بنات واولاد

بنات اولاد ٥

بنات.    اولاد ٥
زينب الموسوي
طلعت نتائج الامتحانات ونجحت  وتمت خطوبة جعفر وسحر وبليله اتصل احمد بيه
عفاف حچيت ويه اهلي وراح نجي نخطب قبل دوام الكليات
وشمعنى قبل دوام الكليات
احجزچ غير اخاف دخلين كليه وتغيرين رائيچ
والله مااغير  رائي وگلبي الك وحدك
بس اني رايدج كلچ
انت گلت انتظر التعيين
يجي التعيين لان مركزي هسه ننخطب وبعدين الله كريم
اگلك شي ومتزعل وتفهمني غلط
گولي شكو وليش افهمچ غلط
افرض جعفر طلب اتنازل عن الورث وتنازلت تاخذني لو لا
سؤالچ جرحني بس تنازلي  عنه اني ممحتاج فلوس ابوچ
زعلت ها.   هو سؤال حتى اعرف انت مشتريني الي
انتم عائلتكم كلها نفس التفكير ماديين
هاي من هسه انتم واحنا شلون تخلص عمر كامل
كلامچ غثني روحي هسه بعدين اتصل
لا عفيه لاتزعل الله يخليك اعتبرني مگلت شي او اخذني على گد عقلي ولاتزعل فدوه
توسلي بعد  بت حجي نزار
بت حجي نزار تموت عليك والله
واني هم اموت عليها
منو هي.       بت خالي عفاف احبها اموت عليها       اگلك اليوم ماكو حضر التجوال تعال هسه اخطبني
اي اجي هسه وباچر نتزوج ها
والله ماعندي مانع بس تعرف اجرائات الزواج عدنا بس الصالون لازم اخلص بيه نص يوم خو مااتزوج وشعري اسود ميصير
ليش ميصير الا اصفر
طبعا حتى الشيخ الجامع قبل العقد يسالني بنتي راح تصبغين شعرچ يوم العرس اصفر لو لا.  اگله اي عمو اتعهد بصبغ شعري اصفر
لچ والله اذا صبغتيه اصفر الا  ازينه الچ
بعد احسن اشتري باروكه صفره
ثاني يوم عمتي زارتنا وحچت ويه ماما جاوبتها خلي يخلص زواج جعفر وهلا بيكم
طلع قبولي اداره واقتصاد محاسبه الكليه قريبه من بيتنا
وتزوج جعفر   وكانت الصدمه كبيره  بسحر بت خالتي  انسانه طماعه غيوره وتحب نفسها وبس من اول ايام فرضت شخصيتها الخبيثه على جعفر وصاروا اثنينهم يخططون يستوولون على البيت والاملاك بعد زواجها بشهرين جتي اختي هدى من النجف هي صار سنين مهزومه هي وبناتها وعايشه بيت بستان والدي البيت والبستان كان باسم ماما كانت عصبيه وخايفه وحچت ويه ماما
ليش هيچ يمه تبيعون البيت والبستان ومتكولون وين اروح اني وبناتي
منو باعه للبيت يمه انتي متوهمه
شنو متوهمه اجى الملاك الجديد وراواني المكاتبه بينه وبين جعفر هو مو البيت باسمچ شلون باعه
اني حولته بسمه گال محتاج البستان ابيعه حتى اوسع تجارتي
يمه كتبتي البيت باسمه وبس لا كتبتي هذا البيت باسمه ترى يطردنه بالشارع حتى انتي هم يذبچ بالدرب
لا يمه شلون اكتب البيت باسمه تخبلت
ماما شبيچ اشو ارتبكتي البيت هذا باسم جعفر
لا باسمي لاتخافن
يمه ترى اذا طلعتي مسجلته باسمه ارفع عليج قضية حجر شطلع هالجعفر حصص البنات اخذهن اني وبناتي شمرنا بالشارع زهره ماتطب البيت مهند طرده المحلات واردها كل اله ترى هاي مصايره
هنا سمعت الحچي سحر
وانتي هم ماعاجبچ جعفر موزين منه ملفيچ انتي وبناتچ البعثيه هسه اخبر عليچ متروحين تدورين على رجلج البعثي شوفيه وين والحگيه جايه تطالبين بورث متستحين
ولج اني مااستحي بس العتب على الدنيا خلت هيچ شكولات تدخل بيت حجي نزار
ظلت هدى تنتظر رجعة جعفر من الشغل حتى تحچي وياه ومن رجع كان رده
انتي صار سنين گاعده بيتي لاايجار ولاهم يحزنون بيتي وبكيفي
بيتك شلون هذا بيت امي
اخاف بيت رجلچ البعثي واني ماادري اطلعي منا احسن مااخبر عليچ بعثيه مهزومه اشو وظيفتچ ورجعتي الها بناتچ اكبار زوجيهن اني ابقى اكد عليچن الى متى ملجا ايتام هو
ماما حاولت تخليها تبات الليله عدنا مقبلت طلعت ودمعتها على خدها راحت لبيت اختي زهره هي وبناتها
الموقف هذا خوفني وحسيت لازم وحده منا توگف بوجه جعفر وترفع عليه قضيه ويقسم الورث مر عليه احمد للكليه وحچيت وياه بالموضوع
احمد هسه موضوع الخطوبه اجله
ليش شنو الصاير     امور هواي صارت احمد جعفر دياخذ كل حقوقنا وحده ورا الثانيه وزوجته حتى امي متحترمها
وهذا شنو علاقته بحطوبتنا
اعرف جعفر راح يگولي تنازلي عن الورث واني مااتنازل لو اموت
اني مااريد الورث راح اباشر بالوظيفه ومتحتاجين جعفر بعد
لا احمد اني اريد حصتي ماما منو الها على الاقل ارفع قضيه اطالب بحصتي وحصه جواهر وهدى وياخذ هو حصته ويطلع عنا
بس صعبه ترفعين عليه قضيه وانتي عايشه بيت واحد وياه
ماارفع عليه اطلب تقسيم الورث بابا ذاكرنا كلنا بالوصيه فدوه احمد ساعدني شوف محامي الله بخليك
اسال اهلي وارد الجواب