انا و حبيبة زوجي (باللهجة الجزائرية)

partie 07

هيا الدبدوبات شوي تفاعل اني علاجالكم  اني نحط و نتعب في الكتابة و الله ثعيبة بصح معليش مادام راكم معايا و تشجعو فيا و تدعموني 😢😢😢😢 ايا متنساوش vote  و commentaire
ENJOY GIRLs
......................
حكاية انا و حبيبة زوجي الجزء الرابع عشر 14

38)…. رحت وين تواليت لقيت فارس ومروة فما تخبيت انا وسمعتهم قاتلو جيت وجبتها وانا كنت حابة نشوفك وحدك قالها منقدرش نخليها وحدها قاتلو يعني تخاف عليها ولا كيفاش قالها والله ماش هكذاك اصلا اني رايح نطلقها انا تصدمت والدمعة طاحت تجري ودارتلي الخبطة في قلبي قاتلو هي ماذابيك تزرب انا منقدرش نصبر كثر قالها اوكي وضكا لازم نرجع اني خليتها وحدها وفات عليا بلا مايشوفني وليت دخلت انا لتواليت وشبعت بكا على زهري لمعوج لقيتها دخلت ماشفتنيش قاعدة تهدر مع صحبتها قاتلها رايح يطلقها مابقاش بزاف ونولي مدام بن***** قاتلها صحبتها بصح انت متحبيش فارس علاه حابة دمريلهم حياتهم قاتلها انا نحب واش عند فارس ولازم ندي فاس باه ندي واش عندو داكور قاتلها صحبتها داكور وراحو خرجو …………..
39)….انا تشوكيت كي سمعتهم جاتني الفشلة وليت خرجت مسحت وجهي وعاودت مكياجي ورجعت للطابلة لقيت فارس قاعد قالي وين كنتي عيطتلك الف مرة مارجعتلوش انا مره قالي واش بيك زدت ماجاوبتوش لقيت هذاك انيس جا عدنا سلم على فارس قالو كيفاه تتزوج ومتعرضنيش خسارة عليك قالو اسمحلي برك قالو قولي برك خيرتها ولا خيروهالك هذي البڨوصة فارس شاف معايا وقالو مكتوب قالو انيس مكتوب وزهر كوغير عرفتها قبلك كون انا الي راني قاعد معاها ضكا انيس تنشع وقالو واش بيك هبلت حتى تهدر معايا هكذا قالو اسمحلي عينيها يذوبو انا مت بالحشمة و فارس قالو يخي صماطة يخي وشدلي يدي و داني قالي روحي نقصي مكياج انا حرت فيه رحت لقيتو لحقني قالي هيا قتلو يخي قتلي نقصي مكياج قالي نقصيه في الدار هيا رحت خرجنا وروحنا ……………………….
40)….طول الطريق و هو مشنف قتلو شكون هذا كنت حابة نقعد قالي واش دخلك فيه لاه تسقسي سكت انا وصلنا دخل قالب وجهو وطلع لشومبرا تاعو انا رحت قاعدة نبدل في حوايجي لقيتو جا ضرب الباب قالي من اليوم ماتزيدي تروحي معايا حتى بلاصة قتلو علاه ياخي انت الي ديتني انا مكنتش رايحة قالي باينة عجبك الحال واش قالك انيس سكت انا قالي هاي باينة عجبك الحال قالي باينة ذبلتيلو بعينيك وانا قاعد معاك كي لحمار قتلو واش تقصد قالي كون شافك محتارمة مايشوفش معاك انا تشوكيت من كلامو قتلو كيفاه انا مش محتارمة قتلو انا الي رحت لابسة طويل و حاطة خماري وقاعدة مع راجلي ومشفت حتى مع واحد غيرو وهو راح وخلاني باه يستقبل لالا الي جات مشترة وفاضحة روحها وماقلت والو وليت انا مش محتارمة عطيك الصحة فارس عطيك الصحة وبديت نبكي قالي انا …قتلو تقدر تروح تخليني لقيتو راح خرج وصكر الباب……………
حكاية انا و حبيبة زوجي الجزء الخامس عشر 15

