طفلي الضائع

الجزء الثاني

#طفلي-الضائع
الجزء الثاني
بقلمي فردوس عبد اللطيف- القصه حقيقية
اتفقت مع محمد أكلم اهلي حتى نحدد موعدلاهله يجون يخطبوني طبعا هو فاتح اهله وموافقين علي لان جهينه هواي حاجيتلهم علي ومادحتني
سهير.  ماما عندي حجايه وياج
ام سهير.  خير بنتي محتاجه شي شو وجهج اصفر وترجفين اشبيج مريضه
سهير.  لا ماما شسالفه مابي شي بس اني كملت امتحانات واكو ولد بالكليه وياي يريد يتقدملي
ام سهير.  شنو هذا منين كومه خطيرة ورفضتي بحجه الدراسه وابن خالتج ينتظرج تكملين يريد يجي يخطبج
سهير.  اوووو ماما يا ابن خالتي اشو مكظي حياته بالملاهي والبارات ويوميه يرجع سكران لبيتهم    لو لان غني تردين تزوجيني اله
ام سهير.   هاي تاليتهه سويتي سكير وبارات كل شاب ما متزوج وعنده فلوس يكظيهه هيج وين يروح وبعدين عود من تتزوجي خلي يبطل شرب وبارات
سهير.  ماما اني الي حا اتزوج واني الي حا اعيش حياتي سواء حلوه او مره واعتقد من حقي اختار شريك حياتي لان عمري تجاوز ال 18 سنه
وبعدين محمد معايزه شي
ام سهير.  بكيفج بنتي هذا اختيارج وانتي تتحملين النتائج بنات هالوكت منو يكدر عليكم خربتكم المدارس والكليات
سهير.  بوستهه من راسهه ماما
حبيبتي لازم تفرحين لفرحي وتباركين زواجي اريد رضاج
لا تفكرين بفلوس وماده وتأكدي بنتج عاقله وما تختار الا الذهب ومحمد خلق واخلاق ويحبني وصبر علي تحمل اربع سنين يركض وراي
ام سهير.  ماشي بنتي خلى اشوف ابوج
اجه ابوي بعد ما تغدينه جبتلهم الشاي وأشرت لماما تكلمه واني انهزمت اتصنط وره الباب
ام سهير.  ابو سهير بنتك اكو جماعه يردون يجون يخطبوهه
ابو سهير منو ذولي منين اصلهم الولد منين
ام سهير حسب ماكالتلي سهير ابن خاله بنيه صديقتهه ومن عائله محترمه والولد ضابط بالمخابرات وهسه كمل قانون يعني شايفهه بالكليه
ابو سهير.  تدرين قبل اسبوع اخوي كلمني رايدهه لجعفر ابنه وكتله اسالهه بس تعرفين ام جعفر ام مشاكل سكتت ما فاتحتكم بالموضوع
ام سهير. زين سويت هاي ام جعفر ما عدهه غير المشاكل ولو الولد ما يتعيب خوش ولد وأخوك فقير  بس يالى خلي نشوف هالولد ونسأل عليه والي كاتبه ربك يصير
ام سهير يعني انت ماعندك مانع
ابو سهير.  بنتي واعيه وأعرفها من وافقت عالولد اكيد وجهه نظرهه صحيحه
ام سهير خلي اروح اخبر سهير تنطيهم موعد يجون النسوان ونأخذ منهم اسمه وعنوانهم ونسأل عليهم
سهير سمعت كل كلامهم جتي امي شافتني وره الباب سديت حلكها وحظنتهه  وشاورتهه باذنهه شكرا حبيبتي ماماتي
ركضت عالتلفون اتصلت بمحمد
سهير هلو حمودي اشلونك كاعد يم التلفون
محمد. حبيبتي انتظر طمنيني شصار ولو اني عريس لقطه وما انرفض
سهير.   اوووو لاتصير مغرور ترى ابطل
محمد.  لا يامعوده دا اتشاقى
