His Greatest Downfall

CHAPTER 35

Chapter 35

"SA WAKAS bumigay rin ang bitterela ng taon!" nakadipang deklara ni Marga pagkatapos niyang malaman ang tungkol sa pagbabalikan namin ng sperm donor.

"What's bitterela, Tita Marga?" inosenteng tanong ng anak ko habang kumakain ng sandwich na ginawa ko para sa almusal niya.

Sinenyasan ko si Marga na manahimik. Ngunit lumapad lang ang ngiti niya kahit na pinandilatan ko siya. Kaya pala sinulsulan niya akong sugurin si Sid sa kanilang bahay dahil isa siya sa mga kasabwat ng mga lalaking 'yon.

"Baby Sagan, ang ibig sabihin no'n nagpapakipot pero may gusto rin naman."

"Marga!" I clenched my fist.

"Oh!" Napatakip ng kanyang mga bibig si Sagan.

"Sagan, doon ka muna. Manood ka ng TV. Mag-uusap lang kami ng Tita Marga mo, ha?"

Saktong tapos na siyang kumain kaya't inalalayan ko siya pababa ng upuan. I glared at Marga. Patago ko siyang inambahan ng suntok.

"Okay, Mommy."

Mabuti na lang at masunurin ang anak ko. Minsan nga lang naiimpluwensyahan ng dalawang bakla kaya natututo nang gumawa ng kalokohan.

"Ikaw, nakakarami ka na!"

"Aray ko naman, besh! Huwag ang tagiliran ko."

Kinurot ko kasi siya sa tagiliran.

"Akala mo hindi ko alam na planado n'yo lahat. Alam kong pinagkaisahan n'yo akong pagselosin."

Inikutan niya ako ng mga mata.

"Ang arte mo kasi. Kung hindi ka pa pinagselos hindi ka pa aamin. Oh, ano? Takot ka ring ipagpalit ni Fafa Sid, 'no?"

I scoffed. "Wow! Fafa Sid na ulit? Parang kailan lang halos isumpa mo 'yung tao, ah."

"Siyempre, naka-move na ako, 'no! Ikaw lang naman ang parang sirang plaka na bitterela. Nagpakipot pa pero may feelings pa rin pala. Hay naku, masuwerte ka nga kasi loyal sa 'yo ang kubetang 'yon. Buti na lang hindi si Ronald ang nakatuluyan mo, kundi lalagpas ng bubong ang sungay ko," maarte niyang sagot.

Napabuntonghininga ako nang maalala ko sina Ronald at Tessa. Naaawa ako sa pinsan ko. Noong iniwan ako ni Sid ay sobrang nasaktan ako at napuno ng poot ang aking puso. I thought I had it worst but when I discovered about what happened to Tessa, it made me realize that life brings us lemons unannounced. Mas matindi ang paghihirap na pinagdadaanan niya ngayon kumpara sa paghihirap na pinagdaanan ko noon. Ipinagdarasal ko na sana ay bigyan siya ng lakas para malagpasan niya ang matinding pagsubok na ito sa kanyang buhay.

"Alam mo naman na kahit na minsan mahilig kang mambuwisit hindi kita matitiis. Salamat sa lahat ng naitulong mo, besh. Simula pa man noon ay naging sandalan na kita. Kahit na madalas ay naiistorbo na kita, lagi kang nandiyan para sa 'kin at kay Sagan."

"Wait, bakit parang naaamoy ko nang nagpapaalam ka? Don't tell me—"

"Sira."

"Etchus lang, besh. Ang drama mo kasi. Siyempre kahit minsan nakakairita ang kaartehan mo, mahal kita—"

Naputol ang pag-uusap namin ni Marga nang may maulinigan kaming tunog mula sa labas ng pinto. Parang tugtog ng gitara at may kumakanta.

Akmang tutungo na ako sa pinto nang maunahan ako ni Sagan. Mabilis siyang tumakbo roon at pinagbuksan ang kung sinumang nasa labas.

"I knew it! Daddy!"

Napatayo ako nang tuwid. Nagkatinginan kami ni Marga. Pansin ko ang pagkislap ng kanyang mga mata. Mas kinikilig pa siya kaysa sa 'kin.