راح اياد وماشفته بعد ضليت حبيسه الاربع حيطان شفت كلشي بلبيت يمكن صرت حته احسب صوت الساعه وي كل دكه ساعه اني احسب وياها اسمع صوتها تسوي جك جك جك جك جك اني وياها ردت افقد عقلي اني كاعده ومنتظره حته المسواك خلص ولو اني ما اكل بس الي خاس والي خلص ضليت مثل الي ساكنه بجزيره وحدي .
كمت افكر بأياد مات عدل اني وين راح اعيش . فرضا ما اجه اياد وين راح اروح وهلبيت اذا اجو اهله اني وين اولي وين انطي وجهي . سبوع كمت اققد الامل من جيت اياد . بليوم الثامن اجه اياد وجايب ويا حمودي وعائشه وزينب وكلي بسرعه ثواني انتي جاهزه .
.
اياد اني جاهزه شنو . حته ملابس ما عندي ولا جنسيه ولا هويه ...
.
البسيلج شي من ملابس مره صديقي وامشي . وفضيننننني ....
ميصيرن عليه ...
انت ليش هيج عوجه اطلعي كدامي حتلو بثوبج يلا ما بي شي . ما الحك بعد ...
.
طلعت اركض ومشيت ويا صعدنه سياره .. مشت بينا السياره . وجان اياد كلش متوتر الي درجه . بحيث عينه على السياره خاف واحد يراقبه والي حسيت بي انو هوه خايف من ابوه . وابوه ميكدر يطلع خارج العراق حسب الرتبه مالته لان ميصير ضباط يسافرون يعتبرون جواسيس ....
.
وصلنه الحدود .... ااااه يلحدود العراقيه تبجي الصخر ..
التراب واصل للستار والصحراء القاحله . طلعت ودموعي تتجري مودعه العراق . مع السلامه يا بلدي العزيز . مع السلامه يا بلد طفولتي . يا ترى راح ارجع لو لا راح اشوفك لو لا ؟؟ هاي اول بجيت بجي وحسيت فقدت شي عزيز عليه يمكن اعز من شرفي الي انتهكه اياد . اعز من روحي الي جانت مهدده بلقتل من ابو مكرم ... شكد مرت عليه ايام تمنيت لو اني ما سامعه بشي اسمه عراق بس هسه لا تغيرت ١٨٠ درجه . ها هيه ماهي الا سويعات وراح اصير بخبر كانَ . دنكت اخذت شويه من تراب العراق كولت احتفظ بي للذكرى . شافني اياد كام يصيح عليه عوفي فشله . ذبيته ومشيت جان قرار الرجوع عندي كلش قوي .
حته اياد حس بهلشي وكلي ماكو شي اسمه رجوع بعد .
.
هذهِ هـي الدنيا .. فـراق و فـرآق ..
ليس لأننا نريد .. بل لأنها تُريد ..
حينما يشتاق بِك الاشتياق لعالمِـه ..
لن يبقى لك سوى الدموع ..
'و كم تعلمت أن البكاء لن يجدي بك نفعاً ..
ولكنك سـتبكي .. رغم ذلك .. !
.
.
طبعا خل اسولفلكم اول منزلت لمصر جانت بكلشي تفوق العراق . ثقافه حضاره والنسوان ترفه والزلم علموديل كله من هذا الجارلس .والنسوان كله لبسهن قصير وكتافيات والشعر كله * دلس * يعني مواكبات الحظاره وجنت اسمع انو مصر الدوله الي انفتحت على الغرب بس ممصدكه هيج . كووولها شقق سكنيه ما عدهم مثل بيوتنه لا ابد . وزحمه ناسسس زحمه وهوسه وكثافه سكانيه كلش الى ابعد الحدود ...
.
قارنت بين نفسي شلون جايه من دوله لدوله شعري مخربط صارلي سبوع ممشطه والملابس مخلعه شكلي يمكن جان اسوء من شكل المستجدي عدهم .
.
الي عرفته اني منتقله لهنا بأسم مرفت وكان البصبور مثل ميكولون *جواز السفر * باسم مرفت كامل تحسين ...
.
وصلنه لشقه بلقاهره . وجان مفتاحها بايد اياد يعني جايبه وياه من العراق . لكيتها مأثثه وكامله من جميع تجهيزاتها بس جانت متربه . وكلي انضفها بين ما هو ينزل يجيب الاكل . نزل وره ساعتين جاب مسواك واني نضفت ورتبب الكعده .
