انا و حبيبة زوجي (باللهجة الجزائرية)

partie 09

حكاية انا و حبيبة زوجي الجزء العشرون 20

57)….فارس حس بلي كاينة حاجة راح لباباها وعرف منو بلي راهي تكذب بلي هو مايدخلش فيها معامن تتزوج هنا عرف فارس بلي مروة كانت طامعة في مالو مش تحبو طاحو عليه المصائب هذو كامل مورا بعضاهم هذا الشي كامل حكاتولي ايمان انا تشفيت فيه واش دار فيا بصح في النهاية قلبي حنين غاضني بصح كان طفرت وجاتني ورقة الطلاق وسنييت عليها …بقات نقفو في المحكمة وتخلاص قصتي مع فارس الي شربت فيها المرار …….جا اليوم الموعود نضت الصباح وجدت روحي ورحت مع بابا للمحكمة دخلت لقيت فارس ثما وحدو يبان مدمر وعيااان بقينا شوي وممبعد جات ايمان دخلنا عند القاضي بدا يهدر ويحلل فينا قالي يا بنتي وعلاش حابة تطلقي من راجلك قتلو هكا وخلاص قال لفارس وانت علاه باغي طلق فارس مارجعلوش زاد قالي يا بنتي من اليوم راكي رايحة تولي إمرأة مطلقة في المجتمع وهذا الشي مايريحكش قتلو قابلة بالوضع قالنا مالا الطلاق هو الحل بيناتكم قلنالو ايه وهنا طلقنا وخرجنا كل واحد في طريقو وكل واحد واش رايح يزيد يعيش …………
58)….رجعت انا لدارنا ومن غدوة رجعت سلمى العازبة تاع بكري بصح مطلقة انا قررت نعاود نأسس حياة جديدة وننسى الي فات بصح مستحيل نقدر ننسى اصلا وين تروح يفكروك بالتقرعيج تاعهم ..جازو يمات واسابيع وشهور على قصتي مع فارس قريب ننسى من نهار تلاقيتو في المحكمة مزدتش شفت وجهو ايمان عمرها ولا خلاتني نهار كل يوم تجي تزورني في الخدمة وتديني ندور معاها هي رفيقتي الوحيدة الي نعزها تاع الصح ..
وحد النهار رحت نخدم ورجعت وصلت لدارنا لقيت طوموبيل شابة قدامنا دخلت قلت لماما شكون عدنا قاتلي واحد الراجل راهو مع باباك اصبري ضك يجي ويقولنا نسمع في بابا يعيط عليا سلمى سلمى قلت لماما راهو مع الراجل وعيط نروح !!!
قاتلي روحي مادام هو الي عيطلك رحت من دخلت ونصيييييب
59)….انيس قاعد تشوكيت فيه واش جبو لدارنا هذا ..قالي بابا اقعدي يا بنتي تعرفي هذا الراجل قتلو ايه هذا صاحب فارس تعرفت عليه في دزاير قالي بابا مليح قالي انيس واش راكي مدام سلمى قتلو بخير الحمد لله قالي بابا أنيس هذا الراجل صاحب فارس راهو جا قاصد الدار باه يخطبك انا تشوكيت وقفت وبقيت نخزر مع انيس قتلو كيفاه !!! تخطبني قالي انيس انا حبيت نجي لباباك قبل على الاصول قلتلو انا تعيش بصح طلبك مرفوض اسمحلي ورحت خرجت مالا هو راح روح وانا بقيت متشوكيا فيه الغدوة رحت نخدم وكي خرجت وقت لغدا لقيت انيس جا لعندي قالي معليش نحكي معاك قتلو لالا منقدرش نحكي معاك اسمحلي قالي والله ماندي بزاف من وقتك قتلو اوكي …………

