بنات. اولاد
بارت3
زينب الموسوي
بعد سنه من رجعت جعفر تغيرت كل حياتنا بدا يدخل بكل مصاريفنا ويحاسبنا ودخل مشاكل مع محسن رجع للبيت فد يوم عصبي ويصيح على ماما
نسيبچ هذا اكبر حرامي وبعد اذا مرته داست عتبة بابنا اذبحها صار سنين نايمين براسنا ويخزنون فلوس وباچر تجي تطالبني بورث
يمه جعفر محسن ماقصر ويانا صار سنين يشتغل واحنا النه الصافي وهذا مو غريب واختك الها حصه بحلال ابوها
يمه انتي على نياتچ صار سنين يلغف بحلالنا واسمعي زين ماكو بنيه تاخذ فلس واحد من حلال ابوي وتنطيه للنسيب يريدن يضلن هنا هلا بيهن بس الي تتزوج تتنازل عن الورث تعب ابوي ميروح لنسيب
بهاي الاثناء جتي اختي زهره رادت تعرف شصاير بين زوجها وجعفر
لچ انتي متستحين تبوگين حلال ابوچ وتبنين بيوت وقطع ارض وذهب منين كل هذا
خويه محسن كان شايل التجاره سنين اجازه يوم واحد مياخذ وبابا كان عنده ثقه بيه وكلشي مسجل بدفاتر وصولات
شوفي زهره انتي بعد مالچ دخله على هذا البيت وتتنازلين عن حصتچ
وليش اتنازل هذا حقي
مالچ حق عندي
لعد نشوف المحكمه شتگول
طلعي برا حراميه
منع زهره تدخل لبيتنا رغم هي كانت مو بس اخت ام النا وزوجها وگف ويانا باصعب الظروف وحتى ماقبل زهره تخلي محامي گالها عيب انتي مامحتاجه وهذا اخوچ الوحيد وجبرها تكتب تنازل لجعفر عن حصتها حتى ترجع تشوف ماما وتشوفنا بدت هنا محاولاته بطرد جواهر وابنها من البيت وماما مستسلمه لاوامره وماعدها غير حچايه هذا الوالي ماعدچن غيره
يمه هذا مهند صار سنين تصرفون عليه وگاعد ياكل ويشرب بلاش شنو فاتحيه دار ايتام راح يدخل كليه خلي ياخذ امه ويطلع ويشتغل ويعيشها سمعت جواهر
هذا بيت ابوي وبيت جده لابني محد مسوي علينا منيه
بس اني هسه الي اصرف على البيت ودورات ابنچ تكلف فلوس واكله وشربه اني اكد واتعب على زمال شگده شكبره خلي يشتغل
ودراسته يعوفها شلون
يعني واذا عافها اول واحد اخر واحد ومصاريف علاجچ كل يوم دكتور شتريدين رجلچ تصير زينه انتي عرجه بعد الاطباء المن
اشكرك خويه تعيرني بالمرض
بلا مأسي خصم الحچي اخذي ابنچ واطلعي وعود من نقسم الورث تعاي طالبي بحصتچ ولو انتي مالچ حصه صار سنين انتي وابنچ نايمه براسنا
حتى من كنا نطالب بفلوس مينطينه وحتى ماما ماظل ينطيها وحارب اسيا حرب نفسيه كل ميتقدملها احد يگلها تنازلي عن الورث وجواهر سوا حياتها وحياة ابنها جحيم الى ان ترك مهند البيت وظل يدرس ويشتغل باليل بمطعم ويجي يشوف امه ويروح ومنعرف وين يبات اسيا اضطرت تشتغل بصالون حتى تغطي مصاريف دوراتي نسينا شي اسمه دلال وگمنا نفكر باچر عدنا شي ناكله لو لا لان جعفر ياكل برا وينطي لماما مصرف قليل حتى بطلنا نروح مناسبات اقاربنا ليشوفون ملابسنا قديمه طلعت نتائج السادس اعدادي وطلعت مكمله بدرسين احياء ورياضيات وعرف جعفر نتيجتي ضربني اني بعمري محد ضاربني وقسى وياي بالضرب حتى ماما ماگدرت تتحمل ضلت تصيح عليه اطلع من البيت بعد مااريدك ضالم موت بناتي من الجوع من يصدگ بنت حجي نزار تشتغل بصالون البيت هذا باسمي والمحلات تتقسم واخذ حصتك وروح حتى احفادي حرمتني من جيتهم عليه طلع جعفروكلنا شجعنا ماما لازم تخلي حد ورا اسبوع ماما بدت تبچي وتحن لجعفر زارنا عمي وعمتي وابنها احمد اول مره اشوفه توسطوا بين ماما وجعفر امي رادت ينطي مصرف الها ولااخواته ويوافق على خطوبة اسيا من ولد ضابط متقدملها وتصالحوا كنت بيدي كتاب اقرا من شفت احمد مركز بالنظر عليه يعني لو واحد يگله ارسمها لعفاف يرسمني بدون ميباوع عمتي فريده من سلمت سالتني ها عفاف يمتى الدور الثاني
عمه على نهاية شهر الثامن احمد سالني يادرس انتي طالعه رياضيات واحياء
اثنينهن صعبات
هن لو سهلات چان نجحت
عندي ملازم راح اجيبهم الچ باليل بيها الاسئله الوزاريه اقريها لان الاسئله تتكرر وطلعي على النت اسئلة العام دور ثاني تفيدچ
انشالله طلعوا وتم الصلح بين ماما وجعفر الي مثل هو نادم ويبوس بيه ويعتذر ويگلي انجحي حتى انطيچ هديه واني سويت نفسي مصدگه
باليل احمد انطاني الملازم فتحتها گلبي كان حاس الملازم حجه بين صفحه والثانيه رقمه هسه هذا وقته والله بطران بس ميصير هذا ابن عمتي يجوز محتاج مساعده شي لعد الگرايب المن تراد بصراحه اكثر احمد عجبني بس يمكن اخابر بعد الامتحانات شنو بعد الامتحانات يجوز احمد محتاج شي بس شكوله من اخابر...يتبع
YOU ARE READING
بنات واولاد
Romanceقصه تتحدث عن ظاهره اجتماعيه سائده في مجتمعنا الان وهو حرمان الفتاة من الميراث واثر ذلك على العلاقات العائليه
