بنات واولاد

بنات اولاد ١

بنات واولاد
بارت1
زينب الموسوي
دلي اللول يالولد يبني نعاوي امهاتنا وصوت الحنيه وهي تنوم الولد الذخر منو بينا ماسامعها منو بينا ماشايف دموع الام وهي تحظن اول طفل بعد الولاده  وفرحة الاب من يبشرونه بولد الوالي الي يشيل الاسم ويحمي خواته  الولد الولد
احچيلكم عن عائلتي بيت ابو ثائر احنا خمس بنات واولاد اثنين اكبر واحد ثائر مات بنهاية حرب ايران
جعفر بابا هزمه لروسيا خوفا عليه من حرب ايران ومن ذاك الوكت ماسمعنه عنه خبر او وصيه سالنه الرايح والجاي محد انطانه خبر
البنات زهره متزوجه من اقارب ابوي وبيتها قريب منا وهي امنا الثانيه وزوجها ابن وسند لبابا
جواهر متزوجه اقارب تعرضت لخلع بالورك اثناء الولاده وصارت قليلة الحركه وعرجى زوجها ذبها عدنا هي وابنها مهند وتزوج وطلگها
هدى مدرسه اجتماعيات وكانت بعثيه كبيره بالحزب  ومتزوجه رفيق حزبي متزوج قبلها وعنده جهال وهي عدها بنات اثنين عروبه وحريه
اسيا ما متزوجه انخطبت مرتين ومصارت قسمه وظلت كل متجي قسمه متصير يگولون معگوده خلصت سادس وگعدت بالبيت
اني عفاف اخر وحده وزغيره مواليد ٩٣ ماما حبلت بيه بعد انقطاع عن الخلفه مده ١١سنه حتى من حللت ماصدگت هي حامل لان كبرت كل الي بالبيت يعتبروني بتهم وبابا كان اكثر وحده يحبني بزر الشيب مثل ميگول
بابا حجي نزار تاجر مواد جمله بالشورجه ومحلات بالسوق العربي بس مريض وضعيف ودائما يشكي من القرحه والقولون
ماما فيحاء كانت موظفه وگرايب بابا من النجف ومن تزوجت تركت الوظيفه وخلصت عمرها تبچي على ولدها الي راحوا
بسنة ٢٠٠٠الصبح اندگت الباب قوي وبشكل مخيف طلعت ام ربيع مريه تشتغل عدنا تساعد امي فتحت الباب خلال دقايق انملى بيتنا رياجيل امن ومكافحه وماادري شنو سالوا وينه ابو ثائر
طلع بابا تفضلوا اني ابو ثائر
هاي انت حچي وتريد تدمر اقتصاد البلد يله تفضل ويانا
عمي انتم منو وشمسوي لاقتصاد البلد اني رجال معروف  وبنتي عضو فرقه هدى معروفه بالحزب
هذا الحچي گوله هناك اسمك مطلوب وعود الرفيقه هدى خلي تلحگك
طلع بابا واحنا ملزمين بهدومه ونبچي چان عمري سبع سنين رد علينا
لاتخافون اكيد غلطانين وخابروا ابو عروبه يجي عليه
ظلينا بالبيت مرعوبين نبچي وامي تتصل بهدى وزوجها عرفت السالفه وگالت اني اتصرف هاي صايره حمله على التجار
زهره اختي من شافت السيارات بالباب جتي تسال شصاير ماما حچتلها مرت الساعات علينا طويله نريد احد يتصل بينا يردنا جواب لحد الساعه اربعه العصر اجتي هدى وزوجها سالتها امي جاوبت
واحد من العمال مشتري بضاعه اجنبيه ومخليها بالمحل وداخلين الاقتصاديه شايفيه ساليه المن مجاوبهم للحجي
وهسه يمه ام عروبه شنو الحل
ابو عروبه يحاول بلكي فلوس واسطه وتفض بس بابا كلش تعبان والقرحه هايجه عليه اذا يبات هناك احتمال ميصبح عليه الصبح
اسم الله عليه شلون تگولين هيچ يارب دخيلك ماعدنا غيرك انت وهالرجال
بقى بابا بالتوقيف عشر ايام واحنا مابقينا احد مابوسنه ايده وماما حتى ذهب ودت هديه للضابط المسؤول عن التحقيق طلع يوم العاشر الظهر منهك تعبان جوع وخوف واهانات ويمكن حتى ضرب ومن ذاك اليوم بابا تدهورت حالته الصحيه وگعد بالبيت وسلم الشغل بيد رجل اختي زهره محسن بس هم مرات يضوج من حبسه البيت ويروح يشوف محلاته بهاي الاثناء ورا كم شهر اندگت بابنا من جديد وانملى بيتنا رياجيل مره ثانيه كنت اريد اطلع للمدرسه الصبح واحد صاح وين حچي نزار الحرامي ودخل للبيت
ها حضرة الضابط خير انشاالله
خير منين يجي وانت وجماعته تحتكرون السلعه وتزيدون الاسعار
حضرة الضابط ترى والله انت غلطان اني مخازني متبقى بيها بضاعه راسا تتوزع على معاميلي وعلى المحلات
هذا الحچي كوله بالتحقيق مو هنا...يتبع