طفلي الضائع

الجزء الخامس

#طفلي-الضائع
بقلمي فردوس عبد اللطيف
الجزء. الخامس
وافق محمد نروح للحج وقدملنه وطلعت اسماءنا فرحت ما مصدكه اني بهالعمر واروح لبيت الله حضرت أموري وامور السفر وصار الموعد اتصلنه باهلي
الو هلو ماما.   اريد اسلم عليكم ابرونه الذمه باجر نطلع للحج
ام سهير.  ياحبيبتي الف عافيه بس مراد ليش ما جبتي يمي حايتبهذل ويبهذلج
سهير. يوم وين اكدر انام  ومراد مو يمي وبعدين هذا نذر علموده احنا رايحين
ام سهير.  والله بابنتي اخاف يتمرض وبعده صغير وانت كوه حصلتي
سهير.  لاتخافين ماما هو وياي وين ما اروح
ام سهير سمعي بنتي كتبي ورقه بيهه اسمه وأرقام تلفوناتكم وعنوانكم اخاف يضيع شي عالاقل يتصلون بيكم ترى هناك هوسه وهو بعده ميفتهم كوله 4 سنوات
سهير.   صدك ماما نبهتيني خوش فكره اخلي عنوانه واسمه وتلفوناتنه بجيبه وين بابا وإخوتي خلى اسلم عليهم
سلمت على اهلى كلهم واتصلنه بأهل محمد كذلك سلمنه عليهم ودعنه اصدقاءنه بقت ساعات على رحلتنه كتبت مجموعه أوراق وخليتهم بجيوب ملابس مراد مثل ماوصتني امي ....
توجهنا للمطار مع الحمله وسافرنه هذه اول مره أزور بيت الله كلي لهفه وشوق لأداء فريضه الحج
اول ما وصلنه توجهنا للحرم المكي وادينا الطواف والسعي كملنه رجعنا للفندق تحللنه سبحنه ارتاحنه كان بوقت الطواف ازدحام فضيع بحيث كنا نقضي الطواف بوقت اطول من المعتاد لان صرنه بالطرف رجلي تعبت من نمت ماحسيت بالدنيا وحبيبي مراد نام من التعب
صار يوم عرفه هم مراد تعب صحيح الطفل يبهذل بالسفر وبعد اداء مناسك الحج كملنه حجتنا وره العيد رجعنا طواف الوداع الا اني منتهيه احس عندي نقص نوم وتعبانه
رحت على صفحه النسوان كتله لمحمد حا اروح اتمدد وره الساتر الى بي النساء لحد ما يجي وقت الصلاه تمددت ماحسيت على نفسي غفيت الا سمعت الاذان فتحت عيوني ابني مراد مو يمي صحت مراد مراد ماكو جواب والمؤذن بالحرم يأذن اني احس عيوني غوشت النسوان ملتهيات الي تقرى قران والي تدعي والي تصلي محد بحال احد سالتهن وين ابني محد يجاوب كتلهم راح يم ابو مو ركضت أصيح مراد بين الزلم الناس تصلي ومحد يمي زوجي سمعني اجاني يركض ولج سهير وين الولد ضيعتي
عطت ليش مراد مو يمك لادكول مو يمك فدوه محمد كول يمي كاعد هذا ابني وين الكي استلمونه المسؤلين الامنين اجوي علينه يستفسرون حجيتلهم كالو هسه نبحث تكلمو بالجهاز وصو المسؤلين عالابواب لكن شيلزمون 7 أبواب ضخمه وكل بال يطلع على شارع بقيت ادك والطم كلي أمل مراد ماشي شويه وتاه وضيعني بقينه يمهم انخبصو اتصالات وبحث ....بقو يتكلمون مع محمد اشوف محمد وجهه اصفر اخضر ظل يبجي وكعد عالارض
ركضت عليه محمد لا تحجيهه ولا دكولهه وين ابني اريد ابني .....كعدت وياه عالارض حظني وبقينا نبجي بس اني مايقنعني كلامهم ابني وين اريد ابني ما اتحرك من مكاني