41)…. ركب طوموبيل وراح بقيت وحدي كي الوحيدة في هذيك الفيلا قالك ضربني وبكا وسبقني وشكا صبرت روحي بالقرآن باه مانخافش وبقيت نخمم وين راح وقتاش يجي وممبعد رقدت جابتني لفطنة لقيتها الساعتين تاع الليل لقيت تلفوني يصوني رفدت لقيتها مروة قاتلي الو يا مرت حبيبي قتلها واش سحقيتي ليل ليل قاتلي جوزيلي فارس مسحقاتو قتلها مكانشو قاتلي مالا خلي نجوزولك انا …تخلعت انا وقتلها يالكذابة واش باغية تقولي قاتلي فارس عمري راهو عندي ورانا راقدين انتيك انا قلبي تقطع قتلها تكذبي قاتلي اصبري نبعثلك صورة كوبيت عليها لقيت ميساج لحقني فوطو تاع فارس راقد في سرير كان وحدو انا مصدقتهاش كي عاد وحدو بصح شكيت قلت هي الي تصور حاجة باينة ماتبانش انا بايتة نبكي وغدوة لميت كابتي ولبست حجابي وهبطت نبكي باتت هذيك الكلمة الي قالهالي تاع مكيش محتارمة تحرق في قلبي انا كانو الناس يمثلو بيا في التواضع والحشمة يجي هو يقولي مش محتارمة وزيد متزوجين ويروح يزني مع حبيبتو عيني عينك …صبرت صبرت قلبي تعمر……..
42)….جا داخل هو من الباب شافني حااار قتلو اديني نروح قالي وين قتلو لدارنا قالي لاه قتلو اديني وخلاص قالي مش قاعد عندي خدمة قتلو لالا اديني قالي كي نخلص وراح خرج مرجعش حتى لليل لقاني مزلت لابسة حجابي ومزلت نبكي نضت ليه قتلو هيا اديني قالي طاح الليل طفرت اليوم قتلو ماهمنيش ضاقتني روحي حابة نروح لدارنا فات عليا وراح للكوزينة لقا الضو طافي قالي ماطيبتيش اليوم مارجعتلوش انا قالي مالا هيا نديك فرحت انا مسحت دموعي وركبنا ورحنا مشينا شوي وحبس الطوموبيل قالي اهبطي هبطت لقيتو ريستو قتلو علاه جبتني هنا اديني نروح قالي هيا ندخلو ونهدرو دخل دوموندا عشا قعدنا قاعد يوكل ماش سامع ليا مره انا ماكليت والو قاعدة غير نبكي بالصدفة كان انيس وصحابو فما يتعشاو فارس كان يوكل وانا قاعدة نخمم حاطة يدي على وجهي ودمعة تجري وحدها مالتاش بيا مره……… 43)….انيس جا خارج لقانا قاعدين قالنا مرحبا بيكم مساء الخير مسحت انا دموعي و درت ضحكة على وجهي و فارس شنف عليه وقالو مساء النور قالو وش راك فارس سافا قالو سافا وانت قالو انا انتيك خصوص كي شفتك والمدام الباهية تاعك انا حشمت حطيت راسي وفارس قالو بركانا من هذا اللعب انيس قالو اسمحلي ياسيدي بصح المدام تبان حزينة اليوم خير برك فارس سكت مالقا واش يقول وهو قالي خير مدام سلمى راكي مليحة قتلو انا هيه حمد لله قالي بصح تباني كنت تبكي قتلو جدات صحبتي توفات فارس شاف معايا و تبسم و انيس قالي ااا ربي يصبركم قتلو يعيشك قال لفارس اتهالا فيها مليح قالو فارس وقتاش تتزوج وديرلنا عرس قالو انيس حتى تلقالي وحدة كيف مدامتك فارس خبط المغرفة وقال لانيس متخلينيش نغلط معاك انيس قالو اسمحلي اني رايح بصح تندم عليها ……………..
44)….فارس تنارفا وقالي هيا ركبنا ورجعنا للدار دخل خبط الباب وطلع وانا رحت لشومبرتي …من نحيت قشي لقيت تلفون يصوني لقيتو نميرو تاع مروة مارفدتش عليها انا في هم وهي تزيد عليا بقات تعيط حتى رفدت قتلها واش تحوسي عندي باعديني يرحم باباك الي فيا يكفيني انت ماتخافيش ربي روحي ربي يجيبلك الي يبكيك ويشيطك كيما شيطتيني لقيتها كوبات عليا رميت انا التلفون وشديت راسي وبديت نبكي على سعدي لمسود هذي ماش مخليتني نرتاح ..من داك الغدوة زدت قلت لفارس اديني نروح زاد صمطني ومادارنيش في بالو يخرج ويخليني نهدر وحدي ..قعدت مع عقلي شوي قلت نزيد نصبر عليه لعود يهديه ربي بركيت عدت مانقولوش اديني نروح وليت نخدم في شغل البيت كيما كنت ……………
حكاية انا و حبيبة زوجي الجزء السادس عشر 16