60)….قالي انا يا سلمى من نهار الاول شفتك فيه عجبتيني وحبيتك تكوني ليا قتلو هبلت انت انا ديجا متزوجة قالي اني علابالي بكلش غير مكالاه تخبي عليا علابالي واش كان داير فيك فارس علابالي بالمعاناة تاعك كاملة قتلو شكون قالك قالي متحبيش تعرفي المهم انا نحبك سلمى وناويك للحلال وجيت نطلبك من باباك ورايح نسيك في فارس قتلو انا فارس نسيتو ومانيش حابة نعاود الزواج حابة نريح راسي قالي مالا انا منخطيكش حتى تقبلي انت هي لافونير ديالي قتلو انا نروح نخليك ..روحت لدارنا عدت كل يوم نلقاه قدام السونتر الي نخدم فيه يجي يهدر معايا ساعات يقلقني ساعات يضحكني كل يوم هكاك كرهت منو الناس ولاو يهدرو علينا راهم يتحابو راهم يتلاقو كذا كذا قتلو اخطيني قالي حتى تقبلي قعدت مع راسي نخمم في كامل واش صرالي وليت قلت نقبل وخلاص بلاك نتهنا في حياتي حكيت لايمان قاتلي دبري راسك هذي حياتك ……….
61)….مالا قتلو موافقة هو مات بالفرحة و جا هو وعايلتو خطبوني فاتو يمات رحت نخدم وكي خرجت مفاجأة لقيت فارس واقف يستنا فيا واااش توحشتو قلبي رايح يطير بصح رحت ديركت جيت جايزة عليه لقيتو شدني من ذراعي قتلو اطلقني هبلت قالي عندي هدرة معاك قتلو وانا ماعندي حتى هدرة معاك لقيتو جبدني وداني للطوموبيل قتلو منركبش ساي ماوليتش مرتك منقدرش نركب معاك قالي بركايناااا قتلك اركبي ركبت حسبتو رايح يهدر معايا فما لقيتو ديمارا قتلو وين مديني هبطني هو مرجعليش داني وحد لبلاصة هك وحبس الطوموبيل قتلو واش سحقيت مني قالي علاه قبلتي بأنيس قتلو شكون قالك قالي علااه قبلتي بيه قتلو نفحتلي قالي بالعياط قتلك علااه قبلتي بيه قالي تحبيه سكت انا قالي من كنا متزوجين كنتو تحبو بعض ياك قتلو انت هبلت قالي علابالي بكلش غير مكالاه تلفيهالي قتلو خلاصت الهدرة رجعني ……….
62)….قالي والله مانخليك تتهناي معاه قالهالي بحقد كبير قتلو رجعني لدارنا لقيتو حدر من الطوموبيل جا فتح الباب تاعي حكمني من يدي هبطني طبعني على الطموبيل شدلي وجهي بصباعتيه وقالي رايحا تندمي انيس يلعب بيك قتلو انيس يحبني انت الي لعبت بيا ودمرتلي حياتي اطلقني وجعتني لقيتو راح ركب وديمارا خلاني فما انا مت بالخلعة كي قالي هكذاك شديت تلفون عيطت لانيس جا داني حكيتلو واش صرا تنارفا وقالي متزيديش تحكي معاه وانا ضك نشوف حسابي معاه من داك لغدوة في الليل تلفوني يصوني رفدت لقيتو نميرو تاع فارس مجاوبتش بقى يصوني حرق التلفون رفدت عليه قتلو واش تسحق قالي غدوة محتاجك ساعة فلانية لبلاصة لفلانية قتلو منجيش قالي مالا ماتلومي غير روحك وكوبا. لقيت انيس عيطلي قالي اني حكيت مع فارس ومارحش يزيد يتعرضلك مرة اخرى قالي غدوة صباح نجي نشوفك قتلو اوكي وماقتلوش كي فارس عيطلي …قاتلي ايمان فارس من نهار سمع بلي تخطبتي وهو هابل ماهوش في عقلو يضال منارفي واحد مايهدر معاه طالع هابط مالقيت مانقولها قتلها انا المهم يخطي جرتي يخليني نعيش حياتي ...

