#طفلي-الضائع
بقلمي فردوس عبد اللطيف
الجزء الرابع
سهير كملت ست اشهر واني بديت اذبل واني في قمه السعاده والدلال لكن اكو نقص بحياتي منغص علي عيشتي كلما اشوف طفل لو وحده مخليه ابنها بالعربانه وتدفعهه اتمنى يجيني يوم وأصير مثلهه من اشوف الحامل اتحسر
أخذتني امي الدكتوره ... فحوصات وتحاليل وسونار طلع عندي اكياس عالمبايض انطتني علاج وكالت بعد شهر راجعيني وكتبت تحاليل لزوجي
انطيته التحاليل محمد صار عصبي
سهير. اشبيك هو تحليل ليش تضوج
محمد لج بابا هاي الدكتوره تريد تدوخنه اني مابي شي ولخاطرج راح أحلل
فعلا محمد سوى تحاليل مابي
شي بس المشكله عندي وارادة رب العالمين شحجيلكم
خالتي كلسع تسمعني حجايه مرت سته اشهر اخرى واني نفس الوظعيه كملت العلاج وصرت اطفر من دكتوره لدكتورة وكل وحده تنطيني أمل والامل بالله لكن ميفيد مرت السنه الثانيه واني بديت افقد الأمل واذبل كنت افكر اكول اذا يتزوج محمد علمود الطفل اني شيصير بي بس هو من حقه يصير عنده طفل يحمل اسمه ليش اصير انانيه
بهالفتره طلع نقل محمد بالسفارة العراقيه بتونس الله بلد جميل تونس الخضراء صحيح رب العالمين ينطي شي وياخذ شي سبحانك ربي تحظرنه للسفر ويه ما كنت ارتب شنط السفر حسيت بدوخة واغمى علي التمو علي خالتي واتصلو بمحمد شمموني عطر فتحت عيني شفت محمد يمي باسني من راسي
حبيبتي سهوره خرعتينا سلامتج
ما اعرف محمد اشبي اشو فقدت التوازن وماحسيت
بهاذا الشهر حسيت اكو تغيرات بجسمي كلت يمكن حامل بس خفت احجي اخاف يطلع مو حمل وصعبه خلي اروح لاهلي وامي تأخذني للتحليل
فعلا يوم الثاني رحت حللت وطلعت حامل بعد عذاب سنتين
امي طارت من الفرح يعني حايصير عندي حفيد ولج ماما ابقي يمنه وين ترحين وانتي حامل
سهير. ماما صدك تحجين اعوف رجلي وحده هناك لا ماما لا رجلي على رجله
ام سهير. بنتي اخاف عليج لان حامل
سهير. ماماالله الحافظ
سهير. اجه محمد وشافنه كولنه مبتسمين واني تلكيته حظنته وبسته كال
اشو اليوم حبيبتي فرحانه فرحيني وياج
سهير. حبيبي حاتصير اب
محمد شنو بالله عيديهه ماسمعتج
حبيبي حايجي ولي العهد الي كنا ننتظره سنتين
حظني وفرني وطار من الفرح مامصدك سهير يعني تاكدتي اخاف غلطو خلي باجر اوديج تحليل ثاني
هاي اشبيك حللت مختبر مضبوط وراجعت الدكتوره
محمد لعد حبيبتي إنتي ابقي هنا واني اروح قبلج ارتب البيت استأجر واثثه وانت عبري كم شهر الاولى وتعالي وراي
سهير لا عفيه محمد
محمد معوده هذا كوه حصلنا ما اريد نفقده فدوه سمعي كلامي
سهير. ميخالف حا اسمع كلامك لخاطر ابني
سهير. فعلا سافر محمد وحده واني بقيت يم اهلي همزين مسافرت لان كان وظعي تعبان بس نايمه وصار عندى نزيف الدكتوره كالت لازم عمليه ربط لان عدهه إسقاط مهدد
وسويت عمليه الربط وبقيت نايمه على ظهري حركتي قليله
من سمع محمد ماقبل اسافر خاف نفقد الطفل كال ابقى اولدي وراها تعالي بعد الولاده
خالتي ام محمد تسال علي يوميه وأهلي فرحانين بالحفيد الجديد مرت علي 9 اشهر اخاف أتحرك وحبيبي محمد يتصل يوميه اول سوال عن الزائر الجديد ويكول شوكت يجي ابني وكان محضر اسم مراد كال اذا ولد سمي مراد واذا بنيه سميهه مريم