سهير.  اي دير بالك بلغ اهلك يجون النسوان باجر الخميس
محمد.  مو كتلج عريس ما اتفوت طلعتي إنتي مستعجله
سهير.  محمد اجلتهه شهر يالى باي
محمد لا معوده اني مستعجل اكثر منج يمته تصيرين الي واطلع حيف السنين. باجر بالخمسه احنا بالباب
سهير يالى باي
يوم الثاني تحضرت ورتبت البيت ورتبت نفسي ولبست فستان بصلي ومكياج خفيف بالخمسه بالضبط اندك الجرس
فعلا موعده مضبوط اجتي أمه وخالته وبنت خالته وأخته
كانو عائله مرتبين كنت اباوع عليهم من شباك المطبخ دخلتهم امي لغرفه الخطار كعدو بعد ما فتحوً الموضوع طلبو يشوفوني ولازم اقدم صينيه الشاي والكيك وكنت ارجف وخايفه ومرتبكة تلكتني جهينه وأخذت مني الصينيه وهي كامت تقدم لان ايدي كانت ترجف سلمت على أمه وخالته وأخته وكعدت بقو يباوعون علي عجبتهم ابتسمت أمه وكالت حقه محمد انتظر اربع سنين هسه عرفت ابني عنده ذوق
خجلت ودنكت راسي
بعد ما اخذت امي اسمهم وعناوينهم
ام سهير.  عيني ام محمد تعرفين هذا موضوع زواج ولازم ناخذ راي عمامهه واحنا نرد عليكم
ام محمد نترخص احنا وننتظر ردكم وان شاء الله ربج يكتبلهم القسمه وتشرفت بمعرفتكم
طلعو محمد ينتظرهم بره كاعد على أعصابه
ام محمد. صعدت بالسياره.  ها حميد آثاري بيك بله شنو هالبنيه الحلوه شنو هالاخلاق ان شاء الله يوافقون
محمد. شفتي ذوق ابنج شكد حلو مو الي الجكمه الي جبتيلياها بنت صديقتج
ام محمد.  ههههه والله يمه آثاري انت اعرف مني خوش اختاريت ان شاء الله يوافقون
محمد.   وليش ميوافقون وين يلكون هيج شاب هم وسيم وحلو وشخصيه
جهينه. نحن هنا محمد نسيت اربع سنين تنتظر وما دخلت كلبك غيرهه
محمد هاي اشبيج لا دكوليلهه خليهه بيناتنه
بعد شهر ابو سهير
ابو سهير.   بنتي سهير سالت على محمد واهله ناس ما يتعايبون عائله محترمه والولد سمعته طيبه يعني من ناحيتي اني موافق بقى عليكم انت وامج
ام سهير.  والله يا ابو سهير طالما انت موافق احنا هم موافقين
سهير كمت بوست راس ابوي وامي وحددو موعد للزلم يجون يقرون الفاتحه ونلبس نيشان بنفس الوقت لان محمد حيل مستعجل
لبسنه حلقات وبدينه نحضر للزواج خلونه غرفه بيت اهله بقينا نشتري لوازم العرس واخترت الغرفه على ذوقي
بيت محمد مابي غير محمد وأخو عمار وأخته لبنى
الطابق الفوك بي اربع غرف وهول
محمد رتبلنه اخذ غرفتين وفلش الحايط بينهم وبنالى حمام خاص بينا صار مثل سويت معزول وحدنه اخذنه نص طخم قنفات وخلينه تلفزيون بالغرفه وصارت اجمل مملكه بالنسبة الي لبدايه حياة سعيده مع انسان احبني وحبيته من كل قلبي
بقى تحديد موعد العرس. لان كملنه كل تجهيزاتنه حيل تعبت بهالفتره وضعفت وزني قل صرت من التفكير ما أشتهي الاكل.   حددو موعد الزواج بعد شهر
للحكايه بقيه.   بقلم فردوس عبد اللطيف.   F