طفلي الضائع

الجزء السادس والاخير

#طفلي-الضائع
بقلم فردوس عبد اللطيف
الجزء 6 والاخير
رجعت لتونس واني تقريبا منهاره دموعي ماوكفت اتذكر اشلون من اجينا وكان بين ايدي لزمت نفسي كوه من وصلنه للبيت دخلت على غرفته الطم وابجي واشمم بهدومه انهارت أعصابي من كثر ما الوم بنفسي ليش نمت
يا يمه يامراد هسه انت وين جوعان شبعان نايم كاعد منو يمك سبحوك انت متعلم ماتنام الا اسبحك يمه شسوي بالدنيا بلياك يمه شوصفلكم سامعين طابوكه بصدري خانكتني ليل نهار يكولون اصبري شصبر ومنين اجيب الصبر مئه فكره براسي تجي حتى النوم نسيته تمرضت نمت مشفى صار بي ضغط وسكر الأطباء نصحو محمد يرجعني لبغداد لأني صرت جسد بلاروح وفعلا وداني لبغداد يم اهلي بقيت طريحه الفراش ما اكدر اتحرك اهلي خيم الحزن عدهم من قهرهم علي وعلى مراد بس ابوي كل يوم يتكلم وياي ونصحني بالتوجه لرب العالمين وصرت اصلي قيام الليل كل يوم وأدعو ربي واكو دعاء كنت اكوله يوميه(اللهم اني أستودعك ابني مراد يا من ودائعهه لا تضيع أبدا )توجهت اقرى القران بحرقه كلب وابجي وأطلبه من ربي
حتى توجهت للكشاف اخذت ابن خالتي عمره 9 سنوات حتى يشوفه بالمرايه كال يمشي يمه وين يمشي كال مكان بي ناس سوق او ما يعرف بس مكان مزدحم بس هدومه مبهذله
يمه وليدي ....المهم عايش ويشتم الهوي شوكت يجي موسم الحج صارت على السنه طويله
مرت الأشهر واني كظيتهه دعاء وعباده محمد خطيه وحده بتونس كل يوم يتصل يطمن علي
محمد. الو هلو سهوره سجلت بالحمله حجزي وتعالي حتى نروح مثل ما وعدتج
سهير. حبيبي محمد اشكرك وعدت ووفيت ان شاء الله نلكي كلبي يكول حانلكي راح أحجز اعرف انت تحملتني وتحملت وظعي واني عفتك بهالازمه لكن اعذرني هسه صار عندي أمل الكي ابني حبيبي
محمد. تدرين سهوره اني ليليه ابجي بالبيت ونومي قليل فراكم صعب بس ان شاء الله نجتمع
سافرت لتونس استقبلني حبيبي محمد وعدني بعد ما نكمل حجتنا نرجع للعراق قدم على نقل لان الغربه صعبه وخصوصا احنا ما شفنا بيهه راحه
صار موعد رحلتنا واني كلبي لهفه وشوق وكلما اتذكر العام الماضي ابني باحضاني واشلون نام بالمطار اباوع على مكانه ودموعي تنزل وأدعو من ربي الكي
نزلنا ورحت كبل الكعبه أديت الطواف كان ازدحام وقت ليل
كملنه السعي ورجعت بالساحة انتظر يأذن الفجر
محمد. سهوره مانروح نتحلل للفندق نرتاح
سهير فدوه عوفني لا اريد فندق ولا اروح اني باقيه انتصر مراد راح اروح لنفس المكان الي خطفو منه بلكي يتذكر ويجي
خطيه محمد احتار بي كلسع يجي يجيبلي اكل اكوله ما اريد شي يكول لا آكلي لا يضعف جسمج
صارت الصلاة صلينه وكملنه وراها محمد كال حا اروح للضابط اساله بلكي عنده خبر
روح فدوه بلكي
راح محمد واني كاعده بمكاني انتظر ناس تجي وناس تروح واني عيني عالاطفال اكول بلكي الكي
محمد....سهوره ها محمد طمني اكولج يكول لا تسالون الناس ولا تراوين صورته لاحد حتى لا يسمعون ويضمو خلي احنا اني وياج ندور بقينا ندور اطفال وكبار مكاديه خارج الحرم حولين الكعبه محمد يطلع من صفحه واني من صفحه
