بنات واولاد

بنات اولاد ٧

بنات. اولاد ٧
زينب الموسوي
ثاني يوم باليل زارونا عمامي وعمتي فريده واحمد حتى يحچون ويه جعفر گالوا  اله. اخواتك وامك ماعدهن احد غيرك  وكلفنا يريدن تقسيم الاملاك وحتى البيت وكل تعبك المحلات احسب احسابه واخذه هن ميريدن يظلمنك وانت اكيد متريد تظلمهن احسن متصير محاكم ومحامين جواب جعفر كان مفاجاه للكل
البنات مالهن ورث عندي اثنين تنازلن. وبقن تلاثه جواهر وعفاف ميتزوجن اذا مايوقعن تنازل وامي تنازلت عن حصتها الي وشغله ثانيه البيت هذا امي انطتنياه هبه يعني هن گاعدات بيتي ويهددني بالمحامي ومحاكم
الكل تفاجي بلي سوته ماما هذا البيت لامنا مافكرت وين نروح جعفر سأل عمتي    انتي شجابچ ويه عمامي انتي متزوجه رجال غريب لو هم تريدين حصه من ورث حجي نزار
اني لو اريد حصه اخذتها من زمان بس الله يدري الي دتسويه باخواتك نفس الي سواه ابوك وياي ويه اخوته
اني متاكدهذا تخطيطچ عرفت جياتچ علينا مو خاليه حرضتيهن عليه
لا والله ماحرضنا بس هن كلفن احمد يشوف محامي
واستاذ احمد شنو بالموضوع هم يطلبني ورث
احمد يريد عفاف واني خطبتها من امك وگالت ورا زواجك
ماشاء الله وضح الفلم احمد يريد عفاف وياهاحصه من تعبي وتعب ابوي سنين الثار القديم عمه عرفتي تخططين بس شوفي لو اعرف اخليها بدون زواج طول العمر متاخذ ابنچ
احمد گال تتنازل عن الورث الك مااريده واخذها
حتى لو عناد بيك وبامك لاتاخذون من املاك حجي نزار ولا من بناته
بدا الصياح والعياط والغلط وتركوا البيت وطلعوا انفتحت علينا ابواب جهنم جعفر وسحر من طرف واني وجواهر طرف
جواهر راحت على امي يمه گولي هذا الحچي چذب والبيت بعده باسمچ
لا ماما البيت باسمه هبه مجنت ادري هيچ يسوي بينا
وهسه يمه اذا هبه تگدرين ترجعين بيها
دخل جعفر لا خاتون متگدر ترجع لان كتبته باسم سحر لان اعرف راح تحرضن امي عليه
يعني هسه بيت بابا صار السحر شدتحچي جعفر
الي سمعتيه والمحلات الي بقت بس حصتچ انتي وجواهر  تتنازلن لو اطين عيشتچن
سمعتي يمه هذا الوالي لو نتنازل لسحر عن املاك بابا لو يطين عيشتنا اصلا عيشتنا طين من يوم دخلت حياتنا  المن رجعت
ماما حاولت تهدينا بس احمد ضرب جواهر وجرها من غرفة ماما للدرج وهو يصيح العرجى وسحر ضربتني واني ضربتها ماما حاولت تمنع العرك وگعت اجى جعفر يصيح كله منچن اطلعن من بيتي اخذي اختچ وطلعي روحي لاحمد خلي يفيدچن
ماما تبچي حرام عليك ذني خواتك شرفك تذبهن بالشارع  جاوبت سحر هن منيلهن الشرف  ماتحملت اني وماما جريتها من شعرها ذبيتها بالگاع وماما وجواهر كملن الباقي
وجعفر دافع عن مرته شفته يدفع ماما اخر العركه سحر گالت لو يطلعن من بيتي لو اني اطلع حتى امك تطلع هذا بيتي واذا ماعجبك انت هم اطلع
طردنا باليل ماعدنا غير بيت زهره رحنا عليها الذل الي شفته بعين امي عمري مشايفته ومنين ابنها وبنت اختها سلمت حلالها اله وتاليها ذبها بالدرب وعند النسيب مر علينا الليل كله نبچي ونلومها على الي سوته
اتصل احمد يريد يعرف شصار جاوبته
جعفر طردنا حتى ماما
وين انتوا هسه
وين بيت محسن ابتلى بينا كل يوم وحده مطروده وداگه بيته تدري البيت ماما كاتبته باسم جعفر وجعفر منطيه لسحر
صدوگ تحچين شلون خالتي هيچ تسووي
ضحك عليها واستغل عاطفتها وحاجتها للولد
شوفي عفاف هسه اجي عليكم وتعالوا يمنا
لا احمد مترهم ماما تعبانه خليها هنا على الاقل بناتها واحفادها
شبيچ گوه تحچين
راح اموت گلبي يريد ينفجر اتصور يدفع ماما من الباب وسحر تجر بينا والله هسه لو واحد ينطيني حزام ناسف افجر نفسي بيهم
على كيفج ويانا ابو بكر البغدادي
حتى ابو بكر البغدادي هم احسن من جعفر بس وداعة امي ودموعها الا من الصبح اوكل محامي واخذ حكم حتى المحلات ماخليه يطبها  واطعن بالهبه وبتنازل اخواتي وهاي سحر الا ادفعها ثمن ضربة امي غالي وهسه تشوف
عفاف والله اهدي وديري بالچ على امچ ترى كلشي اله حل
وشنو الحل بالله
امچ يومين تلاثه وترجع لبيتها واكيد جعفر يعتذر منها وجواهر ابنها سبع هسه ياخذ امه وياه وانتي هذا البيت موجود اعتبري بيتچ واذا تريدين ااجر بيت ونتزوج وحتى امچ واخواتچ هلابيهن  يعيشن ويانا
تدري انت هسه لو يمي چان فشختك احمد ترى مو كلشي حله الزواج يعني احنا خمس بنات وامنا ليش مالنا حق يكون النا بيت للمريضه زعلانه نفسى مطلگه هاي املاك بابا كلها واحنا نگعد عند النسابه ميصير  انت لوتريد حل ساعدني اخذ حقي وحق اخواتي
حبيبتي عفاف انتي هسه عصبيه روحي نامي وباچر اجي عليكم والي تريديه يصير
ماگدرنا انام اليل كله وماما گعدت تصلي الفجر ودموعها على خدها
خلصت رجعت نامت الصبح يادوب غفينا دخلت زهره  تگعد ماما جعفر جاي ياخذها بين النايمه والواعيه اسمعها تصيح ماما وچ يمه جاوبيني فزينا من نومنا كلنا وگعنا عليها نحرك بيها متتحرك وجسمها بارد ثلج صرخنا مفاد ماتت ماما وعافتنا