرجها ..
غدوة الصباح نضت لقيت تلفون يصوني لقيتها ايمان قاتلي راهم جايين عدنا هي وأم فارس وباباه انا رحت للكوزينة قلت نوجدلهم غدا مليح وفرزت الحالة فارس ماناضش بكري كي فطن جا للكوزينة لقاني وجدتلو لفطور ماحبش يفطر راح خرج ومرجعش مره حتى عادت الوحدة تاع العشية لقيت ايمان وصلت رحت استقبلتهم ورحبت بيهم أم فارس تحضنتني وقاتلي توحشتك وتوحشت طيابك لبنين وسلمت على فارس وباباه قالي واش راكي بنتي كاشما يخصك هنا فارس راهو متهالي فيك شفت انا مع فارس و قتلو ايه الحمد لله مايخصني والو معاه…………..
34)….وسربيتلهم لغدا وعشينا نشايخو نحاولي على قلبي وفي الليل رحنا ندورو في لبلاد وممبعد رجعنا فرشتلهم أم فارس وباباه في شومبرا وايمان رقدت في شمبرتي وانا وفارس رقدنا في شمبرتو هو بطبيعة الحال مكانش حاب بصح مكانش بيوت بزاف ثلاثة برك وقدامهم مالزمش نبينو بلي كل واحد يرقد وحدو فارس رقد فوق السرير وانا رقدت لتحت فطنت في الليل لقيت لغطا تاعو طاح هزيتو غطيتو بيه وقعدت نشوف مع وجهو يهبل والكور تاعو تتمناه اي طفلة تمنيت كون راني محضناتو وراقدين كأي زوج مزوجين وانا تايهة لقيتو حط يدو على يدي انا تخلعت ونحيت يدو ورجعت رقدت ….قعدت عايلة فارس عدنا يامات وروحو نحاولي ضيقة الروح وكي راحو رجعتلي الغربة الي معيشني فيها فارس …………………
حكاية انا و حبيبة زوجي الجزء الثالث عشر 13

35)….فاتو ليامات ونسيت انا مروة بالرغم انو كل يوم نسمعو يتمعشق معاها في التلفون بصح نحيتها من بالي …حتى وحد النهار وصلت انفيتاسيو لفارس من عند صاحبو تزوج يسكن فما في العصيمة جانا للدار وعرضنا قالو ارواح انت والمدام ابلاك ماتجيبهاش هو راح وفارس قالي ماتروحي ماوالو نروح وحدي سكت انا ورجعت قتلو كي عاد في الليل روح بصح ماطولش اني نخاف وحدي شاف معايا وطلع لشومبرا تاعو وهبط يتعشا حطيتلو كلا وخلص قالي اوكي وجدي روحك غدوة قتلو تديني قالي ايه …..الصباح انا رحت لخزانتي مالقيت فيها حتى حاجة تصلح يروحو فيها للعرس وحفلات العصيمة معروفة بحطتها رحت ليه قتلو مانروحش قالي لاه قتلو ماعنديش واش نلبس شاف معايا وقالي مالا صاي نروح وحدي وخرج راح يخدم انا كنت حاابة نروح بصح اللبسة ماخلاتنيش قعدت نتفرج حتى ولات لعشية لقيت فارس جا طلع لشومبرتو بدل حوايجو وهبط قالي هيا البسي عبايتك واخرجي وراح ………………
36)….رحت انا لبست وغلقت الباب ورحت معاه داني نشري كاشما حاجة نلبسها دخلت انا لمحلات وهو قعد في طوموبيل عجبني كلش شريت روبة و طالون وخرجت لقيتو داني لكوافير وممبعد رجعنا للدار لبست انا روبة وجيت نقتل هو قعد يشوف معايا وقالي ازربي طولنا ولينا رحنا لصال الي قالو عليها وصلنا انا مقدرتش نمشي بطالون جاني عالي بزاف حكمت في فارس هو ماقال والو دخلنا لقينا صاحبو ولعروسة سلمنا عليهم وقعدنا كان بزاف ناس متزوجين ومتحابين وشيوخ وعجايز ههه امبيونس انا ملي قعدت وانا نشوف غير في خليقة فارس مقلبها عليا تقول منيش قاعدة فما فات شوي وقت حتى نشوف في مروة فما مصدقتش عينيا وقلت هذي واش جابها هنا حاطة حطة لابسة لميني وكيفاه دايرة شعرها شفت مع فارس لقيتو حال فمو فيها وناض راح عندها انا غاضتني روحي قعدت وحدي تقول أشعب جا بلا عرضة مالقيت وين ندير وجهي ناس كاملة علابالهم بلي فارس كان على علاقة مع مروة وتزوج وشافوه كي راهو واقف يهدر معاها وهي تشوف معايا………….
37)…. انا وليت نرجف ونهدي في روحي ماقدرتش وليت رحت وين حاطين الماكلة والحلوى قاعدة نهز من الانواع الي عجبتني حتى لقيت وحد الراجل هكا باهي وجاي طويل وسمر هو ثاني قاعد يذوق من الحلوة قالي بنينة اه قتلو ايه ماشاء الله قالي و مشاء الله عليك بڤوصة بسلامتك انا حشمت وقتلو ربي يحفظك قالي انا انيس قتلو انا سلمى قالي انا جيت وحدي هذا عرس صاحبي وانت تعرفي لعروسة باينة ضحكت انا و قتلو انا جيت مع راجلي هذا ثاني صاحبو قالي متزوجة مالا قتلو ايه قالي وعلاه قاعدة وحدك قتلو معرف برك وين راح راجلي ضك يجي قالي نورمالمو ميبعدش على هذا الزين وإلا رايحين يخطفوهلو ضحكت انا قالي ضحكتك باهية مدام سلمى قالي شكون هو راجلك قتلو فارس بن ****حاار و قالي صح قتلو ايه قالي وكتاش تزوج معرضنيش قالي بصح كيفاه تزوج يخي يحب مروة انا تنشعت وقتلو انا لازم نروح قالي اسمحيلي مدام والله ماقصدي قتلو معليش رحت وخليتو والدمعة في عيني……………
STOOOOOOOOOP متنساوش تتفاعلوا كيما قالت NARdjes2 ربي يحفضها انا اتنفس بتفاعلكم