طفلي الضائع

الجزء 3

#طفلي-الضائع
بقلمي فردوس عبد اللطيف
الجزء. الثالث
سهير. بهالفتره تعلقت بمحمد صار اذا يمر يوم وما اشوفه ابقى ابجي اشتاقله حيل صار هو كل حياتي مرات احسد نفسي عليه اكول رب العالمين رزقني برجل بي كل المواصفات لان اني حافظت على نفسي وما حبيت ولا صادقت حافظت على نفسي لخاطر ابوي وسمعتنه والحمد لله رب العالمين عوظني بمحمد
طلعنه اني ومحمد نتعشى بالمطعم يعجبني اكل بمطعم الساعه ب 14 رمضان بالمنصور باوعتلي محمد ويضحك
سهير. هاي اشبيك جوعانة ودا اكل ليش تضحك
محمد سهير اتخيلج بعد فد خمس سنين و3 اطفال واحد فوك راسج والأخ يرضع والثالث بالتواليت يصيحج تعالي شطفيني
سهير. وشدعوه بسرعه كلهم
محمد شوفي حبيبتي اني احب الأطفال ولؤما اخاف على صحتج اكولج سويلي عشره بس مراعاتن لوظعج وبما اني احبج حا اقبل ب 8 اطفال 6ولد وبنتين
سهير. انت تحجي صدك
محمد اي صدك شعبالج لعد اريد انتاج
ومنو يربي
محمد حبيبتي سهوره امهم
سهير محمد ترى كلامك صعب تنفيذه فاجئتني
محمد حبي لاتخافين اني اساعدج
سهير اكيد بعد ما يجون طفلين حا تغير كلامك من يبجون بالليل ودي طبيب وجيب هدوم يالى خلي نروح ترى مبقى شي عالعرس بعد اسبوع
محمد ...صدك نسيت اكولج اكدت حجز القاعة نادي الضباط القاده باليرموك والزفه لفندق المنصور نبقى يومين والعشا ميقبلون ندخله بالقاعه بره ميوزه ونخلي عليهه الاكل اتفقت مع طباخين اثنين حايسوون اكل طيب حبيبتي حا اخلي عرسنا الكل تحجي بي واشلون محمد حبهه لسهير
سهير. شكرا حبيبي اعرف انت تضايقت ماديا بس هذه مظاهر والناس عبالك بسهوله الواحد يجيب الفلوس
محمد. حبيبتي لاتفكرين بهالموضوع اني الرجل وأتحمل المسؤليه انت اهتمي بغير اموووووور
سهير شنو قصدك
محمد ... خليج بالامور النسائية
رجعت للبيت تعبانه من الفر وشفت امي تبجي بوستهه اشبيهه ست الحبايب تبجي. اعرف لان مابقى شي وحاروح لبيت الزوجيه. ماما حبيبتي مو انت عفتي اهلج لخاطر ابوي لو انت حلال واحنا حرام
ام سهير. ضحكتيني ولج طالعه عينج اني ابجي بعد كم يوم حاتروحين بيت زوجج وتفاركيني
سهير. ماما مو بعيده اخلي محمد يجيبني يوميه
ام سهير. لا ماما مو حلو المريه من تتزوج يوميه تروح لاهلهه تعلمي من امج ...........
مر الأسبوع يركض وامي سوتلي حفله حنه كلش حلوه وجوي كل صديقاتي وغنينا وركصنه ومحمد قبل العرس ب 3 ايام ما اجاني حتى نشتاق لبعض لكن اني شصار بي احس الدنيا ضوجه يمه ما اكدر على فراكه وهاي بالليل نسولف بالتلفون بالساعتين
محمد. الو سهوره باجر عرسنه ما مصدك حبيبتي
سهير. حبيبي مشتاقتلك
محمد. سهير الحلاقه وصيهه لا تخليلج مكياج طوخ انت حلوه بدون مكياج
سهير. اي حبي اني هم ما احب المكياج الطوخ
محمد. سهوره محظرلج مفاجأه باجر
شنو حبي كول.