45)….حتى وحد النهار سمعت الباب يدقدق رحت فتحت لقيتو أنيس جا يشوف فارس قتلو مكانشو راح يخدم قالي اذا عاد مايطولش نستناه قتلو اسمحلي تقدر تستناه برا حتى يجي نلقا فارس حبس بالطوموبيل لقاني واقفة انا وأنيس عند الباب تبدل وجهو وقالو خير ماجابك قالو جيت نشوفك و نعتذر منك على واش صرا المرة الي فاتت ونرجعو حباب قالو فارس جوز ادخل قعدو في الصالون انا رحت للكوزنة حتى سمعت فارس قالي سلمى جيبيلنا لغدا أنا الدمعة طاحتلي عمرو ولا نطق اسمي فرحت من قلبي حسيتو تبدل رحت انا وجدت لغدا وسربيتو وعيطت لهم قالي فارس والضحكة في وجهو اعطيك الصحة قالو أنيس مدامتك فحلة اعطيك الصحة مدام سلمى ماكلتك بنينة الله يبارك قتلو بصحتك قالو فارس فحلة و شاطرة وكل صباع بصنعة انا شعرة وتغم على قلبي هذا مش فارس الي نعرفو بقيت حايرة فيه وبقيت غير نشوف معاه خلصو ماكلتهم وقالي فارس عمري اذا تعبتك جيبلنا قهوة انا حكمتني الفشلة كي سمعت كلمة عمري رحت للكوزينة ورجليا مش قادرة نمشي بيهم ندير في القهوة ويديا يرجفو وقلبي يخبط وجدتلهم القهوة وديتهالهم قعدت فوق الفوتاي لقيت فارس جا قعد على الحاشية تاعو ولاح ذراعو عليا وضمني ليه وقال لأنيس ……………………..
46)….انا مع سلمى مايخصني والو انا حسيت بالدوخة شعرة تغاشيت أنيس قلب وجهو وقالو ربي يهنيكم انا لازم نروح ناض فارس وشدلي يدي حتى وصلنا عند الباب وقالو بالسلامة خرج أنيس وانا فرحت قلت تبدل فارس فتحلي ربي الباب الي كان مغلوق نلقا فارس ضربلي يدي وراح طلع لشومبرتو أنا مافهمت والو واش صرا علاه فارس دار هذي ليستوار كاملة قدام أنيس مقدرتش نستوعب واش كاين رحت ليه قتلو فهمني واش صرا قالي لاه واش صرا قتلو واش هذا التمسخير الي درتو قدام أنيس معليش تفهمني قالي انت وحدة مخلوعة الي يجي يديك معاه صدقتي الحالة انساي واش صرا ماراحش يتعاود مرة اخرى قالي انا نحب مروة ومروة تحبني ماتتأملي في والو يفوتو يمات ونطلقك ونرتاح ونتزوج مروة انا بقيت غير ساكتة نسمع للقنابل تاعو كي خلص مشيت شوي حسيت راسي يوجع وجع يهبل مافقتش مع روحي وطحت تغاشيت فتحت عينيا لقيت روحي في سبيطار والطبيب عندي وفارس واقف عند رجليا قالو الطبيب اي فطنت ماتحركش من بلاصتو وماجاش عندي قالو الطبيب تعرضت لضغط عالي راهي طلعتلها لاطونسيو هذا الدواء لازم توكلو كل يوم ولا راح تطلعلها كثر و مالزمش من اليوم تتقلق ولا تتوتر وراح خرج ………………………
47)….نحيت انا السيروم من يدي وهبطت من السرير وجيت خارجا نلقا فارس جا شدلي يدي جبدتها انا من عندو ورحت حاكمة في الحيط وخرجت ركبت في طوموبيل وركب هو وروحنا وصلت طلعت لشومبرتي بقيت شوي ونلقاه جا عندي رايح يحكي معايا قتلو روح عليا يرحم والديك باعدني حابة نقعد وحدي لقيتو خرج رقدت انا كنت عيانة بزاف فطنت لقيت لعشا محطوط قدام السرير ضربتو بيدي ساح سمع هو صوت تكسار جا يجري فتح الباب لقا الحالة مقلبا بقا واقف عند الباب نضت انا بعدتو بيدي وخرجت هبطت للجنان وقعدت نشم شوي هوا كرهت كلش عدت ندعي في ربي نموت ومانعيشش هذي العيشة تاع الذل واحد ماراهو سايل عليا فمي يقول بخير وقلبي يتعصر ..من داك عدت ما نحكيش مره مع فارس نقولو غير اديني نروح لدارنا وهو يقولي حتى تبراي بقيت مصرة عليه حتى جاني هذاك اليوم وقالي هيا نديك للداركم مت انا بالفرحة لميت حوايجي ورحنا انا عمري ماحكيت لفارس على مروة وبلي راهي تعيطلي وجاتني حتى للبيت وبعثتلي فطو تاعو وهو راقد عندها مانحكيلوش عليها مره وهو حاطها ملااك يرقدني بيها ينوضني بيها ………
...........
هذا اطول بارت كتبتو في رواياتي الاثنين  متنساوش تشوفوا روايتي -الحب الابدي _ و نتمنى نلقا تغاعل باه نحط روايتي الثالثة