السيرة النبوية باللهجة العامية

5

5
يلا صلوا على النبي 💜

وقفنا المرة اللي فاتت عند النبيﷺ لما بقا عنده ٢٠ سنة ووقتها في حرب كبيرة قامت اسمها "حرب الفجار "

الحرب دي وقعت في سوق اسمه " عكاظ "
و كانت بين قريش وقبيلة اسمها كنانة وبين قبيلة اسمها قيس ، تقريباً كله كان بيحارب كله واتقتل عدد كبير جداً من كل الجهات ، وفي الاخر وقفوا واتفقوا أن كل واحد يعد قتلى فريقه واللي يلاقي قتلاه أكتر يأخد دية من البقية واتصالحوا ..

واتسمت حرب الفجار لأنهم انتهكوا فيه حرمة مكة وحرمة الشهر الحرام ..
النبي ﷺ لم يحارب معهم ، كان بيجهز النبال لأعمامه بس..

بعد الحرب دي ما انتهت كان في رجل جاي من منطقة اسمها زبيد ببضاعة لمكة ، فاشتراها منه العاص بن وائل السهمي ، وبعد ما اشتراها مرضاش يعطيه حقه ، فراح يشتكي لقبيلة عبدالدار ،وبني مخزوم، وبني جمح، وبني سهم، وبني عدي.. فمحدش منهم سمعه وطنشوه ،

فراح وقف على "جبل أبي قبيس" وقعد يقول أبيات شعر يشتكي فيها اللي حصله وقعد يقول مين يساعدني اخد حقي!!  فسمعه الزبير بن عبد المطلب ، راح جمع قبيلة بني هاشم ، وبني عبد المطلب، وبني أسد ، وبني زهرة ، وبني تميم.. في دار عبدالله بن جدعان رئيس قبيلة بني تميم ، واتفقوا واتحالفوا مع بعض انهم لا يجدوا بمكة مظلوم سواء من اهلها او من غيرهم إلا وساعدوه لحد ما ياخد حقه ،

بعدين راحوا كلهم كده لمين؟! للعاص بن وائل السهمي اللي ظلم الرجل واخدوا حق الرجل منه ودفعوه له .

النبيﷺ حضر الحلف دا مع أعمامه وسموه " حلف الفَضول"
وبعد ما النبيﷺ بُعث بالإسلام قال " لقد شهدت في دار عبدالله بن جدعان حلفاً أحب إليّ من حمر النعم ، ولو أدعي به في الإسلام لأجبت"
يعني انا حضرت حلف احب لي من افضل الأنعام ، لأنه كان حلف خير ، ولو حصل حلف زي دا في الإسلام ودعوني هشارك معاهم..

طب تيجوا نعرف النبي ﷺ كان بيشتغل في ايه؟!
زي ما احنا عارفين ان النبيﷺ كان يتيم وكان في كفالة جده وبعدين لما جده مات بقا في كفالة عمه ، ولم يرث عن ابيه شئ يُغنيه ، فلما بلغ سن ينفع يشتغل فيه بقا يروح مع اخوته من الرضاعة في بني سعد يرعى الأغنام..

ولما رجع مكة رعاها لأهلها ، كان ياخد منهم الغنم يرعاها ويدفعوله قراريط والقيراط جزء بسيط جدا من الدينار..

ورعي الأغنام من سنن الأنبياء في أول حياتهم ، النبيﷺ قال مرة بعد ما أكرمه ربنا بالنبوة " ما من نبي إلا ورعاها"

بعد كده لما النبيﷺ بقى شاب كان بيشتغل بالتجارة وكان بيشتغل مع واحد اسمه "السائب" وكان خير شريك له كان أمين جداً معاه.
وعُرف عن النبيﷺ أنه في غاية الصدق والأمانة والعفة ، وكان كده في جميع حالاته حتى أنهم لقبوه بالصادق الأمين صلى الله عليه وسلم...

المرة الجاية إن شاء الله هنعرف مين هيسمع بيه ﷺ ويخليه يشتغل في تجارته!!

#السيرة النبوية باللهجة العامية
#خدمة حفيدات النبي ﷺ 😍💙
#بنات وبس👑💜
_____________

للإنضمام:
إرسال رسالة صوتية بإسمك لـ:
+201210204190