بالشهر الاخير هم لازم فتح الربط بالمشفى شكد اكره المستشفى وريحتهه غصبا على أخذوني وبطني شكبرهه واني اتدعبل سوتلي فتح الربط وصرنه ننتظر موعد الولاده
اسعد لحظات بحياة الانسان من يحصل على شي وهو انحرم منه فتره اني فقدت الأمل وايست لكن الحمد لله شكد تتعب الحامل بنومتهه من تتقلب وبكعدتهه مشيتهه لكن كلهه كانت على مثل العسل لأني انتظرته هالفتره
وبيوم كنت نايمه ماحسيت الا وجع قوي صرخت من الالم
بقيت اصرخ ولج يمه لحكيني الم ماينحمل اوجاع الطلوق الله يساعدج يا يمه اشلون جبتينه هم هيج تاذيتي يمه همزين اني يمكم جان هناك منو يمي
وجبت احلى ولد سميته مراد يجنن وجهه مدور يخبل فدوه من كملت وودوني لغرفتي جابولياه احلى شعور واحلى احساس من شفته وحظنته نسيت كل تعبي ودي يبقى بحظني
امي كالت لا تعلمي عالحظن
سهير. ماما انت هيج تحبينه هذا الكائن الصغير اخذ كل مشاعر الحب الى بكلبي
محمد طار من الفرح من اتصلو بي وخبرو
طلعت من المشفى اتصل بي محمد
الو حبيبتي سهوره الحمد لله على سلامتج اني بعد أسبوعين اجي اجازه اسبوع وأخذكم وياي لتونس حضري نفسج حياتي مشتاقلج
سهير. مراد يسال على ابوووو
محمد. معوده لا تخليني اعوف شغلي واجي
سهير حبيبي مابقى شي اصبر بس من تشوفه بعد ما تعوفنه
محمد نزلت دمعتي بين الفرحه وبين مشتاق لشوفه ابني وحبيبتي سهير
مرت على الاسبوعين شطولهن
سهير. ماما همزين بقيت ما سافرت اني وين اعرف اكمط الطفل وين اعرف اداري لو ما إنتي كان شسويت
ام سهير. اي بنتي هذا الموضوع يحتاج خبره وهسه انتى تعلمتي كل وحده بأول طفل مثلج بعدين تتعود
بعد أسبوعين اجه محمد وكبل على بيت اهلي اجه ملهوف على وعلى ابني مراد كان نايم ومحمد كلسع يشيله من السرير شوكت يكعد اريد اشوف عيونه من يفتحهن
مراد عنده وحمه بظهره سوده تقريبا سنتمتر واحد
اخذناه للدكتور طهره لان امي كالت قبل ماتسافرين هناك وحدكم تدوخون حبيبي شكد بجى وبرطم بس لازم احسن من هو صغير من يكبر يتوجع
كملنه كل حاجاتنه وسافرنه لتونس
كل يوم نكعد نباوع على مراد يكبر بعيني وحبي اله يزيد هناك الجو مختلف عن العراق بلد جميل وطبيعه جميله كنا نطلع بالحديقه واخلي بالعربانه وهو يبتسم يحب الطلعه
كبر مراد بقينا بتونس اربع سنوات وكل سنه بالصيف نجي لبغداد لاهلي وعيالي العائلتين حبو ابني وتعلقو بي وهو يحظن الكل ويحبُهم
من صار عمر مراد اربع سنوات
سهير. محمد حبيبي راح اطلب منك طلب
محمد كولي سهير طلباتج أوامر
سهير. بصراحه اني من ايست من الحمل نذرت نذر يمكن شويه صعب بس لازم نسوي
محمد شنذرتي
سهير. نذرت نروح للحج اني وياك ومراد وهالسنه لازم نروح قبل ما اسوي طفل ثاني
محمد والفلوس تدرين شكد تكلف
سهير. محمد اعذرني اني كنت اجمع من الفلوس الى كنت تدزهه مصرف وصار اربع سنين اجمع وهسه فلوسي كامله
للحكايه بقيه. بقلم فردوس عبد اللطيف. F
YOU ARE READING
طفلي الضائع
Romanceامرأة تسافر الى الحج مع زوجها وابنها الصغير يبلغ من العمر اربع سنوات وتحصل المصيبه تفقد طفلها تابعو الاحداث هل يعود لحظن أمه ام يبقى تائه في مكه