اخذونه سوينه بلاغ واخذو صورته نشروهه حتى عالمنافذ الحدودية اني ما مستوعبه الوضع أتلفت كلسع اسمع صوته يصيح ماما التفت ماكو بس صوته يرن بأذني
الضابط كال احتمال انخطف مو ضاع ولازم ندور اني كتلهم لا ابني ضاع وهسه يرجع بقيت كاعده بالحرم ما اقبل اتحرك من مكاني اكول بلكي احد يلكي ويرجعه محمد يتوسل بي لا اكل لا شرب طبع الصور وظلينه نفتر عالحجاج ونراويهم صورته نكول بلكي احد شافه لكن منو ينتبه ومنو يحفظ وجوه هناك الانسان ينسى الدنيا ومافيها من ملذات  ويفكر باخرته طيب ليش ابني هنا ينفقد باقدس مكان اكيد هذا اختبار من رب العالمين لازم اصبر النسوان وياي بالحمله يقنعوني ويتكلمون معاي لكن اني بعالم ثاني اذاناتي وعقلي ما يستوعب كلامهم اتعب اكعد ارتاح شويه وارجع افتر واراوي صورته للحجاج بلكي احد شافه لحد ما اغمى علي لا ثلاثه ايام لا اكل ولا شرب وبس امشي والقهر بداخلي بقيت بالمشفى يومين فاقده الوعي بغيبوبه ما اريد اصحى عالحقيقه اريد من افتح عيني اشوف مراد كبالي
بعض الاحيان العقل البشري ميستوعب فقدان شخص عزيز فيصير عنده نسيان مؤقت حتى لا يفكر فتحت عيني بعد يومين يعني صار 5 ايام على فقدان ابني مراد لكن ماكو اي خبر لكيت محمد كاعد يمي بالمشفى لحيته طويله ذبلان تعبان
سهير ها محمد وين مراد
باوعلي نظره حزينه عيونه مدمعه ...الحمد لله على سلامتج
جاوبني شنو الى صار شنو نتائج التحقيق ابني وين راح فص ملح وذاب ياناس هذا بشر دم ولحم وين ودو شيسوون بطفل
محمد.   يمكن ياخذو يكدون بي بس هالفتره اكيد حايخفونه لان يعرفون جاي ندور عليه.  الضابط بلغني لازم نرجع ترى جماعتنه بالحمله رجعو بقاءنا هنا شنو اني أجلت حجز الطيران لازم نحدد موعد ونرجع
سهير.   محمد هذا مراد الي حصلنا بعد كل هالعذاب تريدني ارجع بلياه اجيت وهو بين ايدي بحظني اشلون ارجع اشلون اعيش اشلون انام اشلون اكل انت مستوعب الكلام الي جاي تحجي
محمد.   بقاءنا هنا مابي فائده هما مراح يطلعو وهسه هو بس الله الي يعلم هو وين  اواعدج نرجع لان شغلي  ما اكدر لازم التحق  والسنه القادمة اجيبج بالحج وندور عليه لان كال الضابط بعد كم شهر اذا عصابات المكدايه خاطفي ينزلو يكدي
سهير نزلت دموعي وماعندي حل ....بس اريد منك طلب وديني للحرم المكي اصلي وأمنه يم رب العالمين واطلب من ربي الكي ابني مو هناك الدعاء مستجاب
محمد ميخالف اوديج بس آكلي صارلج اسبوع عالمغذي لازم تاكلين
اخذت ملعقتين شوربه ما احس بطعم اكل حلكي مر الدنيا سوده بعيني طلعت من المشفى توجهنا للفندق حجزلنه محمد كان ازدحام لكن الحمد لله حصلنه رحت الكعبه صليت واستودعت ابني امانه يم رب العالمين وطلبت منه الكي لو ابقى العمر كوله ادور عليه
شتتوقعون سهير حاتشوف ابنهه لو ما تلكي انطوني رايكم
ترقبو الجزء الاخير تحياتي فردوس عبد اللطيف f