حبيبتي الساحرة

١

-طحطح طحطح

-طحطوووح چبح

فزيت من النوم مخترعة ...
عزة هذا الجيثوم ...لو الكابوس   ما فرق بينهن .....

-ولج طحطح

عزة هذا صوت مرت عمي ...  .

-جاية جاية
كمت اركض الها وبديت بكرابي الصباحي من تنظيف وشطف وغسل والركض ورة جهال عمي .. 

اني ضحى الشهيرة  بطحطح.... !
ابوية اتوفى قبل سنة وعشت ببيت عمي . 
امي مطلقة من ابوية وما شايفتها بحياتي يكولون ابوية طلكها وجان عايش وياها بالنجف تركها بليلة ظلمة واخذني وياه ... وطلكها غيابي  جان عمري سنة وحده .... المهم بعد وفاته شفت المر ويه مرت عمي  ... فوكلت عمي واتوسلت اله يعرفلي امي وين ساكنه رفض وكالي الحقيقة المرة الي هي امي مشعوذه وسحارة و ما تخاف من الله فأبوية عباله كشافة وتاخذ خيرة بالقران فحبها  وازوجها من جان طالب هناك .  من اكتشفها سحارة وتتعامل ويه المشعوذين هي وامها يدفنن اسحورة  جانت حامل بيه  صبر على مودي فترة ... و بوراها اخذني وهج ... لبغداد.....

زادت المشاكل وشكاوي مرت عمي عليه لأن كمت ما اشتغل زايد واعارك و امد الساني ... وصرت حمل ثكل عليهم ...
فقبل يشوفلي امي وين والغريب ما طول يوم واحد وكالي العنوان .!!!!!

لميت ملابسي ورحت ويه عمي للكراج ...

صعدنا بالطريق سألت
- عمو عمو

-اشلون راح تندل البيت

-اتصل بيها ادزلي اي واحد ياخذني ...

-عندك رقمها ..؟؟؟

سكت ..

ورة اشوية كال
-شوفي عموا . راح اعترف الج ... 
من ابوج شرد بيج ...هي تعرف وين بيت اهله بغداد ورفعت قضيه بس خسرتها من ابوج اثبت للقضاء مهنتها و بعدها انسجنت بتهمة الدجل والشعوذة

-شنووو ؟؟ راح اتوديني الها وهي سوابق

-مو انتي ردتي امج ؟

انصدمت بحقيقتي المرة

-شوفي هي من طلعت من السجن رجعت لشغلتها .. بس ما اخذتج ولا حاولت تتقرب الج تزوجت واحد مثلها .
وخلفت منه . بس جانت تدز الج افلوس وابوج لان حالته صعبة يصرفهن عليج ما يرجعهن

-امي تصرف عليه ،؟

-اي

-لعد ليش ما حاولت اشوفني

-خلتج بعيده عنها  حتى سمعتج ما تخرب ... كالت عاد خليها لا اصير مثلي ومثل جهالي الثانين عليها سمعة ..

-ياا  عمي رجعني ما اريد اروح الها

-ما اكدر عمي ....انت مو ردتي .. اني  يادوب كاعد ببيت اجار و ملبي طلبات بيتي وانت ما متراهمة ويه مرتي    .. ولا اتقبلين  بحويسم  ..