اليوم الخامس تعبنه واحنا ندور بديت أيأس كلت اخاف مسفري لغير بلد اجيت بالساحه الناس ترمي اكل للحمام بقيت صافنه اتذكرت من اجينه راويته الحمام وهو كان فرحان يركض وره الحمام شفت طفل توجه عالحمام بس من ظهره كأنه مراد ابني شعره طويل وسخ ملابسه ممزقه كان يكدي من النسوان تبسمرت حلكي يبس ما اكدر انطق ولا اتحرك
المشيه هي نفسهه ياربي اريد امشي أوصل يمه هي كم خطوه لكن صارت اميال ابني مراد هذا ظهره
مشيت اريد امسكه وصلت يمه لزمته ودرته علي وكتله مراد
باوع علي ضَل صافن ما يتكلم حصنته كعدت عالارض أبوس بي وهو بين بتذكرني وبين يعاتبني ووووً
كلت اخاف مو هو درت ظهره عنده وحمه بظهره نفسهه
الناس التمو علي شافوني اصرخ وابجي ولك يمه وين كنت وين رحت ليش ساكت احجي اريد اسمع صوتك جاوبني
اجوي المسؤلين الامنين كالو تفضلي نسجل محضر حتى تستلمين ابنج اتصلو بزوجي لحكنه للمخفر
دخل محمد وظل يصرخ كأنه كابت بكلبه طول هالفتره ويحظن بمراد هم جيك ظهره اني صافنه واباوع عليهم ودموعي تجري مابين الفرح ومابين القهر الي شفت منظر ابني بي كالو لازم تجيبون جوازه ولازم نسويله تحليل ونتأكد ابنكم وفعلا سوو تحليل وتاكدو واستلمنه ابني ركضت للحرم صليت صلاة الشكر لله وزعت شكد كان اكو فلوس بشنطتي عالفقراء كتله بعد خلي نرجع نشوف الولد شصاير بي
رجعنا لتونس وراها سوه انفكاك وسافرنه لبغداد
بس مراد احسه مستغرب مني من ابوه ما يبتسم حزين ساكت على طول من أخذته اسبحه ما قبل يريد هو يسبح بس شفت بجسمه اثار حرق الظاهر مجوينه حتى يسمع كلامهم
بعد ما بده يتذكر حجالي كال انت كنتي نايمه اجتي مريه بيدهه جكليته اشرتلي تعال اخذهه رحت يمهه فتحت الجكليته اكلتهه رأسا نمت وراها شفت نفسي بمكان بي ناس هوايه واطفال اكثرهم سمران بعد فتره اجبروني اروح أكدي واذا ما اسمع كلامهم يجوني بالسكين كنت ابجي بالليل اريد ماما اريد بابا هم يضربوني كنت اجوع مينطوني اكل يكولون انت اطلع للشارع واطلب الاكل من الناس
حظنته وبقينه نبجي اني وياه
سويت حفله وعزمت كل اقربائنه واصدقائنه كانت فرحتنا ماتنوصف احنا والاهل لكن الى صدمني خلال الحفله
كنت مشغوله بالمطبخ دخلت للصاله واشوف ابني ماد ايده ويكدي من النسوان الخطار والنسوان مستغربين من تصرفه
ركضت اخذته للغرفه بقيت ابجي بس ما كدرت اكلمه شي
راجعت طبيب نفسي واستفسرت على طريقه تعاملي مع ابني الظاهر هذه السنه اثرت على سلوكه
والآن ابني عمره 20 سنه وطالب بالكليه صحيح بعض الاحيان يتصرف تصرفات غريبه لكن هو بين احضاني
وصار عندي بنت وولد من بعد مراد
اشكركم وأشكر تفاعلكم معي بقصتي بس احب اكولكم ان الله مع الصابرين ومهما عصفت بك الدنيا تذكر ان هناك رب يستجب لدعائك ...... اختكم سهير
النهايه
..............................
اعزائي أرجو ان تكونو استمتعتم بهذه القصه واستفدتم من العبره وأحب اسمع ارائكم بعد ما انتهت القصه احب تناقشوني ولكم مني التحيه
ترقبوني بقصه جديده
الكاتبه فردوس عبد اللطيف. F