محد مو مفاجأه
سهير فدوه شينيمني لا تقلقني كول عفيه
محمد. حا اجيب مطرب للحفله
سهير. منوووووو عفيه كول
محمد باجر تشوفي
بقيت افكر بالليل هذه اخر ليله بيت اهلي باجر اني اروح لبيت زوجي وحبيبي حمودي كوه نمت كعدت الصبح كنت متوتره بين الخوف وبين الفرحه وهذه ليله العمر مثل مايسموهه بس خايفه وأفكر بالمكياج والتسريحه كل بنت تتمنى بهذا اليوم تكون أميره بفستانها الأبيض امام فارس احلامهه وكون تمر الليله بدون تنغيصات
تريكت طبعا ما أشتهي الاكل وبيتنا هوسه مخبوصين الكل مخبوص هو اني العروسه انتواشبيكم صارت ب 12 رحت للصالون كملت تسريحتي ومكياجي وكنت اجمل عروس فرحتي ماتنوصف اجه حبيبي حمودي لابس قاط اسود وقميص ابيض ورباط اسود بي خط ابيض طالع يجنن شاورني بأذني وكال انت اميرتي اليوم يا احلى عروس
رحنا للحفله تلكونه بالهلال والموسيقى وصورونه فيدو واحنا نمشي كلسع اريد اوكع اعثر بالفستان ومحمد يلزمني وعزفونه موسيقى مال العرسان دخلنا والكل يباوع علينه واني كنت خجلانه بس اريد اسال ليش الكل يريد يشوف العروسه اشلون طالعه بيوم عرسهه مو صديقاتي على طول كبالهم ظلو يباوعون كانهم اول مره يشوفوني اني لزمتني الضحكه ومحمد كلسع يذبلي حجايه يضحكني زين لازم اكعد عاقله لان كل العيون علي والفستان مضايقني ولازم ما اتحرك منين ما ادور وجهي يباوعون بهالاثناء دخل هيثم يوسف والناس التهو بي صارت عيونهم عليه همزين
بعدين جابو راقصه ظلت تركص واني اباوع على عيون محمد اخاف لا يباوع عليهه طبعا الراقصه اجرتهه هديه من صديقه واني عبالي هو متفق وياها همزين وإلا متت غيره
الناس متونسه غنا وركص واني ومحمد كاعدين تالى نزلنه ركصنه شويه حركنا جسمنه لان تعبنه من الكعده كملت الليله على خير وزفونه للفندق. .......بقينا يومين كانت احلى يومين بحياتي عشتهم مع حبيبي حمودي
بعدها رحنا لبيت اهله تلكونه بالهلاهل والجكليت اهله كانو فرحانين بزواجه بوستنا خالتي ام محمد وبدت الخطاطير من ثاني يوم الناس تجي تتباركلنه تغيرت حياتي صرت مسؤله عن بيت وزوج قبل كنت مدلله بيت اهلي يمته ما انام ويمته ما اصحى حياتي تغيرت مرت كم شهر واني بقمه السعاده طلعات ونسه وزوج يحبني لكن كل شهر تسألني ام محمد يمه شخبارج ما حبلتي ومحمد هم يسألني سهوره شخبار البيبي شوكت يبين كلما يمر شهر واني ايدي على كلبي وبديت اشعر بالخوف محمد واهله يردون اطفال واني ليش مجاي احبل رحت لاهلي حجيت لامي
ام سهير. هسه هما شدعوه مستعجلين عالطفل بعدج توج عروس
سهير. يوم صار 6 اشهر وماكو طفل اخاف اكو بي شي
ام سهير. خلي ننتظر هالشهر وراها اخذج لدكتورتي بس لاتفكرين وتنقهرين
سهير والله ماما كل شهر من تبين علامه ماكو حمل ابقى ابجي يومين واتاذى
للحكايه بقيه. بقلم فردوس عبد اللطيف. F