63)….صباح نضت رحت للخدمة تلاقيت بأنيس قريب معرفتوش وجهو كامل مضروب وفيه بلايص زروقا وحمورا قتلو واش بيك قالي تقست في الباب قتلو راك تخبي عليا احكيلي واش صرا قالي تهاوش مع فارس مالا انا نضت نبكي وين نروح لاحقتني المشاكل قالي متبكيش كلش يجوز قالي المهم انا وقفتو عند حدو ممبعد راح انيس وانا دخلت خدمت نهار جاز مخلط لحقت الساعة الي قالي عليها فارس رحت لقيتو قاعد يستنا قالي طولتي شفت معاه لقيت في فمو جرح برك عرفت بلي انيس مقدرش عليه قتلو واش تحتاج قالي بطلي خطبتك انت وانيس قتلو انت مهبول واش راك حاب عندي قالي بطليها انا الي نعرف انيس مش انت قتلو انيس ماعندو ماخصو راجل سيد رجال قالي هو حاب يديك باه يزكر فيا انا برك… قتلو علاه انت شكون حتى انيس يلتا بيك اصلا ياك عندك مروة روح باعدني …حكمني من ذراعي قالي متزيديش تجبديلي عليها قتلو بالخوف ايه …قالي اخطيك منو قتلو باه نوجعلو قلبو ويخطيني انا نحب أنيس وهويموت عليا خطينا انت ا خلينا نعيشو حياتنا قالي تحبيه .. قتلو انا نروح طولت معاك ومذابيك ماتزيدش تعيطلي ورحت وخليتو واقف …
64)….وصل العرس تاعي انا وانيس وجدت شوي حوايج مكنتش مهنية في بالي نظال نخمم ونفكر فارس محبش يخطيني كل يوم نلقاه كل يوم يعاودلي في نفس لحكاية وانيس مغرقني في الحب والميساجات والكلام لحلو بصح يظال يحكيلي على فارس ويسب فيه يكرهو حاالة رايحة نهبل ملقيت بيها وين قلت لايمان شكيتني نهرب ونخليهم انا مافهمتش علاه فارس راهو يتبع فيا ويحوس يدمرني لهذي الدرجة يكرهني واقف في وجه سعادتي كرهتو ومنيش قادرة نزيد نشوف وجهو …لحد الآن ماقلتش لبابا ولا عايلتي واش راهو صاري معايا الي يشوفني يقولي سلمى واشمن رجيم راكي دايرة قتلهم في قلبي رجيم الهم تبعوه ضك تنقصو بشي كبييير …..عمري لا توقعت يصراولي في حياتي حكايات كيما هكا سبحان الله ………………….
65)….وحد اليوم بايتة نحكي مع أنيس في التلفون نلقى الراجل دخلي في مواضيع واش نقولكم حسيتو هايج قتلو واش بيك قالي نحبك ومنا ومنا تفهمتو انا قلت ماعليش رايح يولي راجلي بصح انا مافهمتوش واش كان يلمح …من داك الغدوة جا أنيس حاط حطة قالي عمري جيت نديك تشوفي الأوتال الي خيرتو باه نباتو فيه ليلة العمر حشمت انا وقتلو الي تحبو انت هذاك هو قالي لالا والله تروحي معايا ونشوفوه كيف كيف لبست عبايتي ورحت معاه داني قبل بلايس شابين حوسنا شرينا حوايج وممبعد وصلنا للاوتال من دخلنا لمحت فارس بصح قلت شكيت يشبهلو انيس شد لمفاتح تاع الشومبرا وقالي هيا نطلعو نشوفوها طلعنا فتح الباب دخلنا عجبتني واسعة قاعدة ندور فيها نسمع الباب تغلق نلقا انيس جا لعندي قالي عمري عجباتك قتلو ايه قالي ارواحي تشوفي سرير رحت قعدت عليه قتلو مليح لقيتو قعد بحذايا وقاعد يتغزل بيا وحكملي يدي قتلو هيا نروحو قالي نزيدو شوي وبدا يمس في وجهي ولا قالي نحي خمارك نشوف شعرك قتلو لالا هيا نروحو قالي انا نحبك ومنيش قادر نصبر عليك خليني ندير واش نحب قتلو لالا انيس كلش في وقتو حلو…………
ايا كشروداتي شوي تشجيع ماشي علاجال هذي الرواية مي علاجال روايتي الاخرى " الحب الابدي " لاني قررت مهما كان كاين تفاعل او لا انا رح نكمل الرواية لاخرها من اجل متابعاتي الي دايمن يشجعزني ربي يحفظهم
اي تعليق او انتقاد اني هنا 👎👎👎👎👎👎
#mesolita